അമ്മയെ വിട്ടുമാറാത്ത കുട്ടി

അമ്മയുടെ വസ്ത്രത്തില്‍ തൂങ്ങി അമ്മയെ വിട്ടുമാറാത്ത കുട്ടികള്‍ ധാരാളമാണ്. കുഞ്ഞിനെ ഒരു നിമിഷംപോലും വിട്ടുമാറാത്ത അമ്മമാര്‍ തന്നെയാണ് ഇതിനുത്തരവാദികള്‍.

കുഞ്ഞുങ്ങള്‍ക്ക് സ്വേച്ഛാനുസരണം പ്രവര്‍ത്തിക്കാനുള്ള കഴിവ് ചെറുപ്രായത്തിലേ നല്‍കണം. കുഞ്ഞിന് കളിക്കാന്‍ അവസരം നല്‍കുന്നതുപോലെ മറ്റു കുട്ടികളുമായോ സ്നേഹമുള്ള അഭ്യുദയകാംക്ഷികളുമായോ സമയം ചെലവഴിക്കാനും അവസരം കൊടുക്കണം.

പരിഹാരമാര്‍ഗങ്ങള്‍

1. കുട്ടിയെ തുടക്കത്തില്‍ അല്‍പസമയത്തേക്കും പിന്നീട് മണിക്കൂറുകളോളവും മറ്റ് കുട്ടികളോടൊപ്പം പ്ലേ സ്‌കൂളിലോ ഡേകെയര്‍ സെന്ററിലോ വിടുക. ഇങ്ങനെ വിടുമ്പോള്‍ രക്ഷിതാവ് ആ സമയം എന്തു ചെയ്യുന്നുവെന്നും എവിടെയായിരിക്കുമെന്നും കുട്ടിയോട് പറയണം.
2. അമ്മ കുറെ സമയം കഴിഞ്ഞുവരുമെന്ന് പറയാന്‍ മറക്കരുത്. പറയുന്ന സമയത്ത് ചെല്ലുകയും വേണം. ഇത് പ്രധാന കാര്യമാണ്.
3. കുട്ടികള്‍ക്ക് കളിയിലേര്‍പ്പെടുന്നതാണ് എപ്പോഴും ഇഷ്ടം. അതുകൊണ്ട് ഈ സമയത്ത് ധാരാളം ആക്ടിവിറ്റി കിട്ടുന്നുവെന്നുറപ്പാക്കണം.
4. രക്ഷിതാവ് ദിവസങ്ങളോളം മാറിനില്‍ക്കേണ്ടി വരുമ്പോള്‍ ആ വേര്‍പാട് നേരിടാന്‍ കുട്ടിയെ തയാറാക്കിയിരിക്കണം.