നിര്‍മിച്ച ചിത്രങ്ങള്‍ പരാജയം; കടക്കെണിയില്‍ നിന്ന് കരകയറാന്‍ നിര്‍മാണ കമ്പനിയായി ഉപയോഗിച്ചിരുന്ന ബംഗ്ലാവ് വിറ്റ് കങ്കണ റണാവത്ത്

മുംബൈ ബാന്ദ്രയിലെ പാലി ഹില്ലിലുള്ള തന്റെ ബംഗ്ലാവ് വിറ്റ് നടിയും എംപിയുമായ കങ്കണ റണാവത്ത്. 2017ല്‍ 20 കോടി രൂപക്ക് വാങ്ങിയ ബംഗ്ലാവ് 32 കോടി രൂപക്ക് കങ്കണ വിറ്റതായാണ് റിപ്പോര്‍ട്ടുകള്‍. ബംഗ്ലാവ് കങ്കണയുടെ ചലച്ചിത്രം നിര്‍മാണ കമ്പനിയായ മണികര്‍ണിക ഫിലിംസിന്റെ ഓഫീസായി ഉപയോഗിച്ചു വരുകയായിരുന്നു.

കഴിഞ്ഞ മാസം കോഡ് എസ്റ്റേറ്റ് എന്ന യൂട്യൂബ് പേജും ഒരു പ്രൊഡക്ഷന്‍ ഹൗസ് ഓഫീസ് വില്‍പ്പനയ്ക്കുണ്ടെന്ന് വെളിപ്പെടുത്തുന്ന ഒരു വീഡിയോ പങ്കുവെച്ചിരുന്നു. എന്നാല്‍ പേരോ പ്രൊഡക്ഷന്‍ ഹൗസിന്റെ ഉടമയെ കുറിച്ചുള്ള വിവരമോ വെളിപ്പെടുത്തിയിരുന്നില്ല. പിന്നീട് ഇത് കങ്കണയുടെ ഓഫീസ് ആണെന്ന് വാര്‍ത്തകള്‍ വന്നിരുന്നു.

സിനിമ നിര്‍മാണവുമായി ബന്ധപ്പെട്ട് തന്റെ കടങ്ങള്‍ വീട്ടാനും ഇപ്പോള്‍ എംപി എന്ന നിലയില്‍ ഹിമാചലിലെ മണ്ഡലത്തിലും ഡല്‍ഹിയിലും പ്രവര്‍ത്തിക്കുന്നതിനും വേണ്ടിയാണ് മുംബൈയിലെ ബംഗ്ലാവ് കങ്കണ വിറ്റത് എന്നാണ് വിവരം. ഈ അടുത്തിടെ കങ്കണ നിര്‍മിച്ച എല്ലാ ചിത്രങ്ങളും വന്‍ പരാജയമായിരുന്നു.മുംബൈ ബാന്ദ്രയിലെ പാലി ഹില്ലിലുള്ള ബം?ഗ്ലാവാണ് നടി വിറ്റത്.

അതേസമയം, കങ്കണയുടെ പുതിയ ചിത്രമാണ് എമര്‍ജന്‍സി. നടിയുടെ തന്നെ സംവിധാനത്തിലും നിര്‍മ്മാണത്തിലും ഒരുങ്ങുന്ന ചിത്രമാണ് എമര്‍ജന്‍സി. 1975 മുതല്‍ 77 വരെ ഇന്ത്യയില്‍ ഉണ്ടായ എമര്‍ജന്‍സി കാലഘട്ടത്തിനെ കുറിച്ചാണ് സിനിമ പറയുന്നത്. ചിത്രത്തില്‍ ഇന്ദിരാ ഗാന്ധി ആയാണ് കങ്കണ വേഷമിടുന്നത്.