മീന്‍ കറിയില്ലാതെ എന്ത് ഊണ്; വെറൈറ്റി ഫിഷ് മസാല തയ്യാറാക്കുന്നത് എങ്ങനെയെന്ന് നോക്കാം

ചോറിനൊപ്പം മീന്‍കറി നിര്‍ബന്ധമുള്ളവരാണ് മലയാളികളില്‍ ഏറെയും. മീനിന് ആരാധകര്‍ ഏറെയുള്ളതിനാല്‍ തന്നെ മീന്‍ കൊണ്ട് പല വെറൈറ്റികളും പരീക്ഷിക്കാറുമുണ്ട്. മീന്‍ കൊണ്ടുള്ള ഒരു വിഭവം പരിചയപ്പെടാം. ഫിഷ് മസാല

ഫിഷ് മസാല തയ്യാറാക്കുന്നതിന് ആവശ്യമായ സാധനങ്ങള്‍

1. മീന്‍             - അരക്കിലോ
2. വറ്റല്‍മുളക്     - ആറ് 
   മഞ്ഞള്‍പ്പൊടി - അര ചെറിയ സ്പൂണ്‍
   ജീരകം         - കാല്‍ ചെറിയ സ്പൂണ്‍
   വെളുത്തുള്ളി  -  ആറ് അല്ലി
3. എണ്ണ           -  രണ്ട് വലിയ സ്പൂണ്‍
4. ചുവന്നുള്ളി    -   കാല്‍ കപ്പ്, അരച്ചത്
5. തേങ്ങ ചുരണ്ടിയത് - മുക്കാല്‍ കപ്പ്
6. വാളന്‍പുളി പിഴിഞ്ഞത്,ചെറുനാരങ്ങാനീര്, ഉപ്പ് - പാകത്തിന് 
7. പച്ചമുളക്      - ആറ്, അറ്റം പിളര്‍ന്നത്
   ഇഞ്ചി അരിഞ്ഞത് - അര ചെറിയ സ്പൂണ്‍ 
8. കറിവേപ്പില        - കുറച്ച്
9. ഉലുവ വറുത്ത് പൊടിച്ചത് - അര ചെറിയ സ്പൂണ്‍

തയ്യാറാക്കുന്ന വിധം

* മീന്‍ വൃത്തിയാക്കി കഷണങ്ങളാക്കി വയ്ക്കണം.
* രണ്ടാമത്തെ ചേരുവ മയത്തില്‍ അരച്ച് വയ്ക്കുക. അരപ്പ് വെള്ളം മാറ്റി വയ്ക്കണം.
* പാനില്‍ എണ്ണ ചൂടാക്കി ചുവന്നുള്ളി അരച്ചത് ചേര്‍ത്ത് നന്നായി വഴറ്റിയ ശേഷം വറ്റല്‍മുളക് അരച്ചത് ചേര്‍ത്ത് വീണ്ടും  നന്നായി വഴറ്റുക.
* ഇതിലേക്ക് തേങ്ങ അരച്ചത് ചേര്‍ത്ത് നന്നായി ഇളക്കുക .
* മൂത്ത മണം വരുമ്പോള്‍ അരപ്പ് വെള്ളം ചേര്‍ത്തിളക്കി പാകത്തിന് പുളിവെള്ളവും നാരങ്ങാനീരും ഉപ്പും       ചേര്‍ത്തിളക്കണം.
* ചാറു തിളയ്ക്കുമ്പോള്‍ മീന്‍ കഷണങ്ങളും പച്ചമുളകും ഇഞ്ചിയും ചേര്‍ത്തിളക്കുക.
* ഇതിലേക്ക് കറിവേപ്പിലയും ആവശ്യമെങ്കില്‍ വെള്ളവും ചേര്‍ത്ത് വേവിക്കുക.
* മീന്‍ വെന്ത് ചാറു കുറുകണം. ഇതിന് മുകളില്‍ വറുത്ത് പൊടിച്ച ഉലുവാപ്പൊടിയും വിതറി വിളമ്പാം.