ട്രൈഗ്ലിസറൈഡ് അലട്ടുന്നുണ്ടോ? കുറയ്ക്കാം ഈസിയായി

കൊളസ്ട്രോള്‍ ടെസ്റ്റ് ചെയ്യുന്ന സമയത്ത് നാം ട്രൈഗ്ലിസറൈഡുകളുടെ അളവും കാണാറുണ്ട്. ഇത് വര്‍ദ്ധിയ്്ക്കുന്നത് ചീത്ത കൊളസ്ട്രോള്‍ ലക്ഷണമാണ്. അതായത് ഇത് കുറയ്ക്കുകയെന്നത് പ്രധാനം. രക്തത്തില്‍ കാണപ്പെടുന്ന ഒരിനം കൊഴുപ്പാണ് ട്രൈഗ്ലിസറൈഡ്. ശരീരത്തില്‍ ഉപയോഗിയ്ക്കപ്പെടാത്ത ഊര്‍ജമാണ് ഇതേ രൂപത്തില്‍ രക്തത്തില്‍ ശേഖരിയ്ക്കപ്പെടുന്നത്. ഈ കൊഴുപ്പ് കോശങ്ങളിലും രക്തക്കുഴലുകളിലും ശേഖരിയ്ക്കുമ്പോഴാണ് പല പ്രശ്നങ്ങളുമുണ്ടാകുന്നത്. ഇത് മെറ്റബോളിക് സിന്‍ഡ്രോം, അമിതവണ്ണം തുടങ്ങിയ പല പ്രശ്നങ്ങളുമുണ്ടാക്കാം. പാന്‍ക്രിയാസ് വീക്കം, പ്രഷര്‍, ഹാര്‍ട്ട് അറ്റാക്ക്, സ്ട്രോക്ക്, ഹൃദയസ്തംഭനം തുടങ്ങിയ പല പ്രശ്നങ്ങള്‍ക്കും ഇത് കാരണമാകുന്നു

സാധാരണ ഗതിയില്‍ ലിപിഡ് അളവ് 12 മണിക്കൂര്‍ ഫാസ്റ്റിംഗിന് ശേഷം ടെസ്റ്റ് ചെയ്യുമ്പോളാണ് കൃത്യമായി അളവ് ലഭിയ്ക്കുക. 20 വയസ് കഴിഞ്ഞവര്‍ 5 വര്‍ഷത്തിലും 40 വയസ് കഴിഞ്ഞാല്‍ വര്‍ഷത്തില്‍ ഒരിക്കലും ഈ ടെസ്റ്റ് ചെയ്യുക. കുടുംബചരിത്രവും ഹൃദയപ്രശ്നങ്ങളുമെല്ലാം ഉള്ളവരെങ്കില്‍ ആറുമാസത്തില്‍ ഒരിക്കല്‍ ഇത് ചെയ്യേണ്ടത് അത്യാവശ്യമാണ്. ഇതിന്റെ നോര്‍മല്‍ അളവ് 151-199 മില്ലീഗ്രാം ആണെങ്കില്‍ ഇത് ബോര്‍ഡര്‍ ലൈനിലാണ്. 200-500 വരെയെങ്കില്‍ ഇത് ഹൈ ആണ്. 500ല്‍ അധികമെങ്കില്‍ ഇത് വെരി ഹൈ എന്ന ലെവലില്‍ വരുന്നു. 150ഉം താഴെയുമാണ് ഇത് നോര്‍മല്‍. ഇത് മില്ലിമോള്‍സിലെങ്കില്‍ 1.8-2.6 വരെയാണ് ബോര്‍ഡര്‍ ലൈന്‍. 2.6-5.6 വരെ ഹൈ ആണ്. 5.6നേക്കാള്‍ വെരി ഹൈ ആണ്.

ആഹാരരീതിയിലും വ്യായാമത്തിലും വ്യത്യാസം വരുത്തിയാല്‍ ട്രൈഗ്ലിസറൈഡുകള്‍ കുറയ്ക്കാന്‍ സാധിയ്ക്കും. ട്രൈ ഗ്ലിസറൈഡുകള്‍ കൂടാന്‍ ചില പ്രധാന കാരണങ്ങളുണ്ട്. ഹൈപ്പോതൈറോയ്ഡുണ്ടെങ്കില്‍ ഇതിന് സാധ്യതയുണ്ട്. ടി3, ടി4 കൂടുതലാണെങ്കില്‍ ഇതേ പ്രശ്നമുണ്ടാകുന്നു. സ്റ്റിറോയ്ഡ് ഗുളികകള്‍, എയ്ഡ്സ് ഗുളികകള്‍, ഡൈയൂററ്റിക്സ് എന്നിവയെല്ലാം ഇത്തരം പ്രശ്നത്തിന് കാരണമാകുന്നു. മുഖത്ത് പുരട്ടുന്ന റെറ്റിനോയ്ഡ് ക്രീമുകള്‍, ബിപി കുറയ്ക്കാന്‍ ഉപയോഗിയ്ക്കുന്ന ബീറ്റാബ്ലോക്കറുകള്‍ എന്നിവയെല്ലാം ട്രൈ്ഗ്ലിസറൈഡുകള്‍ കൂടാന്‍ ഇടയാക്കും. ഇത് നിയന്ത്രിയ്ക്കാന്‍ നമുക്ക് ചെയ്യാവുന്ന ചിലതുണ്ട്.

