കുട്ടികള്‍ക്ക് പ്രതിരോധശേഷി വര്‍ദ്ധിപ്പിക്കാന്‍ ദെനംദിന ശീലങ്ങള്‍ പിന്‍തുടരാം

നിങ്ങളുടെ കുട്ടി അടിക്കടി രോഗബാധിതനാകുന്നതില്‍ ഉത്കണ്ഠയുണ്ടോ ?  പ്രതിരോധ ശേഷി വര്‍ദ്ധിപ്പിക്കാന്‍ ഈ ദൈനംദിന ശീലങ്ങള്‍ പിന്‍തുടരാംമരുന്നുകളേക്കാള്‍ കുട്ടികളുടെ ആരോഗ്യത്തെ സ്വാധീനിക്കുന്നത് അവരുടെ ദൈനംദിന ശീലങ്ങളാണ്. 

സ്‌ക്രീന്‍ ഉപയോഗത്തിനല്ല, ഉറക്കത്തിന് മുന്‍ഗണന നല്‍കുക - ഉറക്കം തടസ്സപ്പെടുമ്പോള്‍, ചെറിയൊരു ജലദോഷത്തില്‍ നിന്ന് പോലും മുക്തി നേടാന്‍ കുട്ടിയുടെ ശരീരം പ്രയാസപ്പെടുന്നു'6 നും 12 നും ഇടയില്‍ പ്രായമുള്ള കുട്ടികള്‍ക്ക് ഏകദേശം 9 മുതല്‍ 12 മണിക്കൂര്‍ വരെ വിശ്രമം ആവശ്യമാണ്. ഈ ആഴത്തിലുള്ള ഉറക്കത്തിലാണ് ശരീരം ശാന്തമായി പ്രതിരോധശേഷി വര്‍ദ്ധിപ്പിക്കുന്നത്. ഈ സമയത്താണ് ഗ്രോത്ത് ഹോര്‍മോണ്‍ ഉത്പാദിപ്പിക്കപ്പെടുന്നതും പ്രതിരോധ കോശങ്ങള്‍ പുനഃസ്ഥാപിക്കപ്പെടുന്നതും ശരീരം വീണ്ടും ഊര്‍ജ്ജസ്വലമാകുന്നതും. 
എന്നാല്‍ ഉറങ്ങുന്നതിന് തൊട്ടുമുമ്പ് സ്‌ക്രീനുകള്‍ ഉപയോഗിക്കുന്നത് ഈ പ്രക്രിയകളുടെ കാര്യക്ഷമത കുറയ്ക്കും.

ഭക്ഷണത്തില്‍ വൈവിധ്യമാര്‍ന്ന വര്‍ണ്ണങ്ങള്‍ ഉള്‍പ്പെടുത്തുക - ഏറ്റവും പ്രധാനപ്പെട്ട കാര്യമാണെങ്കിലും പലപ്പോഴും അവഗണിക്കപ്പെടുന്നത് ഭക്ഷണമാണ്. ഇതിനായി സങ്കീര്‍ണ്ണമായ ഡയറ്റുകള്‍ പിന്തുടരേണ്ടതില്ല. അണുബാധകളെ ചെറുക്കാന്‍ ശരീരത്തിന് ആവശ്യമായ പോഷകങ്ങള്‍ ലഭിക്കുന്നതിനായി കഴിയുന്നത്ര വ്യത്യസ്ത നിറങ്ങളിലുള്ള പഴങ്ങളും പച്ചക്കറികളും ഭക്ഷണത്തില്‍ ഉള്‍പ്പെടുത്തിയാല്‍ മതിയാകും. 

വ്യത്യസ്ത നിറങ്ങള്‍ വ്യത്യസ്ത പോഷകങ്ങളെയാണ് സൂചിപ്പിക്കുന്നത്. കാരറ്റിലെ ഓറഞ്ച് നിറം, ചീരയിലെ പച്ച നിറം, തക്കാളിയിലെ ചുവപ്പ് നിറം എന്നിവ കുട്ടിയുടെ പ്രതിരോധശേഷി ശക്തമായി നിലനിര്‍ത്താന്‍ നിശബ്ദമായി സഹായിക്കുന്നു.

