ഗായകനായി എത്തി അഭിനയത്തിലേക്ക് ചുവടുമാറ്റിയ താരമാണ് വിജയ് യേശുദാസ്. മലയാളത്തിലും തമിഴിലും ഉള്‍പ്പടെ നിരവധി ചിത്രങ്ങളില്‍ താരം അഭിനയിച്ചു. മണിരത്നം സംവിധാനം ചെയ്ത സൂപ്പര്‍ഹിറ്റ് ചിത്രം പൊന്നിയിന്‍ സെല്‍വനില്‍ താന്‍ അഭിനയിച്ച രംഗങ്ങള്‍ ഒഴിവാക്കി എന്ന് പറയുകയാണ് താരം. ഇന്ത്യാ ടുഡേ കോണ്‍ക്ലേവില്‍ സംസാരിക്കവെയായിരുന്നു ചലച്ചിത്രലോകത്തുനിന്ന് തനിക്ക് നേരിട്ട ചില തിരിച്ചടികളേക്കുറിച്ച് തുറന്നുപറഞ്ഞത്.
മണിരത്നത്തിന്റെ ബ്രഹ്മാണ്ഡ ചിത്രം 'പൊന്നിയിന്‍ സെല്‍വന്‍' ഒന്നാം ഭാഗത്തിന് വേണ്ടി തല മൊട്ടയടിക്കാന്‍ തയാറാവുകയും രംഗങ്ങള്‍ ചിത്രീകരിക്കുകയും ചെയ്തിട്ടും അവസാനം തന്റെ ഭാഗങ്ങള്‍ സിനിമയില്‍നിന്ന് ഒഴിവാക്കിയെന്നാണ് താരം പറഞ്ഞത്.
തമിഴ് ചിത്രമായ പടൈവീരന്റെ സംവിധായകന്‍ ധന ശേഖരന്‍ വഴിയാണ് താന്‍ പൊന്നിയിന്‍ സെല്‍വനില്‍ എത്തുന്നത്. നെഗറ്റീവ് ഷേഡുള്ള ഒരു കഥാപാത്രമുണ്ടെന്ന് ധനശേഖരന്‍ പറഞ്ഞിരുന്നു. എന്നാല്‍ അത് തനിക്ക് കിട്ടുമോ എന്ന് അറിയില്ലായിരുന്നു. ഒരിക്കല്‍ അദ്ദേഹം വിളിച്ചിട്ട് മണിസാറിനോട് എന്റെ കാര്യം സൂചിപ്പിച്ചിട്ടുണ്ടെന്ന് പറഞ്ഞു. നേരിട്ട് സംവിധായകനെ വിളിക്കാനും പറഞ്ഞു. ഞാന്‍ നേരെ രാജാമുന്‍ഡ്രിയിലേക്ക് ചെന്നു. ഗോദാവരി നദിയിലായിരുന്നു ആ സമയത്ത് ചിത്രീകരണം.
പ്രൊഡക്ഷന്‍ ടീമില്‍നിന്ന് വിളിച്ച് തല മൊട്ടയടിക്കേണ്ടിവരുമെന്ന് പറഞ്ഞു. ഞാന്‍ സമ്മതിച്ചു. കോസ്റ്റ്യൂമില്‍ നിര്‍ത്തി ചിത്രങ്ങളെടുത്ത് മണിരത്നം സാറിന് കൊടുത്തു. അദ്ദേഹത്തിനും ഒ.കെ ആയതോടെ പിറ്റേന്ന് രാവിലെ ഒരു ബോട്ട് രംഗം ചിത്രീകരിച്ചു. അതിനുശേഷം ഞാന്‍ തിരിച്ചുപോന്നു.ഒരുമാസത്തിനുശേഷം ഹൈദരാബാദിലേക്ക് ചിത്രീകരണത്തിന് വിളിപ്പിച്ചു. കുതിരസവാരി നടത്തുന്ന രംഗമായിരുന്നു ചിത്രീകരിക്കേണ്ടത്. വിക്രം സാറിനും കുതിരസവാരി രംഗം തന്നെയായിരുന്നു അന്നുണ്ടായിരുന്നത്. എന്നാല്‍ സിനിമയില്‍ തന്റെ രംഗങ്ങള്‍ ഒഴിവാക്കിയെന്നും അത് ധനശേഖരനെ അസ്വസ്ഥനാക്കിയെന്നും വിജയ് പറഞ്ഞു.
ബോളിവുഡിലെ ഒരു പാട്ടില്‍നിന്ന് ഒഴിവാക്കിയ വിവരവും അദ്ദേഹം പങ്കുവെച്ചു. അക്ഷയ് കുമാര്‍ നായകനായി എത്തിയ റൗഡി രാഥോര്‍ എന്ന ചിത്രത്തിനുവേണ്ടിയാണ് ഹിന്ദിയില്‍ ഗാനം ആലപിച്ചത്. ചെന്നൈയില്‍ ഒരു ഗാനം റെക്കോര്‍ഡ് ചെയ്തുകൊണ്ടിരിക്കെ സഞ്ജയ് ലീല ബന്‍സാലി പ്രൊഡക്ഷന്‍സില്‍നിന്ന് ഒരു ഫോണ്‍കോള്‍ വന്നു. ഹിന്ദിയിലെ കുറച്ചുകൂടി ജനപ്രീതിയുള്ള വേറൊരാളെവെച്ച് ഞാന്‍ പാടിയ പാട്ട് മാറ്റി റെക്കോഡ് ചെയ്തു എന്നാണ് അറിയിച്ചത്. ഇങ്ങനെയൊന്ന് പ്രതീക്ഷിച്ചിരുന്നെന്നും അതുകൊണ്ട് കുഴപ്പമില്ല എന്ന അവസ്ഥയിലായിരുന്നെന്നും വിജയ് യേശുദാസ് വ്യക്തമാക്കി.
മാരി, പടൈവീരന്‍, സാല്‍മണ്‍ 3ഡി തുടങ്ങി നിരവധി ചിത്രങ്ങളില്‍ വിജയ് യേശുദാസ് അഭിനയിച്ചിട്ടുണ്ട്.
Premium Lifestyle and Entertainment website
പ്രണയിച്ചിരുന്ന പെണ്‍കുട്ടിക്ക് പേരിനൊരു ഭര്‍ത്താവ് മതിയായിരുന്നു; വിവാഹത്തിന് എട്ട് ദിവസം മുമ്പാണ് വിവാഹം വേണ്ടെന്ന് വയ്ക്കുന്നത്; എല്ലാം ഏര്‍പ്പാട് ചെയ്തിരുന്നു; ലക്ഷങ്ങളുടെ നഷ്ടമാണ് ഉണ്ടായത്; വെളിപ്പെടുത്തി ബിഗ് ബോസ് താരം ജിന്റോ
ലാലേട്ടനുമായി ഒരു കോമ്പിനേഷന്‍ സീന്‍; മുണ്ടുടുക്കാനും അറിയാം ആവശ്യമെങ്കില്‍ മടക്കിക്കുത്താനും അറിയാം എന്ന ഡയലോഗ് പൃഥ്വിരാജ് പറഞ്ഞു; രാജുവേട്ടാ എന്റെ കഞ്ഞിയില്‍ പാറ്റ ഇടല്ലേ എന്ന് ഞാനും; എമ്പുരാനെ കുറിച്ച് ടൊവിനോ