സ്‌പൈസി ചില്ലി ചിക്കന്‍ തയ്യാറാക്കാം....!

എല്ലാവരും വീട്ടില്‍ തയ്യാറാക്കുന്ന കറിയാണ് ചിക്കന്‍. പല തരം വെറൈറ്റി ചിക്കന്‍ കറി ഉണ്ടെങ്കിലും ചില്ലി ചിക്കന്‍ എപ്പോഴും എല്ലാവര്‍ക്കും ഇഷ്ടമുള്ള ഒന്നാണ്. സാധാരണ ചില്ലി ചിക്കനില്‍ നിന്നും അല്‍പ്പം വ്യത്യസ്തമാണ് ഈ ചില്ലി ചിക്കന്‍. എല്ലാവര്‍ക്കും ഇഷ്ടപ്പെടുന്ന നല്ല സ്വാദിഷ്ടമായ ചില്ലി ചിക്കന്‍ എങ്ങനെ തയ്യാറാക്കാം എന്ന്് നോക്കാം.

ചേരുവകള്‍

*ചിക്കന്‍ ചെറിയ കഷണങ്ങളാക്കിയത് - അര കിലോ

*സോയാസോസ് - ഒരു സ്പൂണ്‍

*ചില്ലി സോസ് - ഒരു സ്പൂണ്‍

*ടുമാറ്റോ സോസ് - ഒരു സ്പൂണ്‍

*വെളുത്തുള്ളി വട്ടത്തിലരിഞ്ഞത് - ഒരു സ്പൂണ്‍

*പച്ചമുളക് വട്ടത്തിലരിഞ്ഞത് - രണ്ടു സ്പൂണ്‍

*സവാള ചതുരത്തില്‍ അരിഞ്ഞത് - രണ്ട്

*ക്യാപ്സിക്കം അരിഞ്ഞത് - നാല്

*വിനാഗിരി - ഒരു സ്പൂണ്‍

*പഞ്ചസാര - ഒരു സ്പൂണ്‍

*എണ്ണ - അരകപ്പ്

തയാറാക്കുന്ന വിധം

സോസുകളും വിനാഗിരിയും ഉപ്പും ചേര്‍ത്ത് ഇളക്കി മാറ്റി വയ്ക്കുക. ഒരു പാനില്‍ എണ്ണ ഒഴിച്ച് ചൂടാക്കി അതില്‍ പഞ്ചസാര ചേര്‍ത്തു ബ്രൗണ്‍ നിറമാകും വരെ ഇളക്കുക. ഇതില്‍ വെളുത്തുള്ളിയും പച്ചമുളകും സവാളയും വഴറ്റിയെടുക്കുക. ഇതിലേക്ക് കോഴിക്കഷണങ്ങള്‍ ചേര്‍ത്തിളക്കി 5 മിനിറ്റ് മൂടിവച്ചു വേവിക്കുക. ഇതിലേക്ക് മാറ്റിവച്ചിരിക്കുന്ന സോസ് മിശ്രിതം ചേര്‍ത്തിളക്കി നന്നായി വേവിച്ചെടുക്കുക. വെന്തു വരുമ്പോള്‍ ക്യാപ്സിക്കം ചേര്‍ത്തിളക്കി എണ്ണയില്‍ നന്നായി വഴറ്റിയെടുക്കുക.