ബിഗ്‌ബോസിലെത്തിയതോടെ സാബുമോന് അവസരങ്ങളുടെ പെരുമഴ;   ജെല്ലിക്കെട്ടിനു പുറമേ പ്രകാശന്റെ മെട്രോയിലും ബിഗ്‌ബോസ് വിജയി എത്തുന്നു; ചിത്രത്തിന്റെ പോസ്റ്റര്‍ ഏറ്റെടുത്ത ആരാധകര്‍

ബിഗ്‌ബോസ് അവസാനിച്ചതോടു കൂടി മത്സരാര്‍ത്ഥികളെല്ലാം തിരക്കിലായിരിക്കയാണ്. അരിസ്റ്റോ സുരേഷ്,ഡേവിഡ് തുടങ്ങിയവരൊക്കെ സിനിമകളിലും മറ്റും അവസരങ്ങള്‍ നേടി തിരക്കിലായിരിക്കയാണ്. ബിഗ്‌ബോസ് വിജയിയായ സാബുമോനും ഷൂട്ടിങ് തിരക്കിലേക്ക് മാറുകയാണ്. ജെല്ലിക്കെട്ടില്‍ സാബു അഭിനയിക്കുന്നുവെന്ന വാര്‍ത്തയ്ക്കു പിന്നാലെയാണ് പ്രകാശന്റെ മെട്രോയിലും സാബുമോന്‍ എത്തുന്നുവെന്ന വാര്‍ത്ത എത്തിയിരിക്കുന്നത്. ചിത്രത്തിന്റെ ഒഫിഷ്യല്‍ പേജിലൂടെ പുറത്തിറങ്ങിയ ചിത്രത്തിന്റെ പോസ്റ്റര്‍ സാബു ഫാന്‍സ് ഏറ്റെടുത്തിരിക്കയാണ്. 

ദിനേഷ് ആദ്യമായി നായക വേഷത്തിലെത്തുന്ന് ചിത്രമാണ് പ്രകാശന്റെ മെട്രോ.ജൂനിയര്‍ ആര്‍ട്ടിസ്റ്റായി വന്ന് മലയാളത്തില്‍ ശ്രദ്ധേയ കഥാപാത്രങ്ങളെ അവതരിപ്പിച്ച നടനാണ് ദിനേശ് പ്രഭാകര്‍.  ഹസീന സുനീറാണ് ചിത്രം കഥയെഴുതി സംവിധാനം ചെയ്യുന്നത്. സൈനു സുല്‍ത്താന്‍ ഫിലിംസ് ചിത്രം നിര്‍മ്മിക്കുന്നു. ബിഗ് ബോസ് വിന്നറായ ശേഷം സാബുവിന് ലഭിച്ച ഒരു ചിത്രം കൂടിയായിരുന്നു ഇത്. ചിത്രത്തിന്റെ പുതിയൊരു പോസ്റ്റര്‍ സമൂഹ മാധ്യമങ്ങളില്‍ പുറത്തിറങ്ങിയിരുന്നു.

ചിത്രത്തിലെ സാബുവിന്റെയും ദിനേഷിന്റെയും ലുക്ക് കാണിച്ചുകൊണ്ടുളള  പോസ്റ്ററാണ് അണിയറ പ്രവര്‍ത്തകര്‍ പുറത്തുവിട്ടിരിക്കുന്നത്. പോസ്റ്ററിന് മികച്ച സ്വീകാര്യതയാണ് സമൂഹ മാധ്യമങ്ങളില്‍ ലഭിക്കുന്നത്. ചിത്രത്തിന്റെ തിരക്കഥ,സംഭാഷണം ഒരുക്കിയിരിക്കുന്നത് മിത്രനാണ്. ലിജു മാത്യൂ സിനിമയുടെ ചായാഗ്രഹണം നിര്‍വ്വഹിക്കുന്നു. പ്രകാശന്റെ മെട്രോയ്ക്കു പുറമെ ലിജോ ജോസ് പെല്ലിശ്ശേരിയുടെ ജെല്ലിക്കെട്ടിലും സാബു ഒരു പ്രധാന കഥാപാത്രമായി എത്തുന്നുണ്ട്. ബിഗ് ബോസ് ഫൈനലിന്റെ അന്നായിരുന്നു ജെല്ലിക്കെട്ടില്‍ അഭിനയിക്കാനുളള അവസരം സാബുവിനെ തേടിയെത്തിയിരുന്നത്.