ഷാജി തിരിച്ചെത്തി; ജയിലിലായ സങ്കടം കെട്ടിപ്പിടിച്ച് പൊട്ടിക്കരഞ്ഞ് തീര്‍ത്ത് ആര്യ

ബിഗ്‌ബോസ് മലയാളം ഒന്നാം സീസണില്‍ നിന്നും ഏറെ വ്യത്യസ്തതകളാണ് രണ്ടാം സീസണുളളത്. മോഹന്‍ലാല്‍ അവതാരകനായി എത്തിയ ആദ്യ സീസണ്‍ കരുത്തുറ്റ മത്സരാര്‍ത്ഥികള്‍ ഉളളത് കൊണ്ടു തന്നെ തുടക്കത്തില്‍ തന്നെ ശ്രദ്ധിക്കപ്പെടുകയായിരുന്നു. എന്നാല്‍ ഇത്തവണ ദിവസങ്ങള്‍ പിന്നിട്ടപ്പോള്‍ ആരോഗ്യപ്രശ്‌നങ്ങള്‍ കാരണം മത്സരാര്‍ത്ഥികള്‍ പുറത്തേക്ക് പോയത് ഷോ വിരസമാക്കിയിരുന്നു. എന്നാല്‍ കഴിഞ്ഞ ദിവസം ആരോഗ്യ പ്രശ്നത്തെത്തുടര്‍ന്ന് ഹൗസിന് പുറത്തേക്ക് പോയ ഷാജി ഇപ്പോള്‍ തിരിച്ചെത്തിയിരിക്കയാണ്.
  
ബിഗബോസ് മലയാളം രണ്ടാം സീസണ്‍ അപ്രതീക്ഷിത സംഭവങ്ങളും ട്വിസ്റ്റുകളുമായി മുന്നേറുകയാണ്. തുടക്കത്തില്‍ ഷോയോട് ഉണ്ടായിരുന്ന വിരസത സിംഗര്‍ സിസ്റ്റേഴ്സ് ആയ അമൃത-അഭിരാമി എന്നിവര്‍ എത്തിയതോടെ മാറിയിരുന്നു. ഇത്തവണത്തെ ബിഗ്ബോസിനെ മൊത്തത്തില്‍ ബാധിച്ചത് കണ്ണിനസുഖമാണ്. കണ്ണിന് ബാധിച്ച ഇന്‍ഫെക്ഷന്‍ കാരണം നിരവധി പേരെയാണ് ഹൗസില്‍ നിന്നും മാറ്റിപ്പാര്‍പ്പിച്ചത്. ബിഗ്ബോസിന്റെ അന്‍പതാം എപ്പിസോഡില്‍ കണ്ണിനസുഖം ബാധിച്ച് ഹൗസില്‍ നിന്നും പോയ സുജോ അലസാന്‍ഡ്ര, രഘു എന്നിവര്‍ മടങ്ങിയെത്തിയിരുന്നു. എന്നാല്‍ രേഷ്മ, എലീന, ദയ എന്നിവരെ ഇപ്പോഴും ഹൗസില്‍ തിരിച്ചെത്തിച്ചിട്ടില്ല. ഇവരൊക്കെ അസുഖം കാരണം ഇപ്പോഴും പുറത്താണ്. കണ്ണിനസുഖം വന്ന് ഭേദമായി തിരിച്ചെത്തിയ പവന്‍ ജിനോ തോമസ് നടുവിന് വേദനയെത്തുടര്‍ന്ന് ബിഗ് ബോസിനോട് ആവശ്യപ്പെട്ട് പുറത്ത് പോവുകയും ചെയ്തു.

