വിഷുക്കൈനീട്ടമെന്ന് പറഞ്ഞ് ആരാധകരെ കുടുക്കി; ഇന്ത്യയില്‍ വിലാസം പോലുമില്ലാത്ത വ്യാജ ആപ്പ് പ്രമോട്ട് ചെയ്ത നടി ശ്രീവിദ്യ മുല്ലച്ചേരിക്ക് എതിരെ അറസ്റ്റ് വാറന്റ്! ഒന്നര ലക്ഷം രൂപ പരാതിക്കാരന് നല്‍കാന്‍ കോടതി വിധിച്ചിട്ടും ഗൗനിച്ചില്ല; നാല് തവണ അറസ്റ്റ് വാറന്റ് വന്നിട്ടും പണം നല്‍കാതെ താരം

വ്യാജ ട്രേഡിങ് ആപ്പ് പ്രമോട്ട് ചെയ്തതുമായി ബന്ധപ്പെട്ട കേസില്‍ പ്രശസ്ത സിനിമാ-സീരിയല്‍ താരം ശ്രീവിദ്യ മുല്ലച്ചേരിക്ക് എതിരെ കോടതി അറസ്റ്റ് വാറന്റ് പുറപ്പെടുവിച്ചതായി റിപ്പോര്‍ട്ടുകള്‍. നാല് വര്‍ഷം മുന്‍പ് നടി തന്റെ സ്വന്തം സോഷ്യല്‍ മീഡിയ പേജില്‍ പങ്കുവെച്ച ഒരു പ്രമോഷന്‍ വീഡിയോയാണ് ഈ നിയമനടപടികള്‍ക്ക് ആധാരമായിരിക്കുന്നത്. ശ്രീവിദ്യയുടെ ഈ വീഡിയോ കണ്ട് വിശ്വസിച്ച് ട്രേഡിങ് ആപ്പില്‍ പണം നിക്ഷേപിച്ച ഒരു യുവാവിന് ഒരു ലക്ഷത്തിലേറെ രൂപ നഷ്ടപ്പെടുകയായിരുന്നു. കൃത്യമായി പറഞ്ഞാല്‍ ഒരു ലക്ഷത്തി മൂവായിരം (1,03,000) രൂപയാണ് യുവാവിന് ഈ ആപ്പിലൂടെ നഷ്ടമായത്. 

നാല് വര്‍ഷം മുന്‍പ് ഒരു വിഷുക്കാലത്താണ് നടിയുടെ സോഷ്യല്‍ മീഡിയ പേജുകളില്‍ ഈ ട്രേഡിങ് ആപ്പിന്റെ പരസ്യ വീഡിയോ പ്രത്യക്ഷപ്പെട്ടത്. ഈ വീഡിയോയെ തന്റെ വിഷുക്കൈനീട്ടമായി എല്ലാവരും കണക്കാക്കണമെന്നും, എല്ലാവരുടെയും ജീവിതത്തില്‍ ഒരു അധിക വരുമാനം (അഡീഷണല്‍ ഇന്‍കം) ആവശ്യമാണെന്നും പറഞ്ഞാണ് ശ്രീവിദ്യ അന്ന് വീഡിയോ പങ്കുവെച്ചത്. 'ബിനോമോ' (Binomo) എന്ന ട്രേഡിങ് ആപ്പിനെ കുറിച്ചാണ് നടി സംസാരിച്ചിരുന്നത്. 

ഏറ്റവും വിശ്വാസയോഗ്യമായ ആപ്പെന്ന് അവകാശവാദം

ഇന്ത്യയില്‍ രണ്ട് മില്യണില്‍ അധികം ആളുകള്‍ വിജയകരമായി ഉപയോഗിക്കുന്ന ആപ്പാണ് ബിനോമോ എന്നും, അത് മാത്രമല്ല ഇത് ഏറ്റവും വിശ്വാസയോഗ്യമായ (മോസ്റ്റ് ട്രസ്റ്റഡ്) ട്രേഡിങ് ആപ്പാണെന്നുമാണ് ശ്രീവിദ്യ തന്റെ വീഡിയോയിലൂടെ അവകാശപ്പെട്ടിരുന്നത്. ഈ ആപ്പുമായി ബന്ധപ്പെട്ട് നിരവധി പ്രമോഷന്‍ വീഡിയോകള്‍ ശ്രീവിദ്യ അക്കാലത്ത് ചെയ്തിരുന്നു. നടി നല്‍കിയ ഈ ഉറപ്പുകള്‍ വിശ്വസിച്ചാണ് യുവാവ് ആപ്പില്‍ പണം നിക്ഷേപിക്കാന്‍ തയ്യാറായത്. ഘട്ടം ഘട്ടമായാണ് യുവാവ് 1,03,000 രൂപ ആപ്പില്‍ നിക്ഷേപിച്ച് ട്രേഡിങ് നടത്തിയത്. എന്നാല്‍ ഇത്രയും പണം നിക്ഷേപിച്ചിട്ടും ഒരു രൂപ പോലും ആപ്പില്‍ നിന്നും തിരികെ സമ്പാദിക്കാനോ സ്വന്തം അക്കൗണ്ടിലേക്ക് പിന്‍വലിക്കാനോ യുവാവിന് കഴിഞ്ഞില്ല. താന്‍ പറ്റിക്കപ്പെടുകയാണെന്നും പണം നഷ്ടപ്പെട്ടുവെന്നും മനസ്സിലാക്കിയ യുവാവ് ഒടുവില്‍ കോടതിയെ സമീപിക്കുകയായിരുന്നു. തുടര്‍ന്ന് കേസില്‍ വിശദമായ വാദം കേള്‍ക്കുകയും പരാതിക്കാരനായ യുവാവിന് അനുകൂലമായി കോടതി വിധി പ്രസ്താവിക്കുകയും ചെയ്തു. 

