പ്രശസ്തമായ 'കോഫി വിത്ത് കരണ്‍' ചാറ്റ് ഷോയില്‍ മലയാളത്തിന്റെ സൂപ്പര്‍സ്റ്റാര്‍ മോഹന്‍ലാലിനെക്കുറിച്ച് നടത്തിയ പരാമര്‍ശങ്ങള്‍ തെലുങ്ക് താരങ്ങളായ വിജയ് ദേവരകൊണ്ടയ്ക്കും രശ്മിക മന്ദാനയ്ക്കുമെതിരെ വലിയ രീതിയിലുള്ള സൈബര്‍ ആക്രമണത്തിനും ആരാധകരുടെ കടുത്ത വിമര്‍ശനത്തിനും വഴിവെച്ചിരിക്കുന്നു. ഇന്ത്യന്‍ സിനിമയിലെ തന്നെ എക്കാലത്തെയും മികച്ച പ്രതിഭകളിലൊരാളായ മോഹന്‍ലാലിന്റെ ഔദ്യോഗിക വിശേഷണമായ 'ദി കംപ്ലീറ്റ് ആക്ടര്‍' എന്ന പേര് തിരിച്ചറിയാന്‍ കഴിയാതെപോയ ഇരുവരുടെയും പ്രതികരണമാണ് സോഷ്യല്‍ മീഡിയയെയും മോഹന്‍ലാല്‍ ആരാധകരെയും ഒരുപോലെ ചൊടിപ്പിച്ചത്.
ബോളിവുഡ് സംവിധായകന്‍ കരണ്‍ ജോഹര്‍ അവതാരകനായെത്തിയ ജനപ്രിയ ഷോയില്‍ ദക്ഷിണേന്ത്യന്‍ സിനിമാതാരങ്ങളുടെ വിളിപ്പേരുകള്‍ തിരിച്ചറിയുന്നതിനായി വെച്ച ഒരു ഗെയിം സെഗ്മെന്റിനിടയിലാണ് സിനിമാലോകത്തെ ഞെട്ടിച്ച ഈ വിവാദ സംഭവമുണ്ടായത്. ഷോയ്ക്കിടെ അല്ലു അര്‍ജുന്റെ വിശേഷണമായ 'ഐക്കണ്‍ സ്റ്റാര്‍' എന്നും കന്നഡ താരം യഷിനെ വിശേഷിപ്പിക്കുന്ന 'റോക്കിങ് സ്റ്റാര്‍' എന്നും കരണ്‍ ജോഹര്‍ ചോദിച്ചപ്പോള്‍ നടി രശ്മിക മന്ദാന വളരെ പെട്ടെന്ന് തന്നെ അത് തിരിച്ചറിഞ്ഞ് ശരിയുത്തരം നല്‍കിയിരുന്നു.
എന്നാല്‍ ഇന്ത്യന്‍ സിനിമയുടെ തന്നെ അഭിമാനമായ മോഹന്‍ലാലിനെ സൂചിപ്പിക്കുന്ന 'ദി കംപ്ലീറ്റ് ആക്ടര്‍' എന്ന വിളിപ്പേര് ആര്‍ക്കാണെന്ന ചോദ്യം വന്നപ്പോഴാണ് വിജയ് ദേവരകൊണ്ട പരിഹാസരൂപേണ 'എനിക്ക്!' എന്ന് മറുപടി നല്‍കി രംഗത്തുവന്നത്. തുടര്‍ന്ന് ഇത് മലയാളത്തിന്റെ പ്രിയനടന്‍ മോഹന്‍ലാലിന്റേതാണെന്ന് കരണ്‍ ജോഹര്‍ തിരുത്തിക്കൊണ്ട് പറഞ്ഞപ്പോള്‍, 'മോഹന്‍ലാല്‍ സാറോ?' എന്ന് യാതൊരുവിധ ഗൗരവവുമില്ലാതെ അത്ഭുതത്തോടെ വിജയ്യും രശ്മികയും ഒരുപോലെ ചോദിക്കുകയായിരുന്നു.
ദേശീയ തലത്തില്‍ ശ്രദ്ധിക്കപ്പെടുന്ന ഇത്രയും വലിയൊരു സിനിമാ താരങ്ങളുടെ ഭാഗത്തുനിന്ന് ഇന്ത്യന്‍ സിനിമയിലെ മുതിര്‍ന്ന ഒരു നടനോടും അദ്ദേഹത്തിന്റെ വിശേഷണത്തോടും ഉണ്ടായ ഈ ചെറിയ അവഗണനയും അറിവില്ലായ്മയും മോഹന്‍ലാല്‍ ആരാധകര്‍ക്കിടയില്‍ കടുത്ത അമര്‍ഷത്തിന് കാരണമായിട്ടുണ്ട്. പതിറ്റാടുകളായി ഇന്ത്യന്‍ ചലച്ചിത്രമേഖലയില്‍ സമാനതകളില്ലാത്ത നേട്ടങ്ങളും അഭിനയമികവും കാഴ്ചവെച്ചിട്ടുള്ള ഒരു ഇതിഹാസ താരത്തെ ദേശീയ മാധ്യമങ്ങളുടെ മുന്നില്‍വെച്ച് അപഹസിക്കുന്ന രീതിയില്‍ പെരുമാറിയത് തികച്ചും അപലപനീയമാണെന്നാണ് ആരാധകര്‍ സമൂഹമാധ്യമങ്ങളില്‍ ഒരേസ്വരത്തില്‍ ചൂണ്ടിക്കാണിക്കുന്നത്.
