വിജയ്ക്ക് പിന്നാലെ സിനിമയില്‍ നിന്ന് ഇടവേള നല്കാനൊരുങ്ങി തൃഷയും;  പുതിയ ലക്ഷ്യം നിര്‍മ്മാണ രംഗവും രാഷ്ട്രീയവുമെന്ന് റിപ്പോര്‍ട്ട് 

വിജയ്ക്ക് പിന്നാലെ സിനിമയില്‍ നിന്ന് ഇടവേള നല്കാനൊരുങ്ങി തൃഷയും.
താരവുമായി അടുത്ത വൃത്തങ്ങളില്‍ നിന്നുള്ള സൂചനകള്‍ പ്രകാരം, കഴിഞ്ഞ കുറച്ചുകാലമായി വളരെ തിരഞ്ഞെടുത്ത് മാത്രം സിനിമകള്‍ ചെയ്തുവന്ന തൃഷ, താന്‍ കരാര്‍ ഒപ്പുവെച്ചിട്ടുള്ള നിലവിലുള്ള ചിത്രങ്ങള്‍ പൂര്‍ത്തിയാക്കിയ ശേഷം അഭിനയരംഗത്തുനിന്ന് വിട്ടുനില്‍ക്കാന്‍ ആലോചിക്കുകയാണ്. വര്‍ഷങ്ങളായി സിനിമയില്‍ നിറഞ്ഞുനില്‍ക്കുന്ന പ്രമുഖ താരത്തിന്റെ ഈ പെട്ടെന്നുള്ള ഇടവേള ആരാധകരെയും ഒരേപോലെ അമ്പരപ്പിച്ചിരിക്കുകയാണ്.

അഭിനയത്തില്‍ നിന്ന് വിട്ടുനില്‍ക്കുന്നതോടൊപ്പം താരം പുതിയ ചില മേഖലകളിലേക്ക് ചുവടുവെക്കാന്‍ ഒരുങ്ങുന്നുവെന്നാണ് പുറത്തുവരുന്ന വിവരങ്ങള്‍. സിനിമാ നിര്‍മ്മാണ രംഗത്തേക്ക് കടക്കാനാണ് തൃഷയുടെ പ്രധാന തീരുമാനം. ഇതിനുപുറമെ താരം സജീവ രാഷ്ട്രീയത്തിലേക്ക് പ്രവേശിക്കുമെന്നുള്ള ശക്തമായ അഭ്യൂഹങ്ങളും സജീവമാണ്. തൃഷ രാഷ്ട്രീയത്തിലേക്ക് കടന്നുവരണമെന്ന് ആവശ്യപ്പെട്ട് അടുത്തിടെ മധുരയില്‍ പോസ്റ്ററുകള്‍ പതിപ്പിച്ചത് വലിയതോതില്‍ ശ്രദ്ധ നേടിയിരുന്നു. സിനിമയ്ക്ക് പുറത്ത് പുതിയ ലക്ഷ്യങ്ങളിലേക്ക് താരം തിരിയുന്നുവെന്ന വാര്‍ത്തകള്‍ സോഷ്യല്‍ മീഡിയയില്‍ വലിയ ചര്‍ച്ചകള്‍ക്കാണ് വഴിതുറന്നിരിക്കുന്നത്.

ഈ വര്‍ഷം സൂര്യ നായകനായെത്തിയ 'കറുപ്പ്' എന്ന ചിത്രമാണ് തൃഷയുടേതായി ഒടുവില്‍ പുറത്തിറങ്ങിയ സിനിമ. ഇതുകൂടാതെ 'ഗര്‍ജനൈ', 'ചതുരംഗ വേട്ടൈ-2' എന്നീ ചിത്രങ്ങളാണ് ഇനി പുറത്തിറങ്ങാനിരിക്കുന്നത്. തെന്നിന്ത്യന്‍ സൂപ്പര്‍താരം ചിരഞ്ജീവി നായകനാകുന്ന തെലുങ്ക് ചിത്രം 'വിശ്വംഭര'യാണ് തൃഷയുടെതായി അണിയറയില്‍ ഒരുങ്ങുന്ന മറ്റൊരു പ്രധാന സിനിമ. നിലവിലുള്ള ഈ സിനിമകളുടെ ജോലികള്‍ പൂര്‍ത്തിയാക്കിയ ശേഷമായിരിക്കും താരം പുതിയ തീരുമാനങ്ങളിലേക്ക് കടക്കുക.