പ്ലാസ്റ്റിക് സര്‍ജറികള്‍ മൂന്നെണ്ണം കഴിഞ്ഞു; ഇനിയും സര്‍ജറികളുണ്ട്; കാലിന് കാര്യമായ പരുക്കുള്ളതിനാല്‍ നടക്കാന്‍ സമയം എടുക്കും; പൊട്ടലിനുള്ള സര്‍ജറി നടത്താനുണ്ട്; സീരിയല്‍ താരം കാര്‍ത്തിക്കിന് സംഭവിച്ച പരിക്ക് ഗുരുതരമെന്ന് ബീന ആന്റണി

'മൗനരാഗം' എന്ന സീരിയലിലൂടെ ശ്രദ്ധ നേടിയ താരമാണ് കാര്‍ത്തിക് പ്രസാദ്.കഴിഞ്ഞ ദിവസമാണ് കാര്‍ത്തികിന് അപകടത്തില്‍ പരിക്കേറ്റത്. ഇപ്പോഴിതാ കാര്‍ത്തിക്കിന്റെ അപകടവുമായി ബന്ധപ്പെട്ട് പ്രതികരിച്ച് എത്തിയിരിക്കുകയാണ് നടി ബീന ആന്റണി. കാര്‍ത്തിക്കിന് അപകടത്തില്‍ സംഭവിച്ച പരിക്ക് ഗുരുതരമാണെന്ന് ബീന ആന്റണി പറയുന്നു. സീരിയലിന്റെ ഷൂട്ട് കഴിഞ്ഞുള്ള മടക്കയാത്രയില്‍ കാല്‍നടയായി പോവുകയായിരുന്ന നടനെ കെഎസ്ആര്‍ടിസി ബസ് പിന്നില്‍ നിന്ന് ഇടിക്കുകയായിരുന്നു.

അബോധാവസ്ഥയിലായ കാര്‍ത്തിക്കിനെ നാട്ടുകാര്‍ ചേര്‍ന്നാണ് ആശുപത്രിയില്‍ എത്തിച്ചത്. കാലിനും തലയ്ക്കും നടന് ഗുരുതരമായി പരിക്കേറ്റിരുന്നു. നാട്ടുകാര്‍ ആയിരുന്നു നടനെ ആശുപത്രിയില്‍ എത്തിച്ചത്. കാര്‍ത്തിക്കിന്റെ നിലവിലെ ആരോഗ്യവസ്ഥയെ കുറിച്ചാണ് ബീന ആന്റണി ഇപ്പോള്‍ സംസാരിച്ചിരിക്കുന്നത്.

പലരും തനിക്ക് പേഴ്സണല്‍ മെസേജുകള്‍ അയച്ച് വരെ നടന്റെ കാര്യം ചോദിച്ചതിനാലാണ് ഇക്കാര്യം പറയുന്നത് എന്ന് വ്യക്തമാക്കി കൊണ്ടാണ് ബീന ആന്റണി സംസാരിച്ചത്. ''പ്രശ്‌നങ്ങളുണ്ടോ എന്ന് ചോദിച്ചാല്‍ കുറച്ച് പ്രശ്‌നങ്ങളുണ്ട്. നടക്കാന്‍ കുറച്ച് സമയമെടുക്കും. കാലിനാണ് പരിക്ക്. കാര്യമായ പ്രശ്‌നം സംഭവിച്ചിട്ടുണ്ട്. രണ്ട് കാലിലും സ്‌കിന്നും മസിലും പോയിട്ടുണ്ട്.''

''അതിന്റെ സര്‍ജറികള്‍ നടക്കുകയാണ്. കാര്‍ത്തിക്കിന്റെ വീട് കോഴിക്കേടോണ്. ഭാര്യയൊക്കെ ഇവിടെ വന്ന് നില്‍ക്കുകയായിരുന്നു. പക്ഷെ പിന്നെ കുറേക്കൂടി കംഫര്‍ട്ടബിള്‍ ആയതിനാല്‍ അവനെ കോഴിക്കോട്ടേക്ക് കൊണ്ടുപോയി. അവിടെയാണ് ചികിത്സ നടക്കുന്നത്. കാര്‍ത്തിക്കുമായി ഞാന്‍ ഇതുവരേയും സംസാരിച്ചിട്ടില്ല. ഭാര്യയുമായാണ് സംസാരിച്ചത്.'

'ഭയങ്കര വേദനയാണെന്നും പെയില്‍ കില്ലറുകള്‍ നല്‍കുന്നുണ്ടെന്നുമാണ് പറഞ്ഞത്. പ്ലാസ്റ്റിക് സര്‍ജറികള്‍ രണ്ട് മൂന്നെണ്ണം കഴിഞ്ഞു. ഇനിയും സര്‍ജറികളുണ്ട്. ഇതെല്ലാം കഴിഞ്ഞ് വേണം പൊട്ടലിനുള്ള സര്‍ജറി നടത്തേണ്ടത്. അങ്ങനെ കുറച്ച് പ്രശ്‌നത്തിലൂടെയാണ് കടന്നു പോകുന്നത്. ഇതാണ് അവന്റെ ശരിക്കുമുള്ള അവസ്ഥയെന്ന് അവര്‍ അറിയിച്ചു'' എന്നാണ് ബീന ആന്റണി പങ്കുവച്ച വീഡിയോയില്‍ പറയുന്നത്.