നാം ഭക്ഷണത്തില്‍ നിയന്ത്രണം വയ്ക്കുക. എണ്ണ കുറച്ചതു കൊണ്ടുമാത്രം ഗുണം ലഭിയ്ക്കില്ല. ശരീരത്തിലേക്ക് കഴിയ്ക്കുന്ന ഊര്‍ജം എത്ര വേഗത്തിലാണ് എന്നത് പ്രധാനം. ഉദാഹരണത്തിന് മാങ്ങ ജ്യൂസടിച്ച് കുടിയ്ക്കുന്നതും മുറിച്ച് കഴിയ്ക്കുന്നതും പ്രധാനമാണ്. മുറിച്ച് കഴിയ്ക്കുന്നതാണ് നല്ലത്. ജ്യൂസ് പെട്ടെന്ന് തന്നെ ഊര്‍ജം വര്‍ദ്ധിപ്പിയ്ക്കും. ഇതുപോലെ അരി ട്രൈഗ്ലിസറൈഡുകള്‍ വര്‍ദ്ധിയ്ക്കാന്‍ പ്രധാന കാരണമാണ്. ഇത് കുറയ്ക്കുക. ചോറും ഇഡ്ഢലി, ദോശ പോലുള്ളവയുമെല്ലാം ഇതിനുളള പ്രധാന കാരണമാണ്. അരിയുടെ അളവ് കുറയ്ക്കുക എന്നത് ഏറെ പ്രധാനം.

വയറിന് ചുറ്റുമുള്ള കൊഴുപ്പ്

കലോറി കുറയ്ക്കുക. ഇത് ഏറെ പ്രധാനമാണ്. 100 ഗ്രാം പച്ചക്കറി കഴിച്ചാല്‍ 20 കലോറിയാണ്, ഇത്ര തന്നെ ഫ്രൂട്സ് കഴിയ്ക്കുമ്പോള്‍ 50 ആണ്, അതേ സമയം ഇത്ര തന്നെ അരി കഴിച്ചാല്‍ 200 കലോറിയാണ്. അതിന് അനുസരിച്ച് ഭക്ഷണം നിയന്ത്രിയ്ക്കണം. വയറിന് ചുറ്റുമുള്ള കൊഴുപ്പ് നിയന്ത്രിയ്ക്കുക. സ്ത്രീകളില്‍ ഇത് 80 സെന്റീമീറ്ററിലും പുരുഷന്മാരില്‍ 90 സെന്റീമീറ്ററില്‍ കൂടുതലും അരുത്. അത് അധികമായാല്‍ കലോറി കുറയ്ക്കുക, വ്യായാമം കൂട്ടുക. ഇത് ഊര്‍ജം പുറന്തള്ളാന്‍ സഹായിക്കും, ട്രൈഗ്ലിസറൈഡുകള്‍ കുറയുന്നു. ശരീരത്തിന്റെ 10 ശതമാനം വെയ്റ്റ് കുറയ്ക്കാന്‍ നോക്കുന്നത് നല്ലതാണ്. ഇതുപോലെ പഞ്ചസാര ഉപയോഗിയ്ക്കുന്നത് ദോഷമാണ്. ഇത് വെളുത്ത വിഷമാണ്. കഴിവതും കുറയ്ക്കുക. പഞ്ചസാരയേക്കാള്‍ അല്‍പം ഗുണം ശര്‍ക്കരയ്ക്കാണ്. ഇതുപോലെ കൃത്രിമമധുരം അടങ്ങിയ പാനീയങ്ങള്‍ കുടിയ്ക്കാതിരിയ്ക്കുക.

ഇതുപോലെ റിഫൈന്‍ഡ് കാര്‍ബോഹൈഡ്രേറ്റുകള്‍ കുറയ്ക്കുക. അതായത് തവിട് കളഞ്ഞവ കുറയ്ക്കുക. മൈദ പോലുളളവയും ബേക്കറി പലഹാരങ്ങളുമെല്ലാം നിയന്ത്രിയ്ക്കുക. കുട്ടികള്‍ക്ക് പോലും ഇത് നിയന്ത്രിയ്ക്കുക. അല്ലെങ്കില്‍ ഇവര്‍ 30കളില്‍ എത്തുമ്പോഴേയ്ക്കും ഇത്തരം രോഗങ്ങള്‍ വരാന്‍ സാധ്യതയേറെയാണ്. ഇതുപോലെ മദ്യപാനം ഒഴിവാക്കുക. ദിവസവും ഒരേ താളത്തില്‍, സമയത്ത് ഭക്ഷണം കഴിയ്ക്കുക. ഇതേ രീതി ദിവസവും പാലിയ്ക്കുക. വല്ലാതെ വൈകി കഴിയ്ക്കുന്നതും ഒഴിവാക്കുക. ചോക്ലേറ്റ്, ഐസ്‌ക്രീം പോലുള്ളവ അമിതമായി കഴിയ്ക്കരുത്.

