പൊണ്ണത്തടിക്ക് പരിഹാരം അറിയാം ചികിത്സാ വിധികള്‍

ഇന്ന്  ലോക ഒബീസിറ്റി (പൊണ്ണത്തടി) ദിനം. ഒട്ടുമിക്കവരിലും പൊണ്ണത്തടി ഇന്ന് വളരെ ചെറുപ്പത്തില്‍ തന്നെ കണ്ടുവരുന്നു.  ഭക്ഷണം നിയന്ത്രിച്ചിട്ടും വ്യായാമം ചെയ്തിട്ടും വണ്ണം കുറയാതെ വരുക കൂടി ചെയ്യുന്നതോടെ പലരിലും വിഷാദ രോഗം ഉള്‍പ്പെടെ കണ്ടുവരുന്നുണ്ട്. എന്നാല്‍ ശാസ്ത്രീയമായ ചികിത്സകളിലൂടെ വളരെ ലളിതമായി പൊണ്ണത്തടി കുറക്കാനുള്ള മാര്‍ഗങ്ങള്‍ ഇന്ന് നിലവിലുണ്ട്.

ഓഫീസ് ജോലികളും  അധികം ആയാസമില്ലാതെ ഇരുന്നു കൊണ്ടുള്ള ജോലിയായ ഐ.ടി. മേഖല പോലെയുള്ള ഡെസ്‌ക് ജോലികള്‍ ആണ് കൂടുതല്‍ പേരും ചെയ്യുന്നത്. മതിയായ രീതിയില്‍ ശാരീരിക പ്രവര്‍ത്തനങ്ങളില്‍ ഏര്‍പ്പെടാത്തത് കൊണ്ട് തന്നെ കൊഴുപ്പ് അടിഞ്ഞ് കൂടാനും വണ്ണം വെക്കാനും ഇത് കാരണമാകുന്നുണ്ട്. ഇതോടൊപ്പം ജനിതക കാരണങ്ങളും ആരോഗ്യകരമല്ലാത്ത ഭക്ഷണരീതിയും മതിയായ ഉറക്കമില്ലായ്മയുമെല്ലാം പൊണ്ണത്തടിക്ക് കാരണമായേക്കാം. സ്ത്രീകളില്‍ ഹോര്‍മോണ്‍ വ്യതിയാനങ്ങളും അമിതവണ്ണത്തിനു  കാരണമാകാറുണ്ട്.
 
ബോഡി മാസ് ഇന്റക്‌സ്

ശരീരത്തിലെ കൊഴുപ്പിന്റെ അളവ് കണക്കാക്കുന്നതിനുള്ള മാര്‍ഗമാണ് ബോഡി മാസ് ഇന്റക്‌സ് (ബി.എം.ഐ). കിലോഗ്രാമിലുള്ള ഭാരവും മീറ്ററിലുളള ഉയരവും തമ്മിലുള്ള അനുപാതത്തെ അടിസ്ഥാനമാക്കിയാണ് ബി.എം.ഐ കണ്ടെത്തുന്നത്. ഒരു വ്യക്തിക്ക് അപകടകരമായ രീതിയില്‍ അമിത വണ്ണമുണ്ടോ എന്നും മികച്ച ചികിത്സ തിരഞ്ഞെടുക്കുന്നതും ബി.എം.ഐയുടെ അടിസ്ഥാനത്തിലാണ്.  18.5 മുതല്‍ 24.5 ആരോഗ്യകരമായ  ബി.എം.ഐ.

വണ്ണം കുറയ്ക്കാന്‍ ശസ്ത്രക്രിയ

ജീവിതശൈലീ മാറ്റങ്ങള്‍, ആരോഗ്യകരമായ ഭക്ഷണക്രമം, വ്യായാമം, നല്ല ഉറക്കം തുടങ്ങിയവയിലൂടെ മരുന്നോ ശസ്ത്രക്രിയയോ ഇല്ലാതെ തന്നെ അമിത വണ്ണം പരിഹരിക്കാം എന്നാല്‍ ജീവിതശൈലിയില്‍ കൊണ്ടുവരുന്ന മാറ്റങ്ങള്‍ വഴി   ശരീരഭാരം കുറയ്ക്കാന്‍ കഴിഞ്ഞില്ലെങ്കില്‍, ബാരിയാട്രിക് ശസ്ത്രക്രിയ രീതികള്‍ വേണ്ടി വരും.

