ആ സത്യം മനസ്സിലാക്കിയ നേഹ ദേഷ്യം സഹിക്കാന്‍ വയ്യാതെ ബെഡ്‌റൂമിലെത്തി സാധനങ്ങള്‍ എടുത്തെറിഞ്ഞ് പൊട്ടിക്കുന്ന കാഴ്ച; അത് അങ്ങനെ ഒന്നുമല്ലെന്ന് എത്ര പറഞ്ഞുകൊടുക്കാന്‍ ശ്രമിച്ചിട്ടും പറ്റുന്നില്ല; എല്ലാം കണ്ട് കണ്ണ് തള്ളിയ പ്രേക്ഷകര്‍; താഷിയുടെ 'ലൗ' ട്രാക്ക് പൊളിയുന്നു? ബിഗ് ബോസ് വീട്ടിലെ പ്രണയം വീണ്ടും ചര്‍ച്ചകളില്‍

ബിഗ് ബോസ് മലയാളം ഹൗസില്‍ വീണ്ടും പ്രണയവും അതിനെത്തുടര്‍ന്നുള്ള തര്‍ക്കങ്ങളും കൊടുങ്കാറ്റാവുന്നു. സഹമത്സരാര്‍ത്ഥികളായ നേഹയും താഷിയും തമ്മിലുള്ള ബന്ധവും അതിലുണ്ടായ അപ്രതീക്ഷിത സംഭവവികാസങ്ങളുമാണ് ഇപ്പോള്‍ സാമൂഹിക മാധ്യമങ്ങളിലും പ്രേക്ഷകര്‍ക്കിടയിലും വലിയ ചര്‍ച്ചയായിരിക്കുന്നത്. ഷോയിലെ ഏറ്റവും പുതിയ സംഭവവികാസങ്ങള്‍ ആരാധകരെപോലും അക്ഷരാര്‍ത്ഥത്തില്‍ ഞെട്ടിച്ചിരിക്കുകയാണ്.

കഴിഞ്ഞ ദിവസത്തെ എപ്പിസോഡിന് ആധുനിക ബിഗ് ബോസ് ചരിത്രത്തിലെ ഏറ്റവും നാടകീയമായ മുഹൂര്‍ത്തങ്ങള്‍ക്കാണ് സാക്ഷ്യം വഹിച്ചത്. മൃദുല നേഹയുടെ അടുത്തുചെന്ന് താഷി വേദാങ്കിയോട് ഫ്‌ലെര്‍ട്ട് ചെയ്യുന്നുണ്ടെന്ന വിവരം അറിയിക്കുന്നതോടെയാണ് പ്രശ്‌നങ്ങളുടെ തുടക്കം. ഈ വാര്‍ത്ത കേട്ട് മാനസികമായി തകര്‍ന്ന നേഹ, ഉടന്‍തന്നെ വേദാങ്കിയെ വിളിച്ചുവരുത്തി കാര്യത്തിന്റെ സത്യാവസ്ഥ അന്വേഷിച്ചു. താഷി തന്നോട് ഫ്‌ലെര്‍ട്ട് ചെയ്തിട്ടുണ്ടെന്ന് വേദാങ്കി ഉറപ്പിച്ചു പറഞ്ഞതോടെ നേഹ നിയന്ത്രണം വിട്ട് പൊട്ടിക്കരയുകയായിരുന്നു. തുടര്‍ന്ന് മൃദുലയെത്തിയാണ് നേഹയെ ആശ്വസിപ്പിച്ചത്.

പിന്നീട് നേഹ നേരിട്ട് താഷിയോട് ഈ വിഷയത്തെക്കുറിച്ച് ചോദിച്ചെങ്കിലും, താന്‍ അത്തരത്തിലൊരു കാര്യവും ചെയ്തിട്ടില്ലെന്ന നിലപാടാണ് താഷി സ്വീകരിച്ചത്. എന്നാല്‍ താഷിയുടെ വിശദീകരണം വിശ്വസിക്കാന്‍ നേഹ തയ്യാറായില്ല. തുടര്‍ന്ന് 'ശരി, താങ്ക്യൂ ഫോര്‍ എവരിതിങ്' എന്ന് പറഞ്ഞ് താഷി അവിടെനിന്നും എഴുന്നേറ്റുപോയി. കടുത്ത മാനസിക സംഘര്‍ഷത്തിലായ നേഹ ബെഡ്റൂമിലെത്തി ദേഷ്യം കാരണം സാധനങ്ങള്‍ എറിഞ്ഞുപൊട്ടിക്കുന്ന തീവ്രമായ വൈകാരിക രംഗങ്ങള്‍ക്കും ഹൗസ് സാക്ഷ്യം വഹിച്ചു.