രാത്രി എട്ട് മണിക്ക് ശേഷം ഭക്ഷണം കഴിയ്ക്കാതിരിയ്ക്കുക. ഇതിന് മുന്നേ തന്നെ കഴിയ്ക്കുകയെന്നത് പ്രധാനമാണ്. അതുപോലെ കുറച്ച് മാത്രം കഴിയ്ക്കുക. ട്രാന്‍സ്ഫാറ്റും ഒഴിവാക്കുക. ഫ്രഞ്ച് ഫ്രൈ, കേക്ക, ചിപ്സ് പോലുള്ളവ. സാച്വറേറ്റഡ് ഫാറ്റ് അടങ്ങിയ പോര്‍ക്ക്, മട്ടന്‍, ബീഫ്, ബേക്കറി, കേക്ക്, ഐസ്‌ക്രീം എന്നിവയും ഒഴിവാക്കുക. കഴിയ്ക്കേണ്ടവയുണ്ട്. മീന്‍ ഏറെ നല്ലതാണ്. കറിവച്ച് കഴിയ്ക്കുക. വറുത്താല്‍ വിപരീതഫലം ലഭിയ്ക്കും. ഫ്രൂട്സ് കഴിയ്ക്കുക. ഇതില്‍ മധുരം ചേര്‍ക്കരുത്, ജ്യൂസാക്കരുത്. ഇത് അതേ രീതിയില്‍ കഴിയ്ക്കുക. വല്ലപ്പോഴും ജ്യൂസാക്കി കഴിയ്ക്കുന്നത് കൊണ്ട് ദോഷമില്ല. പഞ്ചസാര ചേര്‍ക്കരുത്. പച്ചക്കറികള്‍ ധാരാളം കഴിയ്ക്കാം. ഇത് സാലഡാക്കി കഴിയ്ക്കുന്നത് ഏറെ നല്ലതാണ്. ഇലക്കറികള്‍ ഏറെ നല്ലതാണ്. നട്സ് ഏറെ നല്ലതാണ്. എന്നാല്‍ കശുവണ്ടി പോലുള്ളവയേക്കാള്‍ വാള്‍നട്സ്, ബദാം എന്നിവയാണ് നല്ലത്. സീഡുകള്‍ കഴിയ്ക്കാം. പംപ്കിന്‍ സീഡുകള്‍, സണ്‍ഫ്ളവര്‍ സീഡുകള്‍ എന്നിവ.

ഒലീവ് ഓയിലാണ് ഏറ്റവും നല്ലത്. ഇത് നല്ല കൊളസ്ട്രോള്‍ വര്‍ദ്ധിപ്പിയ്ക്കും. ട്രൈഗ്ലിസറൈഡുകള്‍ കുറയ്ക്കും. ഇത് സാലഡുകളില്‍ ഒഴിയ്ക്കാം. ബാക്കി പാചകത്തിന് വെളിച്ചെണ്ണ ഉപയോഗിയ്ക്കാം. ചീര, ലെറ്റൂസ് എന്നിവയെല്ലാം നല്ലതാണ്. ഒമേഗ 3 ഫാറ്റി ആസിഡ് സപ്ലിമെന്റുകള്‍ നല്ലതാണ്. നാരുകള്‍ അടങ്ങിയവ കഴിയ്ക്കാം. ദിവസവും ഇലക്കറികള്‍ കഴിച്ചാല്‍ അത്ര നല്ലതാണ്. ആഴ്ചയില്‍ മൂന്നുനാല് ദിവസമെങ്കിലും ഇത് കഴിയ്ക്കുന്നത് നല്ലതാണ്. ആരോഗ്യകരമായ ഫാററ് കഴിയ്ക്കുക. അവോക്കാഡോ, നട്സ്, ചിക്കന്‍ തൊലി കളഞ്ഞത് കറി വച്ചത് നല്ലതാണ്. ഓട്സ്, റാഗി എന്നിവയും നല്ലതാണ്. ഓട്സ് കാച്ചിക്കഴിച്ചാല്‍ ഗുണമില്ല. ഇത് ഉപ്പുമാവായോ പുട്ടായോ കഴിയ്ക്കാം. ഇത് പതിയെ ദഹിയ്ക്കാന്‍ സഹായിക്കുന്നു. അരി തവിടോടെയുള്ളത് കഴിയ്ക്കുക. ധാരാളം വെളളം കുടിയ്ക്കുക. ഇതുപോലെ നല്ലതുപോലെ വ്യായാമം ചെയ്യുക.