മാതാപിതാക്കള്‍ ജോലിക്കാരായിരുന്നതിനാല്‍ നോക്കാന്‍ വേറെ ആളുകളെ നിയമിച്ചിരുന്നു; കുട്ടിയായിരുന്ന സമയത്ത് അഞ്ചോ ആറോ പേര്‍ എന്നെ ലൈംഗിക ചൂഷണത്തിന് ഇരയാക്കി; നടി വരലക്ഷ്മി ശരത്കുമാര്‍ ദുരനുഭവം പങ്ക് വച്ചപ്പോള്‍

തെന്നിന്ത്യന്‍ സിനിമയിലെ മുന്‍നിര നായികയാണ് വരലക്ഷ്മി ശരത്കുമാര്‍. മലയാളത്തിലടക്കം സാന്നിധ്യം അറിയിച്ചിട്ടുള്ള വരലക്ഷ്മി നടന്‍ ശരത്കുമാറിന്റെ മകളാണ്. നായികയായും വില്ലത്തിയായുമെല്ലാം വരലക്ഷ്മി കയ്യടി നേടിയിട്ടുണ്ട്.

കരിയറിന്റെ തുടക്കകാലത്ത് കാസ്റ്റിംഗ് കൗച്ചിന് പോലും വരലക്ഷ്മി ഇരയായിട്ടുണ്ട്. താരപുത്രിയായിരുന്നിട്ടും തനിക്ക് നേരിടേണ്ടി വന്ന ചോദ്യങ്ങളെക്കുറിച്ച് വരലക്ഷ്മി നേരത്തെ തുറന്ന് പറഞ്ഞിട്ടുണ്ട്. ഇപ്പോഴിതാ മറ്റൊരു ഞെട്ടിക്കുന്ന വെളിപ്പെടുത്തല്‍ നടത്തിയിരിക്കുകയാണ് വരലക്ഷ്മി

കുട്ടിക്കാലത്ത് താന്‍ ലൈംഗികാതിക്രമത്തിന് ഇരയായി എന്നാണ് ഒരു തമിഴ് റിയാലിറ്റി ഷോ വേദിയില്‍ കഴിഞ്ഞ ദിവസം വരലക്ഷ്മി പങ്ക് വച്ചത്.നടിയുടെ വാക്കുകളാണ് സൈബറിടത്തില്‍ ഇപ്പോള്‍ ചര്‍ച്ചയായി മാറുന്നത്. സ്വകാര്യ ചാനലിലെ ഡാന്‍സ് റിയാലിറ്റി ഷോയിലെ മത്സരാര്‍ഥി തന്റെ ജീവിതകഥ പറഞ്ഞപ്പോഴായിരുന്നു വരലക്ഷ്മിയുടെ തുറന്നുപറച്ചില്‍ .

ഞാനും നിന്നെപ്പോലെ തന്നെയാണ്. എന്റെ മാതാപിതാക്കള്‍ (നടന്‍ ശരത്കുമാര്‍, ഛായ) അന്ന് ജോലി ചെയ്യുന്നവരായിരുന്നു. അതുകൊണ്ട് തന്നെ എന്നെ നോക്കാന്‍ അവര്‍ വേറെ ആളുകളെ നിയമിച്ചിരുന്നു. ഞാന്‍ കുട്ടിയായിരുന്ന സമയത്ത് അഞ്ചോ ആറോ പേര്‍ എന്നെ ലൈം?ഗിക ചൂഷണത്തിന് ഇരയാക്കിയിട്ടുണ്ട്. നിന്റെ കഥ എന്റെയുമാണ്.

എനിക്ക് കുട്ടികളില്ല. പക്ഷേ, ഗുഡ് ടച്ചും ബാഡ് ടച്ചും എന്താണെന്ന് എല്ലാ മാതാപിതാക്കളും കുട്ടികളെ പഠിപ്പിക്കണമെന്ന് ഞാന്‍ പറയുന്നു'- വരലക്ഷ്മി ശരത്കുമാര്‍ പറഞ്ഞു. വരലക്ഷ്മിയെ പിന്തുണച്ച് നിരവധി പേരാണ് രംഗത്തെത്തിയിരിക്കുന്നത്.

കണ്ണീര്‍ പൊഴിച്ചു കൊണ്ടാണ് വരലക്ഷ്മി തന്റെ അനുഭവം പങ്കിട്ടത്. ക്യാമറയ്ക്ക് മുന്നില്‍ കരയുന്ന ശീലം തനിക്ക് ഇല്ലെന്നും പ്രേക്ഷകര്‍ മാപ്പാക്കണമെന്നും വരലക്ഷ്മി പറയുമ്പോള്‍ സഹ വിധികര്‍ത്താവായ സ്നേഹ ആശ്വസിപ്പിക്കുന്നുണ്ട്. വരലക്ഷ്മി മാപ്പ് പറയേണ്ടതില്ല. തന്റെ കഥ പങ്കിടാന്‍ കാണിച്ച ധീരതയെ അഭിനന്ദിക്കുകയാണ് വേണ്ടതെന്നുമാണ് സ്നേഹ പറയുന്നത്. വരലക്ഷ്മിയുടെ തുറന്നു പറച്ചില്‍ വാര്‍ത്തയായി മാറിയിരിക്കുകയാണ്.

മുന്‍പും താന്‍ നേരിട്ട ലൈംഗികാതിക്രമത്തെക്കുറിച്ച് വരലക്ഷ്മി തുറന്നുപറഞ്ഞിട്ടുണ്ട്. തന്റെ സേവ് ശക്തി ഫൗണ്ടേഷനിലൂടെ അതിജീവിതകള്‍ക്ക് പിന്തുണ നല്‍കുന്നതിനേക്കുറിച്ചും വരലക്ഷ്മി പലപ്പോഴായി സംസാരിക്കാറുണ്ട്.

12 വര്‍ഷങ്ങള്‍ക്ക് മുന്‍പ് ചിത്രീകരണം പൂര്‍ത്തിയാക്കിയ മധ ഗജ രാജ എന്ന ചിത്രമാണ് വരലക്ഷ്മിയുടേതായി ഒടുവില്‍ പ്രേക്ഷകരിലേക്കെത്തിയത്. ഈ പൊങ്കലിനാണ് ചിത്രം തിയറ്ററുകളിലെത്തിയത്. ചിത്രം സര്‍പ്രൈസ് ഹിറ്റായി മാറുകയായിരുന്നു.

നടന്‍ ശരത്കുമാറിന്റേയും ഛായയുടേയും മകളാണ് വരലക്ഷ്മി ശരത്കുമാര്‍. അച്ഛന്റെ പാതയിലൂടെ വരലക്ഷ്മിയും സിനിമയിലേക്ക് എത്തുകയായിരുന്നു.