ബിസിനസുകാരന്റെ മകനായി കോട്ടയത്ത് ജനനം; പഠിച്ചത് എംബിഎയും സംഗീതവും; ദുബൈയിലെ ജോലിക്കിടെ തോന്നിയ മ്യൂസിക് ബാന്റിന് ഇന്ന് ആരാധകര്‍ ഏറെ; നന്ദഗോവിന്ദം ഭജന്‍സിന്റെ തുടക്കക്കാരനായ നവീന്‍ മോഹന്റെ കഥ

മാസങ്ങള്‍ക്കു മുമ്പ് സോഷ്യല്‍ മീഡിയയില്‍ വൈറലായ ഒരു വീഡിയോയുണ്ട്. ഒരു കൂട്ടം ചെറുപ്പക്കാര്‍ ഒരുപോലെ വസ്ത്രം ധരിത്ത് സ്റ്റേജിലിരുന്ന് ചില പാട്ടുകള്‍ പാടുന്നു. കണ്ടാല്‍ ഒരു കച്ചേരിയോ ഭജനയോ ഒക്കെ പോലെ തോന്നുമെങ്കിലും മലയാളത്തിലെ പ്രശസ്തമായ മനോഹരമായ സിനിമാ ഗാനങ്ങളും ഭക്തിഗാനങ്ങളും കോര്‍ത്തിണക്കി അവര്‍ പാടിയ പാട്ടുകള്‍ ലോക മലയാളികളിലേക്ക് എത്തിയത് അതിവേഗമാണ്. അതില്‍ പറയരുതേ രാധ അറിയരുതേ.. ഇത് ഗുരുവായൂരപ്പാ രഹസ്യം എന്നു തുടങ്ങിയ ഈ ഷോര്‍ട്ട് റീല്‍ വീഡിയോ 12 മില്യണിലധികം പേരാണ് ഇതുവരെ കണ്ടിരിക്കുന്നത്. പിന്നാലെ കാതലേ... കാതലേ.. എന്ന പാട്ടിന്റെ മ്യൂസിക് ചേര്‍ത്ത് അതവസാനിക്കുമ്പോള്‍ പാടുന്നത് കൊട്ടുമില്ല.. കുഴവുമില്ല.. നെഞ്ചില്‍ തുടിയ്ക്കും നിന്‍ എന്നു തുടങ്ങി കാണികളെ മുഴുവന്‍ ഒരുപോലെ കയ്യിലെടുത്ത ആ വീഡിയോ അതിവേഗമാണ് വൈറലായത്. ഒപ്പം നന്ദഗോവിന്ദം എന്ന മ്യൂസിക് ബാന്‍ഡും സംഗീത പ്രേക്ഷകര്‍ക്കിടയില്‍ ശ്രദ്ധ നേടുകയായിരുന്നു.

നവീന്‍ മോഹന്‍ എന്ന യുവാവാണ് നന്ദഗോവിന്ദം എന്ന മ്യൂസിക് ബാന്‍ഡ് സ്ഥാപിച്ചതും അതിനു തുടക്കമിട്ടതും. കോട്ടയം നാഗപടത്തുകാരനാണ് നവീന്‍. ബിസിനസുകാരനായ മോഹനന്‍ നായരുടേയും ഭാര്യയുടേയും മൂത്തമകനായിട്ടാണ് നവീന്‍ ജനിച്ചത്. ഒരു അനുജത്തിയുമുണ്ട്. നവമി. കുട്ടിക്കാലം മുതല്‍ക്കെ സംഗീതം അഭ്യസിച്ചിരുന്ന നവീന്‍ ഡിഗ്രി പഠനം നടത്തിയത് കോട്ടയം സിഎംഎസ് കോളേജിലായിരുന്നു. പിന്നീട് എംബിഎയും. മാര്‍ക്കറ്റിംഗ് ആന്റ് എച്ച്ആറില്‍ ഉപരിപഠനം നടത്തിയ നവീന് വൈകാതെ തന്നെ ജോലിയും ലഭിച്ചു. തുടര്‍ന്ന് ജനറല്‍ മില്‍സില്‍ ദുബായ് കണ്‍ട്രി മാനേജരായി ജോലി ചെയ്യുന്ന കാലത്താണ് വീണ്ടും സംഗീതലോകത്തേക്ക് സജീവമാകുന്നത്. പഠനത്തിന്റെ കാലത്തുടനീളം സംഗീതത്തെ മുറുകെ പിടിച്ചിരുന്ന നവീന്‍ നന്ദഗോവിന്ദം എന്ന മ്യൂസിക് ബാന്‍ഡ് തുടങ്ങിയതിലൂടെയാണ് ശ്രദ്ധ നേടിയത്.

സംഗീത ബാന്‍ഡ് തുടങ്ങുന്നതിനു മുന്നേ 2013ലായിരുന്നു ശ്രീദേവി എന്ന പെണ്‍കുട്ടിയുമായുള്ള വിവാഹം. വിവാഹശേഷം വിദേശത്തേക്ക് പോയ നവീന്‍ അവിടെയായിരുന്നു ഏറെക്കാലം ജീവിതം ചെലവഴിച്ചത്. തുടര്‍ന്ന് നാട്ടിലേക്ക് തന്നെ തിരിച്ചെത്താനും സംഗീത രംഗത്ത് കൂടുതല്‍ ശോഭിക്കാനുമുള്ള ആഗ്രഹമാണ് മ്യൂസിക് ബാന്‍ഡ് തുടങ്ങുന്നതിലേക്ക് എത്തിച്ചത്. അതിനിടെയാണ് വിവാഹം കഴിഞ്ഞ് ഏഴു വര്‍ഷത്തോളം കഴിഞ്ഞ ശേഷം നവീനും ശ്രീദേവിയ്ക്കും ഇരട്ടക്കുട്ടികള്‍ ജനിക്കുന്നത്. ഒരാണ്‍കുട്ടിയും പെണ്‍കുട്ടിയും. ഇന്ന് അഞ്ചു വയസുകാരാണ് മക്കള്‍. അതിനു ശേഷമാണ് നാട്ടില്‍ തന്നെ ചുവടുറപ്പിക്കുവാന്‍ തീരുമാനിച്ചതും നവീന്‍ മോഹന്‍, ശ്രീലാല്‍ വേണു, മനു മോഹന്‍ എന്നീ മൂന്നു പേര്‍ ചേര്‍ന്നു നയിക്കുന്ന 16 അംഗ സംഘമായ നന്ദഗോവിന്ദം എന്ന മ്യൂസിക് ബാന്‍ഡിന് തുടക്കമിടുന്നതും. പറയരുതേ രാധ അറിയരുതേ.. ഇത് ഗുരുവായൂരപ്പാ രഹസ്യം എന്ന റീല്‍ വീഡിയോ വൈറലായതോടെ ലോകമെമ്പാടുനിന്നും പ്രശംസ തേടിയെത്തുകയായിരുന്നു.