ഒറ്റമുറി വെളിച്ചത്തിന് ശേഷം നാല് ശക്തമായ സ്ത്രീ കഥാപാത്രങ്ങളുടെ കഥ പറയുന്ന ഡാകിനിയുമായി സംവിധായകൻ റിജി നായർ; അധോലോക നായകൻ മായനായി എത്തുന്ന ചെമ്പൻ വിനോദിന്റെ ലുക്ക് പുറത്ത്

ഒറ്റമുറി വെളിച്ചം എന്ന ചിത്രത്തിന് ശേഷം റിജി നായര്‍ സംവിധാനം ചെയ്യുന്ന ചിത്രമാണ് ഡാകിനി. ശക്തരായ സ്ത്രീകഥാപാത്രങ്ങളുടെ കഥപറയുന്ന ഡാകിനിയില്‍ പ്രേക്ഷകരെ അതിശയിപ്പിക്കുന്ന നിരവധി കഥാപാത്രങ്ങളുമായാണ് താരങ്ങള്‍ പ്രേക്ഷകര്‍ക്ക് മുമ്പിലേക്ക് എത്തുന്നത്.

 ചിത്രത്തില്‍ വില്ലന്‍ വേഷത്തില്‍ പ്രത്യക്ഷപ്പെടുന്ന ചെമ്പന്‍ വിനോദിന്റെ ലൂക്ക് അണിയറ പ്രവര്‍ത്തകര്‍ പുറത്തുവിട്ടു. മായന്‍ എന്ന അധോലോക നായകനായാണ് ചെമ്പന്‍ വിനോദ് വേഷമിടുന്നത്.സുഡാനി ഫ്രം നൈജീരിയ എന്ന ജനപ്രിയ ചിത്രത്തിലൂടെ പ്രേക്ഷകരുടെ മനസ്സില്‍ ഇടം നേടിയ സരസ ബാലുശ്ശേരിയും ശ്രീലത ശ്രീധരനും പ്രധാന വേഷങ്ങള്‍ കൈകാര്യം ചെയ്യുന്നു എന്നതാണ് ചിത്രത്തിന്റെ ഏറ്റവും വലിയ പ്രത്യേകത.ആരും പ്രതീക്ഷിക്കാത്ത മേക്ക് ഓവറിലാണ് ഇരുവരും ചിത്രത്തിലെത്തുക.ഇവര്‍ക്കൊപ്പം സേതു ലക്ഷ്മിയും പോളി വിത്സനും കൂടി എത്തുന്നതോടെ നാല് പേരുടേയും പടയൊരുക്കമാണ് ചിത്രത്തിന്റെ ഇതിവൃത്തം.പുള്ളിക്കാരന്‍ സ്റ്റാറാ എന്ന ചിത്രത്തിനു ശേഷം യൂണിവേഴ്സല്‍ സിനിമയുടെ ബാനറില്‍ ബി രാകേഷും തൊണ്ടിമുതലും ദൃക്‌സാക്ഷിക്കും ശേഷം ഉര്‍വശി തീയേറ്റേഴ്സിന്റെ ബാനറില്‍ സന്ദീപ് സേനനും അനീഷ് എം തോമസും ചേര്‍ന്ന് നിര്‍മ്മിക്കുന്ന ചിത്രം വിതരണം ചെയ്യുന്നത് വിജയ് ബാബുവിന്റെ ഫ്രൈഡേ ഫിലിം ഹൗസ് ആണ്.സുരാജ് വെഞ്ഞാറമൂട് , അലന്‍സിയര്‍ , ഇന്ദ്രന്‍സ് എന്നിവരും ചിത്രത്തില്‍ പ്രധാന വേഷത്തിലെത്തുന്നു.