ബാരിയാട്രിക് ശസ്ത്രക്രിയ

ബി.എം.ഐ 35നും 45നും ഇടയിലുളളവര്‍ക്ക് അമിത വണ്ണം മൂലമുണ്ടാകുന്ന ആരോഗ്യ പ്രശ്‌നങ്ങള്‍ക്ക് ശസ്ത്രക്രിയയാണ് ഉചിതം. 40ന് മുകളിലായാല്‍ ബാരിയാട്രിക് ശസ്ത്രക്രിയ കൂടാതെ പൊണ്ണത്തടി കുറക്കാന്‍ സാധിക്കില്ല എന്നാണ് പഠനങ്ങള്‍ വ്യക്തമാക്കുന്നത്.

പൊണ്ണത്തടിക്കുള്ള ഏറ്റവും ഫലപ്രദമായ ചികിത്സയാണ് ബാരിയാട്രിക് ശസ്ത്രക്രിയകള്‍. ബി.എം.ഐയുടെയും മറ്റേതെങ്കിലും ആരോഗ്യ പ്രശ്‌നങ്ങള്‍ ഉണ്ടെങ്കില്‍ അതിന്റെയും അടിസ്ഥാനത്തിലാണ് ഏത് വേണമെന്ന് തിരഞ്ഞെടുക്കുന്നത്. ഭക്ഷണത്തിന്റെ അളവ് കുറക്കുക, ദഹനത്തിലൂടെയുള്ള ഭക്ഷണത്തിന്റെ ആഗിരണം കുറക്കുക എന്നിവയാണ്  ശസ്ത്രക്രിയയിലൂടെ ചെയ്യുന്നത്.

സ്ലീവ് ഗ്യാസ്ട്രക്ടമി, ഗ്യാസ്ട്രിക് ബൈപാസ് എന്നിവയാണ് പ്രധാനപ്പെട്ട ശസ്ത്രക്രിയകള്‍. താക്കോല്‍ദ്വാര ശസ്ത്രക്രിയയിലൂടെ ആമാശയത്തിന്റെ വലിപ്പം കുറക്കുകയാണ് ചെയ്യുന്നത്.
പൊണ്ണത്തടിക്ക് ശാശ്വതമായ പരിഹാരം നേടാം എന്നതിനൊപ്പം നിരവധി ആരോഗ്യ പ്രശ്‌നങ്ങള്‍ക്ക് കൂടി പരിഹാരം ലഭിക്കുമെന്നതാണ് ബാരിയാട്രിക് ശസ്ത്രക്രിയകളുടെ സവിശേഷത. ശസ്ത്രക്രിയ  കഴിഞ്ഞ് ഒന്നര വര്‍ഷത്തിനുള്ളില്‍ ആരോഗ്യപരമായ വണ്ണത്തിന് (ഐഡിയല്‍ വെയ്റ്റ്) അടുത്തെത്താന്‍ കഴിയും.

ശസ്ത്രക്രിയയ്ക്ക് ശേഷം

ശസ്ത്രക്രിയയ്ക്ക് ശേഷം ഫലം ലഭിക്കണമെങ്കില്‍ രോഗിയുടെ സഹകരണം കൂടി അത്യാവശ്യമാണ്.  ജീവിതശൈലിയില്‍ മാറ്റം കൊണ്ടുവരികയും ആരോഗ്യകരമായ ഭക്ഷണ ശീലം തുടര്‍ന്നു കൊണ്ടുപോവുകയും വേണം. കൃത്യമായ വ്യായാമവും  അനിവാര്യമാണ്. വര്‍ഷത്തിലൊരിക്കലെങ്കിലും ശരീരപരിശോധനകള്‍ നടത്തണം. മേല്‍പ്പറഞ്ഞ ശീലങ്ങള്‍ പാലിക്കാതെ വന്നാല്‍ ഭാവിയില്‍ വീണ്ടും പൊണ്ണത്തടി ഉണ്ടാകാനുള്ള സാധ്യത  കൂടുതലാണ്.

തയ്യാറാക്കിയത്: ഡോ. ദീപക് വര്‍മ്മ, സീനിയര്‍ കണ്‍സള്‍ട്ടന്റ് , സര്‍ജിക്കല്‍ ഗ്യാസ്ട്രോഎന്ററോളജി, ആസ്റ്റര്‍ മെഡ്‌സിറ്റി , കൊച്ചി