'ഞാന്‍ തലക്കനമുള്ളവനാണ്, അഹങ്കാരിയാണ്, ക്ഷിപ്രകോപിയാണ്'; ഇങ്ങനെ പറഞ്ഞവരെല്ലാം എനിക്കുവേണ്ടി പ്രാര്‍ത്ഥിച്ചു; മനുഷ്യരുടെ സ്‌നേഹവും പരിചരണവുമാണ് യഥാര്‍ത്ഥ മൂലധനമെന്ന് മമ്മൂട്ടി 

മെഗാസ്റ്റാര്‍ മമ്മൂട്ടിയുടെ പൊതുവേദികളിലെ പ്രസംഗങ്ങള്‍ ശ്രദ്ധ നേടാറുണ്ട്. ഒരു ചാനല്‍ പരിപാടിയില്‍ അദ്ദേഹം നടത്തിയ പ്രസംഗമാണ് ഇപ്പോള്‍ സോഷ്യല്‍ മീഡിയയില്‍ വൈറലായിരിക്കുന്നത്. ആരോഗ്യപരമായ ബുദ്ധിമുട്ടുകളെ തുടര്‍ന്ന് പൊതുവേദികളില്‍ നിന്ന് വിട്ടുനിന്ന കാലഘട്ടത്തില്‍ തനിക്ക് ലഭിച്ച ജനങ്ങളുടെ സ്‌നേഹത്തെക്കുറിച്ചും പ്രാര്‍ത്ഥനകളെക്കുറിച്ചും മമ്മൂട്ടി മനസ്സുതുറന്നു. തന്നെ 'തലക്കനക്കാരന്‍', 'അഹങ്കാരി' എന്നൊക്കെ വിളിച്ചവര്‍ പോലും പ്രാര്‍ത്ഥിച്ചുവെന്നത് സന്തോഷം നല്‍കുന്ന കാര്യമാണെന്നും അദ്ദേഹം കൂട്ടിച്ചേര്‍ത്തു. 

മനുഷ്യരുടെ സ്‌നേഹവും പരിചരണവുമാണ് ഒരു വ്യക്തിയുടെ യഥാര്‍ത്ഥ മൂലധനമെന്ന് മമ്മൂട്ടി പ്രസംഗത്തില്‍ പറഞ്ഞു. ആരോഗ്യപ്രശ്‌നങ്ങളുണ്ടായപ്പോള്‍ പള്ളികളില്‍ മെഴുകുതിരി കൊളുത്തിയും, ദുആ ചെയ്തും, ക്ഷേത്രങ്ങളില്‍ പോയും പ്രാര്‍ത്ഥിക്കാത്ത മലയാളികളില്ലെന്നും അതില്‍ തനിക്ക് പൂര്‍ണ്ണ ബോധ്യമുണ്ടെന്നും അദ്ദേഹം വ്യക്തമാക്കി. ഈ അനുഭവം താന്‍ ലോകത്തിന് മുന്നില്‍ തെളിയിച്ചിട്ടുള്ളതാണെന്നും മമ്മൂട്ടി കൂട്ടിച്ചേര്‍ത്തു. 

തനിക്കെതിരെ തലക്കനമുള്ളവനാണ്, അഹങ്കാരിയാണ്, ക്ഷിപ്രകോപിയാണ് എന്നൊക്കെയുള്ള നിരവധി ആരോപണങ്ങളുണ്ടായിട്ടുണ്ട്. എന്നാല്‍, ഇങ്ങനെയൊക്കെ പറഞ്ഞവരെല്ലാം തനിക്ക് വേണ്ടി പ്രാര്‍ത്ഥിച്ചുവെന്നത് വളരെ സന്തോഷമുള്ള കാര്യമാണെന്ന് മമ്മൂട്ടി എടുത്തുപറഞ്ഞു. തന്റെ പേരായ 'മമ്മൂട്ടി' എങ്ങനെ വന്നു എന്നതിനെക്കുറിച്ചും അദ്ദേഹം വെളിപ്പെടുത്തി. മഹാരാജാസ് കോളേജില്‍ പഠിക്കുമ്പോള്‍ മുഹമ്മദ് കുട്ടി എന്ന പേര് തനിക്ക് അപരിഷ്‌കൃതമായി തോന്നിയിരുന്നു. 

അന്ന് പരിചയമില്ലാത്തവരോട് 'ഒമര്‍ ഷെരീഫ്' എന്നാണ് പറഞ്ഞിരുന്നത്, 'ഒമറേ' എന്ന് പലരും വിളിക്കുകയും ചെയ്തു. ഒരു ദിവസം കൂട്ടുകാരുമായി നടക്കുമ്പോള്‍ പോക്കറ്റില്‍ നിന്ന് തിരിച്ചറിയല്‍ കാര്‍ഡ് താഴെ വീണു. കാര്‍ഡ് എടുത്ത കൂട്ടുകാരന്‍ 'ഒമറല്ല, മമ്മൂട്ടി എന്നാണല്ലോ നിന്റെ പേര്' എന്ന് ചോദിച്ചതോടെയാണ് ഈ പേര് സുഹൃത്തുക്കള്‍ക്കിടയിലും പിന്നീട് പൊതുസമൂഹത്തിലും പ്രചരിച്ചതെന്ന് മമ്മൂട്ടി ഓര്‍ത്തെടുത്തു. 

പലരും പേരിട്ടത് തങ്ങളാണെന്ന് അവകാശപ്പെട്ടെങ്കിലും എടവനക്കാട് സ്വദേശിയായ ശശിധരനാണ് തന്റെ ഈ പേരിന് പിന്നിലെന്ന് തനിക്കറിയാമെന്നും, അദ്ദേഹത്തെ നാലാളുടെ മുന്നില്‍ പരിചയപ്പെടുത്താന്‍ വലിയ ആഗ്രഹമുണ്ടായിരുന്നെന്നും മെഗാസ്റ്റാര്‍ കൂട്ടിച്ചേര്‍ത്തു.