ഐഫോണ്‍ ഡ്യുവോ'യെ പ്രതിരോധിക്കാന്‍ സാംസങ് പുറത്തിറക്കിയത് 'ഗാലക്സി ഇസഡ് ഫോള്‍ഡ് 8'; ഫോള്‍ഡബിള്‍ യുദ്ധത്തില്‍ മല്‍പിടുത്തം: ഗാലക്സി ഇസഡ് ഫോള്‍ഡ് 8 - ഐഫോണ്‍ ഡ്യുവോ പോരാട്ടം ശക്തം 

ടെക് ലോകം ഏറെ ആകാംക്ഷയോടെ കാത്തിരുന്ന മടക്കാവുന്ന (Foldable) സ്മാര്‍ട്ട്‌ഫോണ്‍ വിപണിയിലേക്ക് ആപ്പിളും ചുവടുവെച്ചതോടെ പോരാട്ടം കനക്കുന്നു. ആപ്പിളിന്റെ കന്നി മോഡലായ 'ഐഫോണ്‍ ഡ്യുവോ'യെ പ്രതിരോധിക്കാന്‍ സാംസങ് തങ്ങളുടെ ഏറ്റവും പുതിയ 'ഗാലക്സി ഇസഡ് ഫോള്‍ഡ് 8' പുറത്തിറക്കി കഴിഞ്ഞു. വര്‍ഷങ്ങളുടെ പരിചയസമ്പത്തുമായി സാംസങ്ങും, പുതുമകളോടെ ആപ്പിളും മാറ്റുരയ്ക്കുമ്പോള്‍ ഉപഭോക്താക്കള്‍ക്കായി ഇരുഫോണുകളും വാഗ്ദാനം ചെയ്യുന്ന പ്രധാന നാല് വീതം മികച്ച ഫീച്ചറുകള്‍ താഴെ പറയുന്നവയാണ്: 

സാംസങ് ഗാലക്സി ഇസഡ് ഫോള്‍ഡ് 8 മുന്നിട്ടുനില്‍ക്കുന്ന 4 മേഖലകള്‍: കൈയിലൊതുങ്ങുന്ന ഭാരക്കുറവ്: ഫോള്‍ഡബിള്‍ ഫോണുകളുടെ വലിയ പോരായ്മയായിരുന്ന ഭാരം സാംസങ് ഗണ്യമായി കുറച്ചിട്ടുണ്ട്. വെറും 201 ഗ്രാം മാത്രമാണ് ഫോള്‍ഡ് 8-ന്റെ ഭാരം. എന്നാല്‍ 254 ഗ്രാം ഭാരമുള്ള ഐഫോണ്‍ ഡ്യുവോയേക്കാള്‍ 26 ശതമാനം ഭാരക്കുറവ് സാംസങ്ങിനുണ്ട് എന്നത് വലിയ സൗകര്യമാണ്. 

വൈവിധ്യമാര്‍ന്ന നിറങ്ങള്‍: ഉപഭോക്താക്കള്‍ക്ക് കൂടുതല്‍ കളര്‍ ഓപ്ഷനുകള്‍ സാംസങ് നല്‍കുന്നു. ഗ്രാഫൈറ്റ്, ക്രീം, ലാവെന്‍ഡര്‍, പിസ്ത തുടങ്ങി നാല് ആകര്‍ഷകമായ നിറങ്ങളില്‍ ഫോള്‍ഡ് 8 ലഭ്യമാകും. എന്നാല്‍ ആപ്പിള്‍ രണ്ട് കളര്‍ വേരിയന്റുകള്‍ മാത്രമാണ് നല്‍കുന്നത്. 

വിലക്കുറവും മിതമായ നിരക്കും: പ്രീമിയം മടക്കാവുന്ന ഫോണുകളുടെ ഉയര്‍ന്ന വില സാംസങ്ങിലും ഉണ്ടെങ്കിലും ആപ്പിളിനെ അപേക്ഷിച്ച് പോക്കറ്റ് കീറില്ല. ഐഫോണ്‍ ഡ്യുവോയേക്കാള്‍ ഏകദേശം 300 പൗണ്ട് / 200 ഡോളര്‍ കുറവില്‍ സാംസങ് ഫോള്‍ഡ് 8 സ്വന്തമാക്കാനാകും. യഥാര്‍ത്ഥ ഇന്‍-ഡിസ്‌പ്ലേ സെല്‍ഫി ക്യാമറ: ആപ്പിളിന്റെ അണ്ടര്‍-ഡിസ്‌പ്ലേ സെല്‍ഫി ക്യാമറ ആശയത്തില്‍ ആകര്‍ഷണീയതയുണ്ടെങ്കിലും ഇമേജ് ക്വാളിറ്റിയില്‍ സാംസങ്ങിന്റെ പരീക്ഷണ രീതി തന്നെയാണ് മികച്ചത്. കൃത്യമായ വെളിച്ചവും കൂടുതല്‍ വ്യക്തതയുമുള്ള ചിത്രങ്ങള്‍ സാംസങ്ങിന്റെ ഇന്റേണല്‍ ക്യാമറ നല്‍കും.