എന്നാല്‍, ഇരുവരും തമ്മിലുള്ള ഈ പ്രണയബന്ധമോ പ്രശ്‌നങ്ങളോ മുഖ്യധാരാ എപ്പിസോഡുകളിലോ ലൈവ് സ്ട്രീമിങ്ങിലോ അധികൃതര്‍ കാണിച്ചിരുന്നില്ല എന്നത് പ്രേക്ഷകരില്‍ വലിയ ദുരൂഹതയാണ് ഉണ്ടാക്കിയിരിക്കുന്നത്. ലവ് കോമ്പോകള്‍ യാതൊരു മടിയുമില്ലാതെ പ്രേക്ഷകര്‍ക്ക് മുന്നില്‍ എത്തിക്കുന്ന ബിഗ് ബോസ് എന്തുക്കൊണ്ടാണ് നേഹ-താഷി ട്രാക്ക് ബോധപൂര്‍വ്വം എഡിറ്റ് ചെയ്ത് ഒഴിവാക്കിയത് എന്ന ചോദ്യം ആരാധകര്‍ ശക്തമായി ഉയര്‍ത്തുന്നുണ്ട്. മോഹന്‍ലാല്‍ എത്തിയ വീക്കെന്‍ഡ് എപ്പിസോഡില്‍ പോലും മറ്റു ചില വ്യക്തിപരമായ വിഷയങ്ങള്‍ ചര്‍ച്ച ചെയ്‌തെങ്കിലും ഈ പ്രണയവിഷയം എങ്ങും പരാമര്‍ശിക്കപ്പെട്ടില്ല.

താഷിയും നേഹയും തമ്മില്‍ തങ്ങളുടെ ഭാവിയെക്കുറിച്ച് കൃത്യമായ പ്ലാനുകള്‍ ചര്‍ച്ച ചെയ്തിരുന്നതായി നേഹയുടെ വാക്കുകളില്‍ വ്യക്തമാണ്. തനിക്ക് മുമ്പുണ്ടായ മൂന്ന് പ്രണയങ്ങളും ഇതേ പാറ്റേണ്‍ കാരണം തകര്‍ന്നുപോയതാണെന്നും, ഇനിയും അത് താങ്ങാന്‍ വയ്യെന്നും പൊട്ടിക്കരഞ്ഞുകൊണ്ട് നേഹ പറയുന്നുണ്ടായിരുന്നു. വേദാങ്കിയോട് താഷി സംസാരിച്ചതുമായി ബന്ധപ്പെട്ട് പിന്നീട് താഷി നേരിട്ട് വേദാങ്കിയോട് ചോദിക്കുന്ന ദൃശ്യങ്ങളും ഇതിനിടെ വൈറലായിട്ടുണ്ട്. തനിക്ക് ചേര്‍ന്ന ആളല്ല വേദാങ്കി എന്ന് താഷി മുഖത്ത് നോക്കി പറയുന്നതും ആ ക്ലിപ്പില്‍ വ്യക്തമാണ്.

മൃദുലയുടെ ഇടപെടല്‍ നേഹയെ മാനസികമായി തളര്‍ത്തി ഗെയിമില്‍ നിന്നും പിന്നോട്ട് വലിക്കാനുള്ള ബോധപൂര്‍വ്വമായ തന്ത്രമായിരുന്നോ എന്ന സംശയവും പ്രേക്ഷകര്‍ ഉന്നയിക്കുന്നുണ്ട്. ലൈവിലും എപ്പിസോഡുകളിലും കൃത്യമായ വിവരങ്ങള്‍ ലഭിക്കാതെ കുഴങ്ങിയിരിക്കുന്ന ആരാധകര്‍, വരുന്ന എപ്പിസോഡുകളിലെങ്കിലും ഇതിന്റെ സത്യാവസ്ഥ പുറത്തുവരുമെന്ന പ്രതീക്ഷയിലാണ്. ബിഗ് ബോസ് ഹൗസിനെ ഇളക്കിമറിച്ചിരിക്കുന്ന ഈ സംഭവങ്ങളുടെ ചുരുളഴിയാന്‍ കട്ട കാത്തിരിപ്പിലാണ് ടെലിവിഷന്‍ പ്രേക്ഷകര്‍.