വ്യായാമം പോലെ തന്നെ സൂര്യപ്രകാശവും പ്രധാനമാണ്. കുട്ടികള്‍ ദിവസത്തിന്റെ ഭൂരിഭാഗവും വീടിനുള്ളിലും സ്‌ക്രീനുകള്‍ക്ക് മുന്നിലും ചെലവഴിക്കുന്ന ഈ കാലത്ത്, അല്പസമയം പുറത്തിറങ്ങി കളിക്കുന്നത് ശരീരത്തെ ക്ഷീണിപ്പിക്കുക മാത്രമല്ല ചെയ്യുന്നത്. അണുബാധകളോട് പ്രതികരിക്കാന്‍ പ്രതിരോധ സംവിധാനത്തെ സഹായിക്കുന്ന വിറ്റാമിന്‍ ഡി ഉത്പാദിപ്പിക്കാന്‍ ഇത് ശരീരത്തെ സഹായിക്കുന്നു. ദിവസവും 30 മിനിറ്റ് പുറത്ത് ചെലവഴിക്കുന്നത് പോലും ഏറെ ഗുണം ചെയ്യും.

കൈ കഴുകുന്നത് ഒരു ഭാരമല്ല, ശീലമാക്കുക - ലളിതമെന്ന് തോന്നുമെങ്കിലും വളര്‍ത്തിയെടുക്കേണ്ട ഏറ്റവും പ്രധാനപ്പെട്ട ശീലങ്ങളില്‍ ഒന്നാണിത്. ശുചിത്വമുള്ള കൈകള്‍ക്ക് കുട്ടികളുടെ പ്രതിരോധശേഷിയുടെ കാര്യത്തില്‍ വലിയ മാറ്റങ്ങള്‍ വരുത്താന്‍ കഴിയും. ശ്വസനസംബന്ധമായതോ, ദഹനസംബന്ധമായതോ, ചര്‍മ്മസംബന്ധമായതോ ആയ ഭൂരിഭാഗം കുട്ടിക്കാലത്തെ അണുബാധകളും കൈകളിലൂടെയാണ് ശരീരത്തില്‍ പ്രവേശിക്കുന്നത്. ഭക്ഷണത്തിന് മുമ്പും പുറത്ത് പോയി കളിച്ച ശേഷവും കൃത്യമായി കൈ കഴുകാന്‍ കുട്ടിയെ പഠിപ്പിക്കുന്നത് മാതാപിതാക്കള്‍ക്ക് ചെറുപ്പത്തിലേ കെട്ടിപ്പടുക്കാന്‍ കഴിയുന്ന ഏറ്റവും ഫലപ്രദമായ ശീലങ്ങളിലൊന്നാണ്.

അവരുടെ മാനസിക സമ്മര്‍ദ്ദത്തെ അവഗണിക്കരുത് - മാനസിക സമ്മര്‍ദ്ദം ഒരു കുട്ടിയുടെ ആരോഗ്യത്തെ എങ്ങനെ ബാധിക്കുന്നു എന്നതിനെക്കുറിച്ച് നമ്മള്‍ സംസാരിക്കുന്നത് കുറവാണ്. പരീക്ഷകള്‍, പഠന സമ്മര്‍ദ്ദം, വീട്ടിലെ പിരിമുറുക്കങ്ങള്‍ എന്നിവ കുട്ടിയുടെ പ്രതിരോധശേഷിയെ ക്രമേണ ദുര്‍ബലപ്പെടുത്തും. നിരന്തരമായ മാനസിക സമ്മര്‍ദ്ദം കോര്‍ട്ടിസോളിന്റെ (Cortisol) അളവ് കൂട്ടുകയും ഇത് പ്രതിരോധ ശേഷിയെ മന്ദീഭവിപ്പിക്കുകയും ചെയ്യുന്നു. 

ഇതിനുള്ള പരിഹാരം സങ്കീര്‍ണ്ണമാകണമെന്നില്ല. 10 മിനിറ്റ് മറ്റ് നിയന്ത്രണങ്ങളില്ലാത്ത കളി, ദിവസാവസാനമുള്ള ശാന്തമായ സംഭാഷണം, അല്ലെങ്കില്‍ അവരുടെ വിഷമങ്ങള്‍ കേള്‍ക്കാന്‍ ഒരാളുണ്ടെന്ന തോന്നല്‍ എന്നിവ കുട്ടിയുടെ ശരീരത്തെ സമ്മര്‍ദ്ദത്തില്‍ നിന്ന് മുക്തമാക്കാന്‍ സഹായിക്കും.