രക്ഷിക്കാനെത്തിയ എല്ലാവർക്കും നന്ദി, വീടെല്ലാം വെള്ളത്തിലാണ്..; എന്താകുമെന്നറിയില്ല.., താനിപ്പോൾ ആശാ ശരത്തിന്റെ വീട്ടിൽ സുരക്ഷിത; പ്രളയത്തിൽ നിന്നും രക്ഷപ്പെട്ട നടി അനന്യയുടെ വാക്കുകൾ

പ്രളയത്താൽ വീട്ടിൽ വെള്ളം കയറിയതോടെ തനിക്ക് രക്ഷയായത് നടി ആശാ ശരത്തിന്റെ ഭവനം. ദുരന്തമുഖത്ത് നിന്ന് രക്ഷപ്പെട്ട നടി അനന്യ ഫേസ്‌ബുക്ക് ലൈവിലെത്തി പങ്കുവെച്ച വാക്കുകളാണിത്. പ്രളയം വീടിനെ മുക്കിയതോടെ നടി അനന്യയുടെ പെരുമ്പാവൂരിലെ വീട് പൂർണമായും മുങ്ങിയിരുന്നു. നടിക്കും കുടുംബത്തിനും രക്ഷയായത് പെരുമ്പാവൂരിലെ നടി ആശാ ശരത്തിന്റെ വീടായിരുന്നു. ആശ ശരത്തിന്റെ വീട്ടിലാണ് താനിപ്പോൾ ഉള്ളതെന്നും ഇവിടെ സുരക്ഷിതയാണെന്നും അനന്യ പറയുന്നു.

അനന്യയുടെ വാക്കുകളിലേക്ക്:

കഴിഞ്ഞ മൂന്നു ദിവസമായി പെരുമ്പാവൂരാണ്, വീടാകെ വെള്ളത്തിലാണ്. ഇന്നു രാവിലെ 11 നാണ് സുരക്ഷിതരായത്. ഇപ്പോൾ പെരുമ്പാവൂരുള്ള ആശാ ശരത്തിന്റെ വീട്ടിലാണ്. ചേച്ചി വിളിച്ച് വീട്ടിലേക്കെത്താൻ പറഞ്ഞു. കഴിഞ്ഞ രണ്ടു ദിവസമായി വളരെ മോശം അവസ്ഥയിലൂടെയാണ് കടന്നുപോയത്. മിനിറ്റുകൾക്കുള്ളിലാണ് വെള്ളം കയറിയത്. ബന്ധുക്കളുടെ വീടെല്ലാം വെള്ളത്തിലാണ്. 
എന്താകുമെന്ന് അറിയില്ല, മഴ നിന്നിട്ടില്ല, എല്ലാം ദെവത്തിന്റെ കയ്യിലാണ്. ഇതിലും മോശമായ അവസ്ഥയിലൂടെ കടന്നുപോകുന്നവരുണ്ട്. അവരെയും സഹായിക്കണം, അവർക്കു വേണ്ടി പ്രാർത്ഥിക്കണം. പെരുമ്പാവൂർ ടൗണിൽ മാത്രമേ മഴ ഇപ്പോൾ മഴ പെയ്യാതിരിക്കുന്നുള്ളൂ. മനസ്സ് മരവിച്ച അവസ്ഥയിലാണ്. ഇനിയങ്ങോട്ടുള്ള പോക്ക് എങ്ങനെയാകുമെന്നറിയില്ല. ഞങ്ങൾ കുടുംബാംഗങ്ങളെല്ലാം വീടു വിട്ടുപോന്നു. രക്ഷിക്കാനെത്തിയ എല്ലാവർക്കും നന്ദി''.