ഒരു ശംഖിൻ്റെ നൊമ്പരം

ഉടഞ്ഞ ശംഖിൻ്റെ
ഉൾവിളിയ്ക്കുള്ളിൽ
ഒളിഞ്ഞിരിയ്ക്കുന്നു
ഒരു ശ്യാമവേദന
മിഴികൾ പൂട്ടി
വിതുമ്പും മനസ്സിലായ്
കനലെരിഞ്ഞ 
കിനാവിൻ്റെ വേദന
മുടിയഴിഞ്ഞൊരാ
മേഘങ്ങളിൽ ചോല
വലകൾ വീശി തൃസന്ധ്യ
നിന്നീടവെ
ശിലകൾ കൊത്തിയ
ചുറ്റമ്പലത്തിൽ
മണികൾ വാദ്യങ്ങൾ
നാമം ജപിക്കവെ
വിരൽ മുറുക്കിയാ
ശംഖിൻ്റെ വായിൽ
മുഖമമർത്തി കൊടും
കാറ്റുണരവെ
ഉള്ളുടഞ്ഞൊരാ
ശംഖിൻ്റെ വീർപ്പിൽ
നിന്നുയർന്നുള്ള
ഓംകാരം കേൾക്കെ
ഭക്തിയാലവർ
ചുറ്റമ്പലത്തിൽ
മിഴികൾ പൂട്ടി
കരംകൂപ്പിനിൽക്കെ
ദീപനാള പ്രഭാവലയത്തിൽ
ദീപാരാധന
തൊഴുതവർ പോകെ
ശംഖുറങ്ങാതെ
യമ്പലത്തിണ്ണയിൽ
നെഞ്ചുവേദന
ഭക്ഷിച്ചിരിയ്ക്കവെ
ദൈവമൊന്നിങ്ങിറങ്ങി
വന്നെങ്കിൽ
എൻ്റെ വേദന
കണ്ടിരുന്നെങ്കിൽ
കുഞ്ഞു തോളിൽ
തലോടിയിട്ടിങ്ങനെ
ഒന്നുമില്ലെന്നു
ചൊന്നിരുന്നെങ്കിൽ
ചിന്തകൾ നെയ്
വിളക്കായെരിഞ്ഞ
കുഞ്ഞു ചൂടിൽ
മനം കാഞ്ഞിരിയ്ക്കെ
പണ്ട് നെഞ്ചിൽ
കരിനിഴൽ പോലെ
വന്നുവീണ 
നിമിഷങ്ങളോർമ്മയിൽ
ഉപ്പുവെള്ളം 
പുതച്ച കയങ്ങളിൽ
മുത്തി മെല്ലെ
നടന്നു കളിച്ചതും
ഞണ്ടുകൾ വന്നു
നുള്ളാൻ ശ്രമിക്കവെ
ഉൾവലിഞ്ഞങ്ങു 
തെന്നി മറഞ്ഞതും
അച്ഛനമ്മമാർ
കണ്ണിൽപ്പെടാതെ
ഉച്ചിയിൽ പൂത്ത
നക്ഷത്ര ശോഭയെ
കണ്ടു മോഹിച്ചതിൻ്റെ
നിഴൽ തേടി
വന്നു തീര
ത്തരികിലായ് നിൽക്കവെ
കൂരിരുട്ടിൽ
പതുങ്ങിയിരുന്നൊരാ
ക്രൂര മർത്യൻ്റെ
കണ്ണിൽക്കുടുങ്ങിയോ
വൻതിരയിൽ
മറയുന്നതിൻ മുന്നേ
വന്നെടുത്തവൻ
കൈയ്യിൽപ്പിടയവെ
ശംഖുപുത്രിയെ
ചുംബിച്ചവനെൻ്റെ
ചന്ത മൊക്കെ
ചതച്ചു കളയവെ
ഉള്ളിൽ വിള്ളലായ്
ഊതാൻ കണക്കിനു
ഉള്ളുടഞ്ഞൊരു
ശംഖായി മാറി ഞാൻ
ശ്യാമ ഭാവതുലാ
മഴക്കെട്ടിലും
ഇടി മുഴങ്ങുമി
ടവക്കളത്തിലും
കുളിര്മാറുവാൻ
കൈകൾക്ക് ചുണ്ടിന്
ചൂടുനൽകുന്ന
ശംഖായി മാറി ഞാൻ
ഉൾവിളികൾ വിളിച്ചു
യാമങ്ങളിൽ
മെയ് തളരുന്ന
വേദനയാകിലും
ആർത്തിപൂണ്ട
നഗരക്കുരുക്കുകൾ
കൂരിരുട്ടിലിടവഴി
കോണുകൾ
യാത്ര ചെയ്തു
വരുന്നതിലെപ്പഴോ
നീച കൈകളിൽ 
പെട്ടുപിsഞ്ഞെൻ്റെ
ഉൾമുറിവീന്ന
പശ്രുതി കേൾക്കവെ
അമ്പലമതിൽ
ചുറ്റിന്നരികിലായ്
അൻപുകാട്ടാതവരിട്ടു
പോകയായ്
കൈകൾ കൂപ്പി ഞാൻ
ദൈവനാമങ്ങളിൽ 
ശംഖു നാദം മുഴക്കി കരയുന്നു
കൺ നിറഞ്ഞു 
കരി നിഴലോർമ്മകൾ
ഉള്ളുനീറുന്നു 
ശംഖിൻ്റെ നൊമ്പരം 

പോതുപാറ മധുസൂദനൻ