കോടതി വിധി യുവാവിന് അനുകൂലം പരാതിക്കാരനായ യുവാവിന് ശ്രീവിദ്യ നഷ്ടപ്പെട്ട 1,03,000 രൂപ തിരികെ നല്‍കണമെന്നും, കൂടാതെ നഷ്ടപരിഹാരമായി 50,000 രൂപ അധികമായി നല്‍കണമെന്നുമായിരുന്നു കോടതിയുടെ ഉത്തരവ്. എന്നാല്‍ ഈ വിധി വന്നതിന് പിന്നാലെ നടി ശ്രീവിദ്യ കോടതിയില്‍ അപ്പീല്‍ നല്‍കുകയാണുണ്ടായത്. തനിക്ക് വേണ്ടി ഹാജരായ വക്കീലിന് കേസ് കോടതിയില്‍ കൃത്യമായി വാദിക്കാന്‍ കഴിഞ്ഞില്ലെന്നും, ആ വീഴ്ച കൊണ്ടാണ് താന്‍ കേസില്‍ തോറ്റുപോയതെന്നുമാണ് നടി അപ്പീലില്‍ വ്യക്തമാക്കിയത്. കേസ് ഏറ്റെടുത്തിരുന്ന വക്കീലിന്റെ പേരില്‍ മറ്റൊരു കേസ് നിലവിലുണ്ടെന്നും, അതിന്റെ തിരക്കുകളിലും കാര്യങ്ങളിലും ആയതിനാലാണ് വക്കീല്‍ നടിക്ക് വേണ്ടി കേസില്‍ കൃത്യമായി ഇടപെടാതിരുന്നതെന്നും റിപ്പോര്‍ട്ടുകള്‍ സൂചിപ്പിക്കുന്നുണ്ട്. കഴിഞ്ഞ മാര്‍ച്ച് മാസത്തിനുള്ളില്‍ തന്നെ പരാതിക്കാരന് അര്‍ഹതപ്പെട്ട തുക ശ്രീവിദ്യ നല്‍കണമെന്നായിരുന്നു കോടതി ഉത്തരവിട്ടിരുന്നതെങ്കിലും അത് അനുസരിക്കാന്‍ താരം തയ്യാറായില്ല. 

കോടതിയുടെ അന്തിമ വിധി വന്നിട്ട് ഇപ്പോള്‍ നാല് മാസത്തിലേറെയായിരിക്കുകയാണ്. പണം നല്‍കാത്തതിനെ തുടര്‍ന്ന് കോടതി നാല് തവണ നടിക്കെതിരെ അറസ്റ്റ് വാറന്റ് പുറപ്പെടുവിച്ചെങ്കിലും പോലീസ് ഇതുവരെ താരത്തെ അറസ്റ്റ് ചെയ്തിട്ടില്ല. നിലവില്‍ താരം ഭര്‍ത്താവിനൊപ്പം വിദേശത്ത് അവധി ആഘോഷിക്കുകയാണെന്നാണ് പുറത്തുവരുന്ന വിവരങ്ങള്‍. അതേസമയം, ശ്രീവിദ്യ പരസ്യത്തില്‍ പറഞ്ഞ കാര്യങ്ങളെല്ലാം പൂര്‍ണ്ണമായും തെറ്റാണെന്ന് പരാതിക്കാരനായ യുവാവ് വ്യക്തമാക്കുന്നു. താരം പറയുന്നതുപോലെ പണം അത്ര എളുപ്പത്തില്‍ ഒന്നും ആപ്പില്‍ നിന്ന് പിന്‍വലിക്കാന്‍ കഴിയില്ലെന്നും, അതിനായി അവര്‍ പലതരത്തിലുള്ള കടുപ്പമേറിയ നിബന്ധനകള്‍ വെച്ചിട്ടുണ്ടെന്നും യുവാവ് പറയുന്നു. ഇത് ഒട്ടും വിശ്വസിക്കാന്‍ കൊള്ളാത്ത ആപ്പാണെന്നും, ഈ കമ്പനിക്ക് ഇന്ത്യയില്‍ ഒരു ഔദ്യോഗിക വിലാസം (അഡ്രസ്) പോലുമില്ലെന്നും യുവാവ് കേസിനെക്കുറിച്ച് സംസാരിക്കവെ വെളിപ്പെടുത്തി. 

കാസര്‍ഗോഡ് സ്വദേശിനിയായ ശ്രീവിദ്യ സംവിധായകന്‍ രാഹുലിനെ വിവാഹം കഴിച്ചതിന് ശേഷം ഇപ്പോള്‍ കൊച്ചിയിലാണ് സ്ഥിരതാമസം ആക്കിയിരിക്കുന്നത്. ഏതാനും സിനിമകളിലും സീരിയലുകളിലും അഭിനയിച്ചിട്ടുണ്ടെങ്കിലും ടെലിവിഷനിലെ 'സ്റ്റാര്‍ മാജിക്' എന്ന ജനപ്രിയ ഷോയിലൂടെയാണ് ശ്രീവിദ്യ പ്രേക്ഷകര്‍ക്കിടയില്‍ വലിയ ജനപ്രീതി നേടിയത്.