 ആപ്പിള്‍ ഐഫോണ്‍ ഡ്യുവോ നല്‍കുന്ന 4 വന്‍ മുന്‍തൂക്കങ്ങള്‍: കപ്രീമിയവും ശക്തവുമായ നിര്‍മ്മിതി: ഐഫോണ്‍ ഡ്യുവോയുടെ ഭാരക്കൂടുതലിന് കാരണം അതിന്റെ കരുത്തുറ്റ നിര്‍മ്മാണമാണ്. ടൈറ്റാനിയം ബോഡി, പോറലുകളെ പ്രതിരോധിക്കുന്ന ഇന്നര്‍ ഡിസ്‌പ്ലേ, സെറാമിക് ഷീല്‍ഡ്, തടസ്സമില്ലാത്ത വിപുലമായ ഹിഞ്ച് ഫീച്ചറുകള്‍ എന്നിവയ്‌ക്കൊപ്പം ഐപി68 (IP68) വാട്ടര്‍ റെസിസ്റ്റന്‍സും ആപ്പിള്‍ വാഗ്ദാനം ചെയ്യുന്നു. 

മികച്ച ക്യാമറ പ്രകടനം: രണ്ട് ഫോണുകളിലും ഡ്യുവല്‍ ക്യാമറ സെറ്റപ്പാണുള്ളതെങ്കിലും വലിയ 48 മെഗാപിക്സല്‍ (1/1.28') പ്രധാന സെന്‍സറുമായി എത്തുന്ന ഐഫോണ്‍ ഡ്യുവോ സാംസങ്ങിന്റെ 50 മെഗാപിക്സല്‍ (1/1.56') സെന്‍സറിനേക്കാള്‍ മികച്ച ഫോട്ടോകള്‍ പകര്‍ത്താന്‍ പ്രാപ്തമാണ്. 

ആകര്‍ഷകമായ സോഫ്‌റ്റ്വെയര്‍ ക്രമീകരണം: രണ്ട് സ്‌ക്രീനുകള്‍ തമ്മിലുള്ള ഉപയോഗം കൂടുതല്‍ എളുപ്പമാക്കുന്ന മികച്ച ആനിമേഷനുകള്‍, പുനഃക്രമീകരിച്ച ഹോം സ്‌ക്രീന്‍, മികച്ച തേഡ്-പാര്‍ട്ടി ആപ്പ് പിന്തുണ എന്നിവ വഴി ആപ്പിള്‍ തങ്ങളുടെ സോഫ്‌റ്റ്വെയര്‍ അനുഭവം അതിമനോഹരമാക്കിയിട്ടുണ്ട്. മാഗ് സേഫ് (Qi2) വയര്‍ലെസ് ചാര്‍ജിംഗ്: മാഗ്നറ്റിക് ചാര്‍ജിംഗിനും അനുബന്ധ ആക്‌സസറികള്‍ക്കും അനുയോജ്യമായ Qi2 സ്റ്റാന്‍ഡേര്‍ഡ് ഐഫോണ്‍ ഡ്യുവോയില്‍ ഇന്‍-ബില്‍റ്റായി നല്‍കിയിട്ടുണ്ട്. 

പ്രത്യേക കേസുകളില്ലാതെ സാംസങ്ങില്‍ ഇത് ഉപയോഗിക്കാന്‍ കഴിയില്ല. മടക്കാവുന്ന ഫോണ്‍ വിപണിയില്‍ മുന്‍ പരിചയത്തിന്റെ കരുത്തുമായി സാംസങ്ങും, പ്രീമിയം ലുക്കും ഡിസൈന്‍ മികവുമായി ആപ്പിളും പോരാടുമ്പോള്‍ ഇരു ബ്രാന്‍ഡുകളും ഉപഭോക്താക്കള്‍ക്ക് തനതായ അനുഭവങ്ങളാണ് സമ്മാനിക്കുന്നത്.