അഭിഷേക് ബച്ചന്റെ ആസ്തിയുടെ മൂന്നിരട്ടിയോളം ആസ്തി;ഇന്ത്യയിലെ ഏറ്റവും ധനികയായ വനിതാ ചലച്ചിത്ര താരമായി ഐശ്വര്യ;  നടിക്കുള്ളത് 862 കോടിയുടെ സമ്പത്ത്

ഇന്ത്യന്‍ സിനിമയിലെ ധനികരായ നടിമാരുടെ ലിസ്റ്റ് പുറത്തുവിട്ടിരിക്കുകയാണ് വിവിധ ദേശീയമാധ്യമങ്ങള്‍.  ബോളിവുഡ് താരം ഐശ്വര്യ റായ് ആണ് പട്ടികയില്‍ ഒന്നാം സ്ഥാനത്തുള്ളത്. 25 വര്‍ഷത്തിലേറെയായി ചലച്ചിത്രരംഗത്തുള്ള ഐശ്വര്യയുടെ ആസ്തി ഏകദേശം 862 കോടി രൂപയാണെന്നാണ് റിപ്പോര്‍ട്ട്.

650 കോടിയുടെ ആസ്തിയുള്ള പ്രിയങ്ക ചോപ്രയാണ് പട്ടികയില്‍ രണ്ടാമത്. 550 കോടിയുമായി ആലിയ ഭട്ട്, 500 കോടിയുമായി ദീപിക പദുക്കോണ്‍, 485 കോടിയുമായി കരീന കപൂര്‍, 250 കോടി കോടി ആസ്തിയുള്ള കത്രീന കൈഫ് എന്നിവരാണ് പട്ടികയില്‍ പിന്നാലെയുള്ളത്. നയന്‍താരയാണ് ഈ പട്ടികയില്‍ ഇടംപിടിച്ച ഒരേയൊരു ദക്ഷിണേന്ത്യന്‍ നടി. 200 കോടിയാണ് നയന്‍താരയുടെ ആസ്തി.

തെന്നിന്ത്യന്‍ സിനിമകളുടെയും ഭാഗമായ ഐശ്വര്യ റായ് സിനിമയ്ക്കായി 10 കോടിയും പരസ്യ ചിത്രങ്ങള്‍ക്ക് ഏഴ് മുതല്‍ എട്ട് കോടിയും വരെ പ്രതിഫലം വാങ്ങാറുണ്ട് എന്നാണ് ദേശീയ മാധ്യമങ്ങള്‍ റിപ്പോര്‍ട്ട് ചെയ്യുന്നത്. ലോകമെമ്പാടും ആഡംബര വസ്തുവകകളും ഐശ്വര്യ സ്വന്തമാക്കിയിട്ടുണ്ട്. 15 കോടി മുടക്കി ദുബായിലെ ജുമൈറ ഗോള്‍ഫ് എസ്റ്റേറ്റില്‍ ഒരു വീട് ഐശ്വര്യ മുന്‍പ് സ്വന്തമാക്കിയിരുന്നു.

നിലവില്‍ ബാന്ദ്രയിലെ കുര്‍ള കോംപ്ലക്‌സിലുള്ള 5 ബെഡ്‌റൂം ബംഗ്ലാവിലാണ് ഐശ്വര്യ താമസിക്കുന്നത്. 21 കോടിയാണ് ഈ വീടിന്റെ മുടക്കുമുതല്‍. 2015-ല്‍ ഐശ്വര്യ വാങ്ങിയ ഈ വീടിന് ഇപ്പോള്‍ 50 കോടിക്ക് മുകളിലാണ് മൂല്യമെന്നും റിപ്പോര്‍ട്ട് പറയുന്നു. ഒരു ഇന്‍-ഹൗസ് ജിം, സ്വിമ്മിങ് പൂള്‍ അടക്കം നിരവധി സൗകര്യങ്ങളുണ്ട്.

ആഡംബര വാഹനങ്ങള്‍ ഒന്നിലധികം ഉള്ള താരത്തിന്റെ പക്കല്‍ റോള്‍സ് റോയ്സ് ഗോസ്റ്റ്, ഓഡി എ8എല്‍, മെഴ്സിഡസ് ബെന്‍സ് എസ്500, മെഴ്സിഡസ് ബെന്‍സ് എസ്350ഡി കൂപ്പ്, ലെക്സസ് എല്‍എക്‌സ് 570 തുടങ്ങിയവയും ഉണ്ട്.

ലോറിയല്‍, ആഡംബരവാച്ചായ സ്വിസ്, ലോഞ്ചിനസ്, ലക്സ്, കൊക്കക്കോള, പെപ്സി, ടൈറ്റന്‍ വാച്ചുകള്‍, ലാക്മി കോസ്മെറ്റിക്സ്, കാഷ്യോ പേജര്‍, ഫിലിപ്പ്സ്, പാമോലീവ്, കാഡ്ബെറി, ഫ്യൂജി ഫിലിംസ്, കല്യാണ്‍ ജുവല്ലേഴ്സ്, ടിടികെ പ്രസ്റ്റീജ് ഗ്രൂപ്പ് മുതലായ കമ്പനികളുമായുള്ള പരസ്യകരാറും ഐശ്വര്യക്കുണ്ട്.

ഭര്‍ത്താവും നടനുമായ അഭിഷേക് ബച്ചന്റെ ആസ്തിയുടെ മൂന്നിരട്ടിയോളം വരും ഐശ്വര്യയുടേത് എന്നതാണ് ശ്രദ്ധേയമായ കാര്യം. 280 കോടിയാണ് അഭിഷേകിന്റെ കയ്യിലുള്ളത്. രണ്‍വീര്‍ സിങ് (500 കോടി), രണ്‍ബീര്‍ കപൂര്‍ (345 കോടി), പ്രഭാസ് (200 കോടി) എന്നിവരാണ് സമ്പത്തിന്റെ കാര്യത്തില്‍ ഐശ്വര്യ പിന്നിലാക്കിയ നടന്മാര്‍.