വിനീതിന്റെ അടുത്ത ചിത്രത്തിലും പ്രണവ് നായകന്‍; തിരക്കഥ പൂര്‍ത്തിയായ ചിത്രം ഈ വര്‍ഷം അവസാനത്തോടെ ഷൂട്ടിങ് തുടങ്ങും; ചേട്ടന്റെ സിനിമയുടെ ഭാഗമാകാന്‍ തടി കുറക്കാനൊരുങ്ങി ധ്യാനും

ഹൃദയത്തിന് ശേഷം വിനീത് ശ്രീനിവാസനും പ്രണവ് മോഹന്‍ലാലും വീണ്ടും ഒന്നിക്കുമെന്ന് റിപ്പോര്‍ട്ടുകള്‍. പുതിയ ചിത്രത്തിന്റെ തിരക്കഥ പൂര്‍ത്തിയാചയെന്നും ഈ വര്‍ഷം പകുതിയോടെ സിനിമയുടെ ചിത്രീകരണം ആരംഭിക്കുമെന്നുമാണ് റിപ്പോര്‍ട്ട്.ചിത്രത്തില്‍ ധ്യാന്‍ ശ്രീനിവാസനും പ്രധാന വേഷത്തില്‍ എത്തുന്നു.

പോയവര്‍ഷം റിലീസ് ചെയ്ത ഹൃദയം സൂപ്പര്‍ ഹിറ്റായി മാറിയിട്ടും പ്രണവ് സിനിമകളില്‍ നിന്ന് ഇടവേള എടുത്ത് ഒറ്റയ്ക്കുള്ള യാത്രകളിലായിരുന്നു. നിരവധി ചിത്രങ്ങളിലേക്ക് പ്രണവിന്റെ പേര് ഉയര്‍ന്നു കേള്‍ക്കുകയും ചെയ്തു. ഹൃദയത്തിനുശേഷം വിനീത്- പ്രണവ് കൂട്ടുകെട്ട് ഒന്നിക്കുന്നതിന്റെ ആവേശത്തിലാണ് ആരാധകര്‍.

പ്രണവിനെ പോലെ ധ്യാനും ഇത് രണ്ടാം തവണയാണ് വിനീത് ശ്രീനിവാസന്‍ ചിത്രത്തില്‍ എത്തുന്നത്.വിനീത് ശ്രീനിവാസന്‍ സംവിധാനം ചെയ്ത തിര എന്ന ചിത്രത്തില്‍ നായകനായി അഭിനയിച്ചാണ് ധ്യാന്‍ വെള്ളിത്തിരയില്‍ എത്തുന്നത്. വിനീത് ശ്രീനിവാസന്‍, പ്രണവ് മോഹന്‍ലാല്‍ ചിത്രത്തിനുവേണ്ടി ധ്യാന്‍ ശരീരഭാരം കുറയ്ക്കാന്‍ ഒരുങ്ങുകയാണത്രേ.

പുതിയ ചിത്രത്തിന്റെ തിരക്കഥ വിനീത് പൂര്‍ത്തിയാക്കി എന്നാണ് വിവരം. ആഗസ്റ്റില്‍ ചിത്രീകരണം ആരംഭിക്കാനാണ് ഒരുങ്ങുന്നത്. ചിത്രത്തെക്കുറിച്ചുള്ള കൂടുതല്‍ വിവരങ്ങള്‍ അണിയറ പ്രവര്‍ത്തകര്‍ ഉടന്‍ പ്രഖ്യാപിക്കും