ഇന്നലെ പാഷാണം ഷാജിയും ആരോഗ്യപ്രശ്‌നം ചൂണ്ടിക്കാട്ടി ബിഗ് ബോസിനോട് ചികിത്സ ആവശ്യപ്പെട്ടിരുന്നു സീസണ്‍ രണ്ടില്‍ ഏറ്റവുമധികം തവണ ക്യാപ്റ്റനായ പാഷാണം ഷാജിയാണ് തനിക്കുള്ള ആരോഗ്യപ്രശ്‌നം ബിഗ് ബോസിനോട് പറഞ്ഞത്. തുടര്‍ന്ന് ബിഗ് ബോസ് വിദഗ്ധ ചികിത്സയ്ക്കായി ഷാജിയെ ഹൗസില്‍നിന്ന് മാറ്റുകയും ചെയ്തു. തനിക്കുള്ള ആരോഗ്യപരമായ പ്രശ്‌നത്തെക്കുറിച്ച് 'വയ്യായ്ക' ഉണ്ടെന്നായിരുന്നു ഷാജിയുടെ വാക്കുകള്‍. പിന്നാലെ ബിഗ് ബോസ് ഷാജിയെ കണ്‍ഫെഷന്‍ മുറിയിലേക്ക് രണ്ട് തവണ വിളിപ്പിച്ചു. രണ്ടാമത്തെ തവണ അദ്ദേഹത്തെ പുറത്തേക്ക് വിദഗ്ധ ചികിത്സയ്ക്ക് കൂട്ടിക്കൊണ്ടുപോകാന്‍ അവിടെ ആളുമുണ്ടായിരുന്നു. വന്നയാള്‍ക്കൊപ്പം ഷാജി പോവുകയായിരുന്നു.

പിന്നാലെ മത്സരാര്‍ഥികളോട് ഹാളില്‍ ഒത്തുകൂടാന്‍ ആവശ്യപ്പെട്ട ബിഗ് ബോസ് ഇക്കാര്യം അനൗണ്‍സ് ചെയ്യുകയും ചെയ്തു. 'ഷാജിയെ ചില ആരോഗ്യപ്രശ്‌നങ്ങളെത്തുടര്‍ന്ന് ഈ ബിഗ് ബോസ് വീട്ടില്‍നിന്ന് തല്‍ക്കാലം മാറ്റിനിര്‍ത്തിയിരിക്കുകയാണ്. അസുഖം ഭേദമായാലുടന്‍ ഷാജി ഇവിടെ തിരിച്ചെത്തുന്നതായിരിക്കും', ബിഗ് ബോസ് മറ്റ് മത്സരാര്‍ഥികളോട് പറഞ്ഞു. വാര്‍ത്ത മിക്കവര്‍ക്കും അപ്രതീക്ഷിതമായിരുന്നുവെങ്കില്‍ ആര്യയാണ് ഇതിനോട് ഏറ്റവും വൈകാരികമായി പ്രതികരിച്ചത്. ശബ്ദമടക്കി കരയുന്ന ആര്യയെ അവിടെ കാണാമായിരുന്നു. എന്നാലിപ്പോള്‍ ഹൗസിലേക്ക് ഷാജി തിരിച്ചെത്തിയതിന്റെ പ്രൊമോ എത്തിയിരിക്കയാണ്. സ്‌റ്റോര്‍ റൂമില്‍ എത്തിയ ഷാജിയെ ആദ്യം വീണയാണ് കാണുന്നത്. പിന്നാലെ ആര്യയും എത്തി ഷാജിയെ കെട്ടിപ്പിടിച്ച് പൊട്ടിക്കരയുകയായിരുന്നു. ബിഗ്ബോസിലെ സ്ത്രീ മത്സരാര്‍ത്ഥികളില്‍ ഏറ്റവംു കരുത്തയായ ആര്യ ഇങ്ങനെ പൊട്ടിക്കരയുന്നത് കണ്ട് പ്രേക്ഷകര്‍ അമ്പരപ്പിലാണ്. ഇത്രയും സമയം അകത്ത് വച്ചിരുന്നതെല്ലാം കൂടി പുറത്ത് വന്നതാണെന്നും ആര്യ പറയുന്നുണ്ട്. ആര്യ വീണ ഷാജി എന്നിവരാണ് ബിഗ്ബോസിലെ കരുത്തുറ്റ ടീം. ഇവര്‍ ഒരുമിച്ചാണ് ഗെയിം പ്ലാന്‍ ചെയ്യുന്നതും. കൂട്ടത്തില്‍ ഒരാള്‍ പോയപ്പോള്‍ ഉളള ഒറ്റപ്പെടലാണ് ആര്യയ്ക്ക്. എന്നാല്‍ ഷാജിയെ പുറത്തുളള വിവരങ്ങള്‍ അറിയിക്കാനും മത്സരത്തെക്കുറിച്ച് സൂചനകള്‍ നല്‍കാനുമാണ് പുറത്ത് കൊണ്ടുപോയതെന്നും ബിഗ്ബോസ് പ്രേക്ഷകര്‍ പറയുന്നുണ്ട്.