അറുപതില്‍, ജീവിതത്തിന്റെ തിരശ്ശീല വീഴുന്നതായിട്ടൊന്നും തോന്നുന്നില്ല;  ഇനി മറ്റൊരു വലിയ തുടക്കത്തിന്റെ  ആവശ്യകതയും അനുഭവപ്പെടുന്നില്ല; ഞാന്‍ എന്റെതാക്കി മാറ്റിയ ഒരു ജീവിതത്തിനുള്ളിലാണ് ഇപ്പോള്‍; അറുപത് തികഞ്ഞ സന്തോഷത്തില്‍ കുറിപ്പുമായി സജിതാ മഠത്തില്‍

സിനിമാതാരമെന്നും എഴുത്തുകാരിയെന്നും നര്‍ത്തകിയെന്നും നാടകക്കാരിയെന്നും അറിയപ്പെടുന്ന താരമാണ് ഡോ സജിതാ മഠത്തില്‍. സാമൂഹിക മാധ്യമങ്ങളിലും സജീവമായ താരം അറുപത് വയസിലെത്തിയ സന്തോഷം പങ്ക് വച്ച് എഴുതിയ കുറിപ്പ് ശ്രദ്ധേയമാവുകയാണ്.

അറുപതില്‍, ജീവിതത്തിന്റെ തിരശ്ശീല വീഴുന്നതായിട്ടൊന്നും തനിക്ക് തോന്നുന്നില്ലെന്നും, അതുപോലെ, ഇനി മറ്റൊരു വലിയ തുടക്കത്തിന്റെ ആവശ്യകതയും തനിക്ക് അനുഭവപ്പെടുന്നില്ലെന്നും നടി സജിത മഠത്തില്‍ കുറിച്ചു.

സജിത മഠത്തിലിന്റെ കുറിപ്പ്

അറുപതില്‍, ജീവിതത്തിന്റെ തിരശ്ശീല വീഴുന്നതായിട്ടൊന്നും എനിക്ക് തോന്നുന്നില്ല.അതുപോലെ, ഇനി മറ്റൊരു വലിയ തുടക്കത്തിന്റെആവശ്യകതയും എനിക്ക് അനുഭവപ്പെടുന്നില്ല.ഞാന്‍ എന്റെതാക്കി മാറ്റിയ ഒരു ജീവിതത്തിനുള്ളിലാണ് ഇപ്പോള്‍ തന്നെ.

നിശബ്ദത ആസ്വദിക്കാന്‍ ആള്‍കൂട്ടത്തില്‍ കാഴ്ചകാരിയാവാന്‍ ആഘോഷങ്ങള്‍ സ്വയം കണ്ടെത്താന്‍ അസ്വസ്ഥതയില്‍ നിന്ന് തെന്നിമാറാന്‍ എന്നെ പഠിപ്പിച്ചതിനു നന്ദി പിഎച്ച്ഡി എടുത്തതു നാടകത്തില്‍ ആണെങ്കിലും!

യാത്രകള്‍ വിവിധ തൊഴിലുകള്‍ കൂടു മാറ്റങ്ങള്‍ ദേശങ്ങള്‍ സ്ഥായിയായ, നിശ്ചലമായ ഒരിടം എന്നെ അസ്വസ്ഥതപെടുത്തും എന്ന തിരിച്ചറിവിനും വയസ്സായി

മനുഷ്യബന്ധങ്ങളിലെ ഊഷ്മളതയില്‍ ഞാന്‍ ഇറുക്കി പിടിക്കുകയും, അതിന്റെ ശ്വാസം മുട്ടലില്‍ ഓടി ഒളിക്കുകയും ചെയ്തു കൊണ്ടിരിക്കുന്നു.

സൗഹൃദങ്ങള്‍ കൊണ്ടു മാലയിടാന്‍,കൂട്ടിന്റെ സ്‌നേഹത്തില്‍ പൊട്ടുതൊടാന്‍ഊഷ്മളതയുടെ നിറപ്പാകിട്ടാര്‍ന്ന വസ്ത്രങ്ങള്‍ ധരിക്കാന്‍ എനിക്കെന്നും ഇഷ്ടമാണ്

അമ്മസ്‌നേഹത്തില്‍ അച്ഛന്‍ ഓര്‍മ്മചില്ലകളില്‍ കെട്ടിപിടിച്ചു ജീവിതം അവന്റെ അമ്മ എന്ന വിളിയില്‍ ഒരുകി ഒലിച്ചു..

കയ്യടിയും നിശ്ശബ്ദതയും ഞാന്‍ അറിഞ്ഞിട്ടുണ്ട്,നിശ്ചയവും സംശയവും അറിഞ്ഞിട്ടുണ്ട്,ആളുകളെക്കൊണ്ട് നിറഞ്ഞ വേദികളും മുറികളും,ഒറ്റയ്ക്ക് നടക്കേണ്ടിവന്ന വഴികളും.

പല സ്ത്രീകളായി ഞാന്‍ വേഷമിട്ടിട്ടുണ്ട്,മറ്റുള്ളവര്‍ എഴുതിയ വാക്കുകള്‍ സംസാരിച്ചിട്ടുണ്ട്,ചിലപ്പോഴൊക്കെ അവരുടെ ജീവിതങ്ങള്‍ക്കുള്ളില്‍എന്റെ തന്നെ ചില അംശങ്ങള്‍ഒളിഞ്ഞിരിക്കുന്നതും കണ്ടെത്തിയിട്ടുണ്ട്.

ഞാന്‍ മാറ്റിയ ചില കാര്യങ്ങളുണ്ട്,എന്നെ മാറ്റിയ ചില കാര്യങ്ങളുണ്ട്,ഞാന്‍ പോരാടിയ ചില കാര്യങ്ങളുണ്ട്,ഒടുവില്‍ വിട്ടുകളയാന്‍ പഠിച്ച ചില കാര്യങ്ങളും.

അറുപത് ജീവിതം നല്‍കിയ അക്കങ്ങള്‍ സന്തോഷത്തോടെ സ്വീകരിക്കുന്നു