മുടിയില്‍ ഒന്ന് തൊട്ടാല്‍ മതി; കയ്യിലേക്ക് കൊഴിഞ്ഞു വീഴുന്നു;രേണുവിന്റെ മുടി പോയിത്തുടങ്ങി; കാന്‍സര്‍ ഇല്ല, എല്ലാം അഭിനയം എന്ന് പറയുന്നവര്‍ക്ക് മുടി കൊഴിയുന്നത് ലൈവ് ആയി കാണിച്ച് രേണു സുധി; മോനെ വെച്ച് ആരും റീച്ച് ഉണ്ടാക്കാന്‍ വരണ്ടെന്നും മരണം വരെ റിഥപ്പന്‍ എന്റേതുമാത്രമെന്നും കുറിച്ച് രേണു

കാന്‍സര്‍ രോഗ ബാധിതയായ രേണു സുധിയ്ക്ക് കീമോ ചികിത്സ ആരംഭിച്ചതിനു പിന്നാലെ അതിന്റെ പരിണിത ഫലങ്ങള്‍ ശരീരത്തില്‍ പ്രകടമായി തുടങ്ങിയിരിക്കുകയാണ്. ചികിത്സയുടെ വേദനകളിലൂടെ കടന്നു പോകുമ്പോഴും രേണുവിനെ മാനസികമായി വേദനിപ്പിക്കുന്ന പ്രചരണങ്ങളും ആരോപണങ്ങളുമാണ് പലരും ഇപ്പോഴും സോഷ്യല്‍ മീഡിയയിലൂടെ നടത്തിക്കൊണ്ടിരിക്കുന്നത്. ഇപ്പോഴിതാ, രേണുവിന് കാന്‍സര്‍ ബാധിച്ചിട്ടില്ലെന്നും സഹതാപവും ലൈക്കുകളും നേടിയെടുക്കാനുള്ള വെറും 'അഭിനയം' മാത്രമാണിതെന്നു പറഞ്ഞ് വേദനിപ്പിച്ചവര്‍ക്ക് മുന്നില്‍ കണ്ണീരോടെ, തലയില്‍ നിന്നും മുടി കൊഴിയുന്ന ദൃശ്യങ്ങള്‍ ലൈവായി കാണിച്ചിരിക്കുകയാണ് രേണു.

''എനിക്ക് കാന്‍സര്‍ ഇല്ല എന്ന് പറയുന്നവരോട്... അതെ, എന്റെ മനസ്സിന് കാന്‍സര്‍ ഇല്ല, പക്ഷേ ശരീരത്തിന്... നിങ്ങളുടെ കുത്തുവാക്കുകളെക്കാള്‍ വലിയൊരു കാന്‍സറല്ല എന്റെ ശരീരത്തെ പിടികൂടിയിരിക്കുന്നത്. മുടിയില്‍ ഒന്ന് തൊട്ടാല്‍ മതി, അത് കയ്യിലേക്ക് കൊഴിഞ്ഞുവീഴുകയാണ്.'' എന്ന് രേണു വേദനയോടെ വീഡിയോയില്‍ വ്യക്തമാക്കുന്നു. കഠിനമായ വേദനകള്‍ക്കിടയിലും തന്നെ പിന്തുണയ്ക്കുന്ന പ്രേക്ഷകരുടെ പ്രാര്‍ത്ഥനകള്‍ മാത്രമാണ് മുന്നോട്ടുള്ള കരുത്തെന്നും വ്യാജ പ്രചാരണങ്ങള്‍ നടത്തി തന്നെ ഇനിയും ദ്രോഹിക്കരുതെന്നും രേണു സുധി വിഡിയോയിലൂടെ അഭ്യര്‍ഥിക്കുന്നുണ്ട്.

അന്തരിച്ച നടന്‍ സുധിയുടെ ആദ്യ വിവാഹത്തിലെ മകന്‍ കിച്ചു തന്നോട് കാണിക്കുന്ന അകല്‍ച്ചയെക്കുറിച്ച് രേണു കഴിഞ്ഞ ദിവസം പങ്കുവെച്ച വീഡിയോയാണ് വിവാദങ്ങള്‍ക്ക് വഴിവെച്ചത്. കിച്ചുവിന്റെ പ്രതികരണത്തിന് പിന്നാലെ രേണുവും അല്‍പം രോഷത്തോടെ രംഗത്തെത്തിയിരുന്നു. ഈ വിഡിയോകള്‍ സോഷ്യല്‍ മീഡിയയില്‍ വൈറലായതിന് പിന്നാലെയാണ് രേണുവിനെ വ്യക്തിഹത്യ ചെയ്യുന്ന തരത്തിലുള്ള സൈബര്‍ ആക്രമണങ്ങള്‍ ചിലര്‍ അഴിച്ചുവിട്ടത്. ''നഷ്ടപ്പെട്ട ഓര്‍മ്മയും ശബ്ദവും ആരോഗ്യവും നിമിഷനേരം കൊണ്ട് തിരിച്ചു കിട്ടി'', ''മികച്ച അഭിനയം'', ''സഹതാപം പിടിച്ചുപറ്റാനുള്ള നാടകം'' തുടങ്ങിയ ക്രൂരമായ കമന്റുകളാണ് വിഡിയോയ്ക്ക് താഴെ പ്രത്യക്ഷപ്പെട്ടത്. ഈ അധിക്ഷേപങ്ങള്‍ അതിരുവിട്ടതോടെയാണ് ഇന്‍സ്റ്റാഗ്രാമിലൂടെ കടുത്ത ഭാഷയില്‍ രേണുവിന് പ്രതികരിക്കേണ്ടി വന്നത്.

