നിമിഷ നേരത്തില്‍ മുഖം തിളങ്ങാന്‍ ഇതാ ചില ഫേസ് പാക്കുകള്‍

അന്തരീക്ഷ മലിനീകരണവും സൂര്യതാപവും മാറുന്ന ജീവിത ശൈലിയുമൊക്കെ മുഖത്തെ അഴക് ഇല്ലാതാക്കും. കൃത്യമായ പരിചരണം നല്‍കേണ്ടത് വളരെ അത്യാവശ്യമാണ്.
 

വീട്ടില്‍ എന്തെങ്കിലും ചടങ്ങുകളോ അല്ലെങ്കില്‍ കല്യാണമോ വരുമ്പോഴാണ് മുഖത്തെ പാടുകളും കരിവാളിപ്പുമൊക്കെ പലരെയും അലട്ടുന്നത്. തിരക്കുകള്‍ കാരണം പലപ്പോഴും ചര്‍മ്മ സംരക്ഷണം പലരും മറന്ന് പോകാറുണ്ട്. അന്തരീക്ഷ മലിനീകരണവും സൂര്യതാപവും മാറുന്ന ജീവിത ശൈലിയുമൊക്കെ മുഖത്തെ അഴക് ഇല്ലാതാക്കും. കൃത്യമായ പരിചരണം നല്‍കേണ്ടത് വളരെ അത്യാവശ്യമാണ്. മേക്കപ്പ് ഇടുന്നതിന് മുന്‍പ് ചര്‍മ്മത്തില്‍ വീട്ടില്‍ തന്നെ ചെയ്യാന്‍ കഴിയുന്ന ചില പൊടി കൈകള്‍ പരീക്ഷിച്ച് കരിവാളിപ്പും പാടുകളും മാറ്റുന്നത് വളരെ നല്ലതാണ്. ചടങ്ങുകള്‍ക്ക് പോകുന്നതിന് മുന്‍പ് മുഖത്ത് തിളക്കം കിട്ടാന്‍ വീട്ടില്‍ തന്നെ ചെയ്യാന്‍ കഴിയുന്ന ചില ഫേസ് പാക്കുകളിതാ.
തൈരും തേനും

മുഖത്തെ ഏത് പ്രശ്‌നത്തിനും പരിഹാരമാണ് തൈര് എന്ന് തന്നെ വേണമെങ്കില്‍ പറയാം. തൈരില്‍ അടങ്ങിയിരിക്കുന്ന പല ഘടകങ്ങളും മുഖത്തെ പാടുകളും കരിവാളിപ്പുമൊക്കെ മാറ്റാന്‍ സഹായിക്കും. തൈരിലും തേനിലും അടങ്ങിയിരിക്കുന്ന എക്‌സഫോളിയേറ്റിങ് ഘടകങ്ങള്‍ മുഖത്ത് സൂര്യപ്രകാശമേറ്റ് ഉണ്ടാകുന്ന ടാനുകള്‍ മാറ്റാന്‍ സഹായിക്കും. ഈ പ്രകൃതിദത്ത അമൃതം ചര്‍മ്മത്തിലെ ബാക്ടീരിയകളെ സന്തുലിതമാക്കുകയും ചര്‍മ്മകോശങ്ങളുടെ പുനരുജ്ജീവനത്തെ ഉത്തേജിപ്പിക്കുകയും ചെയ്യുന്നു. മുഖത്തെ എല്ലാ ഭാഗത്തും ഒരേ നിറം നല്‍കാനും ഈ പാക്ക് സഹായിക്കും.

പാക്ക് തയാറാക്കുന്ന വിധം

ഒരേ അളവില്‍ തൈരും തേനും എടുക്കുക. ഇത് രണ്ടും യോജിപ്പിച്ച ശേഷം ഈ മാസ്‌ക് മുഖത്തിട്ട് 1 മണിക്കൂര്‍ വയ്ക്കാം. അതിന് ശേഷം വെള്ളം ഉപയോഗിച്ച് കഴുകി കളയാവുന്നതാണ്.

പഞ്ചസാര പാനിയും ബട്ടര്‍ മില്‍ക്കും
പ്രമേഹം കൂടാനുള്ള ഒരു പ്രധാന കാരണമാണ് പഞ്ചസാര. ആരോഗ്യത്തിന് ഹാനികരമായ പഞ്ചസാര പക്ഷെ സൗന്ദര്യ സംരക്ഷണത്തിന് ഏറെ മികച്ചതാണ്. പഞ്ചസാര സ്‌ക്രബ് അല്ലെങ്കില്‍ പഞ്ചസാര ഫേസ് പാക്കുകളൊക്കെ മുഖത്തിന് നല്ലതാണ്. ചര്‍മ്മത്തിന്റെ ഉപരിതലത്തിലോ സുഷിരങ്ങളിലോ ഉള്ള മാലിന്യങ്ങളെ ശുദ്ധീകരിക്കാന്‍ ബട്ടര്‍ മില്‍ക്ക് സഹായിക്കുന്നു. ചര്‍മ്മത്തിലെ മൃതകോശങ്ങള്‍ നീക്കം ചെയ്യാനും ബാക്ടീരിയയുടെ വളര്‍ച്ച തടയാനും ഇത് സഹായിക്കുന്നു. ബട്ടര്‍ മില്‍ക്കില്‍ അടങ്ങിയിരിക്കുന്ന ലാക്റ്റിക് ആസിഡ് ചര്‍മ്മത്തെ ആഴത്തില്‍ ശുദ്ധീകരിക്കുകയും പോഷിപ്പിക്കുകയും ചെയ്യുന്നു. കൂടാതെ സ്വാഭാവിക തിളക്കവും ലഭിക്കും.

