ആ നടന് വേണ്ടി ഡബ്ബ് ചെയ്യാനാവില്ലെന്ന് ഞാന്‍ സംവിധായകനോട് പറഞ്ഞു; വെളിപ്പെടുത്തലുമായി ഷോബി തിലകന്‍

മലയാള മിനിസ്ക്രീൻ പ്രേക്ഷകർക്ക് ഏറെ പ്രിയങ്കരനായ താരമാണ് ഷോബി തിലകന്‍. ഒരു നടൻ എന്നതിലുപരി താരം ഒരു പ്രശസ്ത ഡബ്ബിംഗ് ആര്‍ടിസ്റ്റാണ്. മികച്ച രീതിയില്‍ തന്നെ ഒരോ വര്‍ക്കുകളും  പൂര്‍ത്തിയാക്കുന്ന അദ്ദേഹം താന്‍ ഡബ്ബ് ചെയ്യാന്‍ ബുദ്ധിമുട്ടിയ സന്ദര്‍ഭത്തെക്കുറിച്ച് ആണ് ഇപ്പോള്‍ തുറന്ന് പറയുന്നത്. ചെസ്സ് സിനിമയില്‍ നടന്‍ ആശിഷ് വിദ്യാര്‍ഥിക്ക് വേണ്ടി ഡബ്ബ് ചെയ്തിട്ട് ശരിയായില്ലെന്നും ഒരുപാട് നേരം ശ്രമിച്ചിട്ടും ലിപ് സിങ്കാക്കാനായില്ലെന്നും ഷോബി പറഞ്ഞു.

 ‘ആശിഷ് വിദ്യാര്‍ഥിക്ക് വേണ്ടി ചെസ്സ് എന്ന സിനിമയിലാണ് ഞാന്‍ ഡബ്ബ് ചെയ്യാന്‍ പോയത്. പക്ഷേ എനിക്ക് ഒരു രക്ഷയുമില്ല. കാരണം, പുള്ളിക്കാരന് മലയാളം അറിയില്ല. അദ്ദേഹം ഡയലോഗുകളുടെ ആദ്യ വാക്ക് മാത്രമേ പറയാറുള്ളു. ബാക്കിയുള്ളത് പറയില്ല. ലിപ്പ് സിങ്ക് മാത്രം. അത് മുഴുവന്‍ നമ്മള്‍ ഡയലോഗുകളില്‍ സിങ്ക് ചെയ്യണം.

ആ മീറ്ററില്‍ തന്നെ പിടിച്ചില്ലെങ്കില്‍ കിട്ടില്ല. അദ്ദേഹത്തിന്റെ ലിപ്പ് സിങ്ക് ചെയ്യണമെങ്കില്‍ മലയാളം വലിച്ച് പറയണം, എന്നാല്‍ മാത്രം സിങ്ക് ആവുകയുള്ളു. ഒരുപാട് നേരം ശ്രമിച്ചിട്ടും എനിക്ക് ചെയ്യാന്‍ കഴിയുന്നുണ്ടായിരുന്നില്ല. അവസാനം ഞാന്‍ സംവിധായകനോട് എനിക്ക് പറ്റില്ല, ഇത് നടക്കില്ല എന്ന് പറഞ്ഞു.

വെറുതെ തിരിച്ചയക്കാന്‍ സംവിധായകന് താല്‍പര്യമില്ലായിരുന്നത് കൊണ്ട് സിനിമയില്‍ ഡി.ഐ.ജി വേഷം ചെയ്ത ജഗനാഥന്‍ വര്‍മ സാറിന് വേണ്ടി ഡബ്ബ് ചെയ്തിട്ട് പോയാല്‍ മതി എന്ന് പറഞ്ഞു. അങ്ങനെ ആ സിനിമയില്‍ ഞാനാണ് വര്‍മ സാറിന് വേണ്ടി ഡബ്ബ് ചെയ്തത്.