ഇരുവരുടെയും ഈ അജ്ഞതയിലും നിസ്സാരവല്‍ക്കരണത്തിലും പ്രതിഷേധിച്ച് നിമിഷങ്ങള്‍ക്കകം നിരവധി ആരാധകരാണ് സമൂഹമാധ്യമങ്ങളില്‍ പ്രതിഷേധവുമായി രംഗത്തെത്തിയത്. അടുത്തിടെ രജനീകാന്ത് നായകനായെത്തിയ ഹിറ്റ് ചിത്രം 'ജയിലര്‍ 2'-ല്‍ മോഹന്‍ലാലിന്റെ കാമിയോ റോളിന്റെ ദൈര്‍ഘ്യം കുറച്ചതില്‍ പ്രതിഷേധിച്ച് ആരാധകര്‍ കടുത്ത അമര്‍ഷം രേഖപ്പെടുത്തിയതും, പിന്നാലെ സംവിധായകന്‍ നെല്‍സണ്‍ ദിലീപ് കുമാറിന്റെ സോഷ്യല്‍ മീഡിയ പേജുകളില്‍ കയറി വിമര്‍ശനങ്ങള്‍ ഉന്നയിച്ചതും വലിയ വാര്‍ത്തയായിരുന്നു. തുടര്‍ന്ന് 'കമന്റ് ബോക്സിന് ചെരിവ്' എന്ന വിശേഷണം സാമൂഹികമാധ്യമങ്ങളില്‍ വലിയ രീതിയില്‍ ചര്‍ച്ചയാവുകയും ട്രെന്‍ഡായി മാറുകയും ചെയ്തിരുന്നു.
സമാനമായ രീതിയിലുള്ള ജനരോഷവും സൈബര്‍ പ്രതിഷേധവുമാണ് ഇപ്പോള്‍ തെലുങ്ക് താരങ്ങളായ രശ്മിക മന്ദാനയ്ക്കും വിജയ് ദേവരകൊണ്ടയ്ക്കും എതിരായി സോഷ്യല്‍ മീഡിയയില്‍ രൂപപ്പെട്ടിരിക്കുന്നത്. മറ്റുള്ള ഭാഷകളിലെ സൂപ്പര്‍താരങ്ങളെയും അവരുടെ സംഭാവനകളെയും കുറിച്ച് അടിസ്ഥാനപരമായ വിവരങ്ങള്‍ പോലുമില്ലാതെ ഇത്തരം ദേശീയ വേദികളില്‍ പങ്കെടുക്കുന്ന താരങ്ങളുടെ മനോഭാവം സിനിമാസ്വാദകര്‍ക്കിടയില്‍ കടുത്ത ചര്‍ച്ചകള്‍ക്ക് തിരികൊളുത്തിയിട്ടുണ്ട്. മറ്റ് ദക്ഷിണേന്ത്യന്‍ ഇന്‍ഡസ്ട്രികളിലെ താരങ്ങളെക്കുറിച്ചുള്ള വിവരങ്ങള്‍ കൃത്യമായി അറിയാമെങ്കിലും മലയാള സിനിമയുടെ മഹത്വത്തെയും അതിന്റെ സൂപ്പര്‍താരത്തെയും മുഖവിലയ്‌ക്കെടുക്കാത്ത ഈ സമീപനം വലിയൊരു സാംസ്‌കാരിക ചര്‍ച്ചയായി മാറിക്കഴിഞ്ഞു.
വിവാദം ഇത്രത്തോളം വളര്‍ന്നിട്ടും താരങ്ങളുടെ ഭാഗത്തുനിന്ന് ഔദ്യോഗിക വിശദീകരണങ്ങളോ ഖേദപ്രകടനങ്ങളോ വന്നിട്ടില്ലെങ്കിലും, മോഹന്‍ലാല്‍ ആരാധകരുടെ പ്രതിഷേധം സോഷ്യല്‍ മീഡിയയില്‍ ഇപ്പഴും ശക്തമായി തുടരുകയാണ്.
Premium Lifestyle and Entertainment website
ഒരാഴ്ചയ്ക്കിടെ മൂന്നാമത്തെ മരണം; പ്രശസ്ത പിന്നണി ഗായകന്‍ കൃഷ്ണരാജിന്റെ മരണത്തില്‍ വേദന പങ്ക് വച്ച് ഗായിക സുജാത.