പാക്ക് തയാറാക്കാന്‍

ഈ പാക്ക് തയാറാക്കാന്‍ കുറച്ച് പഞ്ചസാര വെള്ളത്തില്‍ അലിയിച്ച് പാനീയാക്കി എടുക്കാം. ഇതിലേക്ക് അല്‍പ്പം ബട്ടര്‍ മില്‍ക്കും ചേര്‍ത്ത് മുഖത്ത് പുരട്ടാം. 10 മിനിറ്റിന് ശേഷം വെള്ളം ഉപയോഗിച്ച് കഴുകി കളയാവുന്നതാണ്.

പപ്പായയും കറ്റാര്‍ വാഴയും

ചര്‍മ സംരക്ഷണത്തില്‍ പപ്പായ്ക്കുള്ള പങ്ക് വളരെ വലുതാണെന്ന് എല്ലാവര്‍ക്കുമറിയാം. ചര്‍മ്മത്തിന് വേഗത്തില്‍ മൃദുത്വം നല്‍കാനും ചര്‍മ്മത്തെ പുനരുജ്ജീവിപ്പിക്കാനും പപ്പായ്ക്ക് കഴിയും. ചര്‍മ്മത്തിലെ പാടുകളും പിഗ്നമെന്റേഷനും ഇല്ലാതാക്കാന്‍ ഇത് സഹായിക്കും. കൂടാതെ നിര്‍ജ്ജീവമായ മൃതകോശങ്ങളെ ഇല്ലാതാക്കാന്‍ സഹായിക്കുന്ന ഒരു മികച്ച എക്‌സ്‌ഫോളിയേറ്റര്‍ കൂടിയാണ് പപ്പായ. കറ്റാര്‍ വാഴയില്‍ അടങ്ങിയിരിക്കുന്ന ആന്റി ഓക്‌സിഡന്റ് ഘടകങ്ങള്‍ ചര്‍മ്മത്തിലെ മുറിവുകളും ടാനിനെയും ഇല്ലാതാക്കി മൃദുത്വം നല്‍കുന്നു. കൂടാതെ ചര്‍മ്മത്തിലെ ഈര്‍പ്പവും പുതുമയും നിലനിര്‍ത്താന്‍ സഹായിക്കും.

പാക്ക് തയാറാക്കുന്ന വിധം

അര ടീസ്പൂണ്‍ കറ്റാര്‍ വാഴ എടുത്ത് അര കപ്പ് ഉടച്ചെടുത്ത പപ്പായയുമായി യോജിപ്പിക്കുക. കൂടാതെ തണുപ്പും ഉടനടി തിളക്കവും നല്‍കാന്‍ ഇതിലേക്ക് അല്‍പ്പം ചന്ദന പൊടിയും ചേര്‍ക്കാവുന്നതാണ്. ഇത് നിങ്ങളുടെ മുഖത്ത് പുരട്ടി 20 മിനിറ്റ് ശേഷം ചെറു ചൂടുള്ള വെള്ളത്തില്‍ കഴുകി കളയാം.

തൈരും കടലമാവും

സൗന്ദര്യ സംരക്ഷണത്തില്‍ കടലമാവിനുള്ള പങ്ക് വളരെ വലുതാണ്. വെയില്‍ കൊണ്ട് കരിവാളിച്ച ചര്‍മ്മത്തിന് തിളക്കവും പുതുമയും നല്‍കാന്‍ കടലമാവിന് സാധിക്കും.കൂടാതെ ചര്‍മത്തിന്റെ നിറം വര്‍ധിപ്പിക്കാനും കടലമാവിന് കഴിയും.

പാക്ക് തയാറാക്കുന്ന വിധം

തുല്യ അളവില്‍ കടലമാവും തൈരും എടുക്കുക. ഇതിന് ശേഷം ഇത് നന്നായി യോജിപ്പിക്കുക. പേസ്റ്റ് രൂപത്തിലായ ഈ മിശ്രിതം മുഖത്ത് പുരട്ടാം. ഇതിന് ശേഷം ഉണങ്ങുമ്പോള്‍ ഇളം ചൂട് വെള്ളത്തില്‍ കഴുകി കളയാവുന്നതാണ്.