മുഖമഴകിനും മുടിയഴകിനും മുരിങ്ങയില പൊടി....

മുടിയ്ക്കും മുഖത്തിനും ചേര്‍ന്ന പല തരത്തിലെ പായ്ക്കുകള്‍ നമുക്ക് തയ്യാറാക്കാന്‍ സാധിയ്ക്കും. ഇവയെക്കുറിച്ചറിയൂ.

ആരോഗ്യത്തിനും സൗന്ദര്യത്തിനുമെല്ലാം സഹായിക്കുന്ന പ്രകൃതിദത്ത വഴികള്‍ ധാരാളമുണ്ട്. നമ്മുടെ തൊടിയില്‍ നിന്നും ലഭിയ്ക്കുന്ന പല ഇലകളും ഇതില്‍ പെടുന്നു. ചെമ്പരത്തി, പേരയില, മുരിങ്ങയില എന്നിവയെല്ലാം ഇത്തരത്തില്‍ ആരോഗ്യ, സൗന്ദര്യ, മുടി സംരക്ഷണത്തിന് സഹായിക്കുന്നവയാണ്. മുരിങ്ങയില മുടി, മുഖ സംരക്ഷണത്തിന് നല്ലതാണെന്ന കാര്യം ചിലപ്പോള്‍ ചിലര്‍ക്കെങ്കിലും അറിയാന്‍ വഴിയില്ല. എന്നാല്‍ ആന്റി ഓക്‌സിഡന്റുകളും പല തരത്തിലെ പോഷകങ്ങളുമുള്ള ഇത് പല രീതിയിലും മുടി, മുഖ സംരക്ഷണത്തിന് ഉപയോഗിയ്ക്കാം. ഇതിനായി മുരിങ്ങയില ഉണക്കി പൊടിച്ച് സൂക്ഷിച്ചു വച്ചാല്‍ മതിയാകും.

മുടി കൊഴിച്ചില്‍ മാറാന്‍

മുടി കൊഴിച്ചില്‍ മാറാന്‍ മുരിങ്ങായില ഏറെ നല്ലതാണ്. ഇത് അരയ്ക്കുക. പുളിച്ച കഞ്ഞിവെള്ളം, അതായത് തലേന്നത്തെ കഞ്ഞിവെള്ളം ഇതില്‍ ചേര്‍ത്തിളക്കുക. ഇത് മുടിയില്‍ ഹെയര്‍ പായ്ക്കായി വയ്ക്കാം. ഇതില്‍ വേണമെങ്കില്‍ ഉലുവാപ്പൊടിയും വെളിച്ചെണ്ണയും കൂടി ചേര്‍ക്കാം. വരണ്ട മുടിയുള്ളവര്‍ക്ക് വെളിച്ചെണ്ണ ഗുണകരമാണ്. മുടി കൊഴിച്ചില്‍ നിര്‍ത്താനും മുടി വളരാനും തിളങ്ങാനും താരന്‍ പോലുള്ള പ്രശ്‌നങ്ങള്‍ അകലാനുമെല്ലാം ഇതേറെ ഗുണകരമാണ്.

പഴുത്ത പഴം

വരണ്ട മുടിയ്ക്കുള്ള നല്ലൊന്നാന്തരം പായ്ക്ക് മുരിങ്ങയില കൊണ്ടുണ്ടാക്കാം. മുരിങ്ങയില പൊടിച്ചതോ അരച്ചതോ എടുത്ത് ഇതില്‍ നല്ലതു പോലെ പഴുത്ത പഴം ചേര്‍ത്ത് അരയ്ക്കുക. ഇത് നല്ലൊരു മിശ്രിതമാക്കിയ ശേഷം ഒരു വലിയ സ്പൂണ്‍ ഒലീവ് ഓയില്‍ കൂടി ചേര്‍ത്തിളക്കി മുടിയില്‍ പുരട്ടാം. വരണ്ട മുടിയിഴകള്‍ക്ക് തിളക്കവും മിനുസവും നല്‍കാന്‍ ഇതേറെ നല്ലതാണ്. മുടിയ്ക്ക് സ്വാഭാവിക കണ്ടീഷണര്‍ ഗുണം നല്‍കുന്ന ഒന്നാണ് ഈ പ്രത്യേക പായ്ക്ക്.

ഹെയര്‍ പായ്ക്കായി
മുടി വളരാനുളള നല്ലൊരു പായ്ക്കും മുരിങ്ങയില കൊണ്ടുണ്ടാക്കാം. മുരിങ്ങയില പൊടിച്ചതും കറ്റാര്‍വാഴ ജെല്ലും ചേര്‍ത്തിളക്കാം. ഇത് മുടിയില്‍ പുരട്ടാം. ആവശ്യമെങ്കില്‍ ഇതിലേയ്ക്ക് വെളിച്ചെണ്ണ കൂടി ചേര്‍ത്തിളക്കാം. മുടിയുടെ ആരോഗ്യത്തിന് ഉത്തമമാണ് ഇത്. ഇവയൊന്നും ചേര്‍ത്തില്ലെങ്കില്‍ തന്നെയും മുരിങ്ങയുടെ ഇല അരച്ചത് ഹെയര്‍ പായ്ക്കായി പൊതിഞ്ഞ് വയ്ക്കാം. ഹെന്നയില്‍ മുരിങ്ങയില അരച്ചതോ പൊടിച്ചതോ ചേര്‍ക്കാം. മുടിയുടെ പല തരം പ്രശ്‌നങ്ങള്‍ക്കും ഇത് നല്ലതാണ്.

മുരിങ്ങയില, കറ്റാര്‍ വാഴ

മുഖത്തിനും വ്യത്യസ്ത രീതിയില്‍ പായ്ക്കുകളുണ്ടാക്കാം. മുരിങ്ങയില പൊടിയില്‍ തേനും പനിനീരും നാരങ്ങാനീരും ചേര്‍ത്തിളക്കി കുഴമ്പു രൂപത്തിലാക്കാം. ഇത് മുഖത്ത് പുരട്ടാം. പത്തു മിനിറ്റിന് ശേഷം ഇളം ചൂടുവെളളത്തില്‍ കഴുകാം. മുഖത്തിന് തിളക്കം നല്‍കാന്‍ മുരങ്ങയില, അരിപ്പൊടി, നാരങ്ങാനീര് മിശ്രിതം ചേര്‍ത്തിളക്കി മുഖത്തിടാം. ഇത് മുഖത്തിട്ട് മസാജ് ചെയ്ത് അല്‍പം കഴിയുമ്പോള്‍ കഴുകാം. മുഖത്തിന് സ്‌ക്രബര്‍ ഗുണം നല്‍കുന്ന ഒന്നാണിത്. അയഞ്ഞു തൂങ്ങിയ ചര്‍മത്തിന് ഇറുക്കം നല്‍കാന്‍ മുരിങ്ങയില, കറ്റാര്‍ വാഴ പായ്ക്ക് ഉപയോഗിയ്ക്കാം.