സുധി തന്റെ മകനെ എടുത്തു കൊണ്ട് നില്‍ക്കുന്ന ഒരു ഫോട്ടോയും സോഷ്യല്‍ മീഡിയയില്‍ രേണു പങ്കിട്ടു്. എന്റെ മോനാണ് ...റിതപ്പന്‍ മോന്റെ ആവശ്യം അമ്മയ്ക്ക് മാത്രമായിരിക്കും. എന്റെ മരണം വരെ എന്റെ റിഥപ്പനെ ആര്‍ക്കും വിട്ടുകൊടുക്കില്ല. അവന്‍ എന്റേത് മാത്രമായിരിക്കും എന്റെ മരണം വരെ. അവന്റെ പേരില്‍ ആരും റീച്ച് ഉണ്ടാക്കാനോ സെന്റിമെന്റല്‍ ഗെയിം വര്‍ക്ക്ഔട്ട് ചെയ്യാനോ ഇങ്ങോട്ട് വരണ്ട. തരില്ല എന്റെ മോനേ എന്നും സോഷ്യല്‍ മീഡിയയില്‍ കുറിച്ചു.എന്നാല്‍ ഇത് ആര്‍ക്കുള്ള മറുപടിയാണെന്നാണ് സോഷ്യല്‍ മീഡിയ അന്വേഷിച്ചു കൊണ്ടിരിക്കുന്നത്. കിച്ചുവിനെതിരെയാണ് പോസ്റ്റ് എന്നാണ് ഒരുപറ്റം ആളുകളുടെ അനുമാനം

കാന്‍സര്‍ രോഗബാധയെത്തുടര്‍ന്ന് നിലവില്‍ കടുത്ത ആരോഗ്യപ്രശ്‌നങ്ങളിലൂടെയും കഠിനമായ ചികിത്സയിലൂടെയുമാണ് താന്‍ കടന്നുപോകുന്നതെന്ന് രേണു നേരത്തെ തന്നെ വ്യക്തമാക്കിയിരുന്നു. കീമോതെറാപ്പിയുടെ ഭാഗമായി മുടി പൂര്‍ണ്ണമായും മുറിച്ചുമാറ്റിയ നിലയിലാണ് താരം ഇപ്പോള്‍ ഉള്ളത്. 'മുടി പോയതല്ല അവളുടെ സങ്കടം, ഇങ്ങനെയൊരു കോലത്തില്‍ കണ്ടാല്‍ എന്റെ മോന്‍ പേടിക്കുമോ എന്നത് മാത്രമാണ്...!' എന്ന് കുറിച്ചുകൊണ്ട് കഴിഞ്ഞ ദിവസങ്ങളില്‍ രേണുവിന്റെ സുഹൃത്തുക്കള്‍ പങ്കുവെച്ച വിഡിയോകള്‍ സോഷ്യല്‍ മീഡിയയില്‍ ഏറെ ചര്‍ച്ചയായിരുന്നു. രോഗത്തിന്റെ ശാരീരിക ബുദ്ധിമുട്ടുകള്‍ക്കൊപ്പം സോഷ്യല്‍ മീഡിയയിലെ കുറ്റപ്പെടുത്തലുകളും രേണുവിനെ തളര്‍ത്തുന്നുണ്ട്.

നേരത്തെ, സുധിയുടെ മകന്‍ കിച്ചു തന്നെ കാണാന്‍ എത്താതിരുന്നതിനെ പറ്റിയുള്ള വിവാദങ്ങളാണ് ഈ സൈബര്‍ ആക്രമണങ്ങള്‍ക്ക് തുടക്കമിട്ടത്. താന്‍ മരിച്ചാലും ശവം കാണാന്‍ കിച്ചു വരേണ്ടതില്ലെന്ന് രേണു രൂക്ഷമായി പ്രതികരിച്ചിരുന്നു. എന്നാല്‍ ഈ കുടുംബ പ്രശ്‌നങ്ങളെ മുന്‍നിര്‍ത്തി, ഒരു സ്ത്രീ നേരിടുന്ന കഠിനമായ രോഗാവസ്ഥയെപ്പോലും വ്യാജമാണെന്ന് വരുത്തിത്തീര്‍ക്കാന്‍ ശ്രമിച്ച സോഷ്യല്‍ മീഡിയയിലെ ഒരു വിഭാഗം ആളുകളുടെ ക്രൂരതയ്‌ക്കെതിരെ ഇപ്പോള്‍ വലിയ രീതിയിലുള്ള പ്രതിഷേധവും സോഷ്യല്‍ മീഡിയയില്‍ ഉയരുന്നുണ്ട്.