റിമി ടോമിക്കൊപ്പം പാട്ടുപാടിയും നൃത്തം ചെയ്തും സീതയിലെ ഇന്ദ്രനും ഭാഗ്യജാതകത്തിലെ അരുണും; ഒന്നും ഒന്നും മൂന്ന് വേദിയില്‍ ഷാനവാസും ഗിരീഷും എത്തിയപ്പോള്‍

മിനിസ്‌ക്രീന്‍ പ്രേക്ഷകരുടെ ഇഷ്ടപരിപാടിയാണ് ചാറ്റ് ഷോകള്‍. രസകരമായ അവതരണത്തിലൂടെയും ഗെയിമുകളിലൂടെയും പ്രസിദ്ധമാണ് മഴവില്‍മനോരമയിലെ ചാറ്റ് ഷോ ഒന്നും ഒന്നും മൂന്ന്. ഗായിക റിമി ടോമി അവതാരകയായി എത്തുന്ന പരിപാടിക്ക് ഏറെ ആരാധകരുണ്ട്. ഒന്നും ഒന്നും മൂന്നിലേക്ക് എത്തിയപ്പോള്‍ തന്നെ മികച്ച സ്വീകരണമാണ് റിമി ടോമിക്ക് ലഭിച്ചത്. പരിപാടിയിലേക്കെത്തുന്ന അതിഥികളോട് താരം ചോദിക്കുന്ന ചോദ്യങ്ങളും രസകരമായ ടാസ്്ക്കുകളുമൊക്കെ പ്രേക്ഷകര്‍ക്ക് പ്രിയങ്കരമാണ്. ഞായറായ്ചകളില്‍ സംപ്രേഷണം ചെയ്യുന്ന പരിപാടിയില്‍ ആരാകും അതിഥിയെന്നത് പ്രേക്ഷകര്‍ ഏറെ ആകാംഷയോടെയാണ് ഉറ്റുനോക്കുന്നത്. ഇന്നലത്തെ എപ്പിസോഡില്‍ സീത സീരിയലിലൂടെ പ്രേക്ഷകര്‍ക്ക് പരിചിതനായ ഷാനവാസും ഭാഗ്യജാതകത്തിലെ അഭിനയത്തിലൂടെ ശ്രദ്ധേയനായ ഗിരീഷ് നമ്പ്യാരുമാണ് റിമിയുടെ അതിഥികളായി എത്തിയത്.

സീത സീരിയലിലൂടെ മലയാളി പ്രേക്ഷകരുടെ മനസ്സില്‍ ഇടം നേടിയ നടനാണ് ഷാനവാസ്. സീരിയലിലെ നെഗറ്റീവ് കഥാപാത്രമായി എത്തിയ ഷാനവാസ് പിന്നീട് നായകനായി മാറുകയായിരുന്നു. വലിയ ഫാന്‍സ് പിന്തുണയാണ് സീരിയലിലെ ഷാനവാസിന്റെ കഥാപാത്രമായ ഇന്ദ്രനു ലഭിച്ചത്. എന്നാല്‍ സീരിയലില്‍ നിന്നും അപ്രതീക്ഷിത സമയത്ത് താരത്തെ മാറ്റുകയായിരുന്നു. ഒരു കാര്‍ അപകടം ഉണ്ടാക്കി ഇന്ദ്രന്‍ എന്ന കഥാപാത്രത്തെ കൊല്ലുകയായിരുന്നു. ഇതിനെതിരെ വലിയ പ്രതിഷേധമാണ് ആരാധകരുടെ ഭാഗത്തു നിന്നും ഉണ്ടായത്. ഭാഗ്യജാതകത്തിലെ അരുണ്‍ ഷേണായി എന്ന കഥാപാത്രത്തെ അവതരിപ്പിക്കുന്നത് ഗിരീഷ് നമ്പ്യാരാണ്. മുന്‍പ് പല സീരിയലുകളിലും മികച്ച കഥാപാത്രങ്ങളെ അവതരിപ്പിച്ചിട്ടുളള ഗീരിഷ്  ശ്രദ്ധിക്കപ്പെട്ടത് ഭാഗ്യജാതകത്തില്‍ നായകനായ ശേഷമാണ്. 

മിനിസ്‌ക്രീനിലെ നായകന്മാരായി തിളങ്ങുന്ന ഇരുവരും ഒന്നും ഒന്നും മൂന്ന് വേദിയില്‍ വിശേഷങ്ങള്‍ പങ്കുവയ്ക്കാനായി എത്തിയതാണ് ഇപ്പോള്‍ വൈറലാകുന്നത്. എപ്പിസോഡിന്റെ പ്രൊമോ എത്തിയതോടെ ആരാധകര്‍ ആകാംഷയിലായിരുന്നു. കറുപ്പും ചുവപ്പും വേഷത്തിലാണ് ഷാനുവും ഗിരീഷും ഷോയിലെത്തിയത്. ചാറ്റ്  ഷോയിലെ ഒരു ടാസ്‌കിന്റെ ഭാഗമാണ് ഇപ്പോള്‍ വൈറലാകുന്നത്. തക്കാളി  മുകളിലേക്കെറിഞ്ഞ് വാ കൊണ്ടു പിടിക്കുന്നതായിരുന്നു ടാസ്‌ക്. മത്സരത്തില്‍ ഷാനാവാസ് ആണ് വിജയിച്ചത്. പിന്നീട് കളളുകുടിക്കുന്നതു പോലെ അഭിനയിച്ചു കൊണ്ട് നാടന്‍പാട്ടു പാടുന്നതായിരുന്നു മത്സരം. ഗിരീഷും ഷാനവാസും റിമിയും ഒന്നിച്ചു കള്ളടിച്ച് പാട്ടുപാടുന്ന പോലെ അഭിനയിക്കുകയും ചെയ്തു. 

ഷാനവാസും ഗിരീഷും അവതാരക റിമിടോമിയോടൊപ്പം നൃത്തം ചെയ്യുന്നതും ഇരുവര്‍ക്കും ധാരാളം ആരാധികമാരുണ്ടെന്നും എന്താണ് അതിനു കാരണമെന്നുമൊക്കെ റിമി ചോദിക്കുന്നതുമൊക്കെ എപ്പിസോഡിലുണ്ട്. റിമിയോടൊപ്പം റൊമാന്‍സ് രംഗങ്ങളും ഇരുവരും അഭിനയിക്കുന്നുണ്ട്. എപ്പിസോഡില്‍ ഷാനവാസ് തന്റെ ജീവിതത്തിലെ പ്രതിസന്ധികളെക്കുറിച്ചും തുറന്നു പറയുന്നുണ്ട്. മലയാള സീരിയലിലെ പ്രേക്ഷകരുടെ പ്രിയപ്പെട്ട രണ്ട് യുവനായകന്മാരും ഒന്നിച്ച് എത്തിയതിന്റെ സന്തോഷത്തിലാണ് ആരാധകര്‍.