ഇത്തരത്തിലുള്ള സംഭവം മനഃപൂര്‍വമല്ല; പലപ്പോഴും ഇതിന് പിന്നില്‍ പലരുടേയും ഭാഗത്ത് നിന്നുള്ള നിയന്ത്രണക്കുറവ് ആകാം; ഇങ്ങനെ ഉണ്ടാവാതെ ഇരിക്കാന്‍ മുന്‍കരുതലുകള്‍ എടുക്കണം; കരൂര്‍ വിഷയത്തില്‍ ഋഷഭ് ഷെട്ടി

തമിഴകത്തിലെ കരൂരില്‍ നടന്‍ വിജയ് നടത്തിയ രാഷ്ട്രീയ പ്രചാരണ റാലിക്കിടെ ഉണ്ടായ ദാരുണമായ തിരക്കില്‍ 41 പേര്‍ ജീവന്‍ നഷ്ടപ്പെട്ട സംഭവം രാജ്യത്ത് വലിയ ചര്‍ച്ചയായിരിക്കുകയാണ്. ഈ സംഭവത്തെക്കുറിച്ച് തന്റെ അഭിപ്രായം പ്രകടിപ്പിച്ച് കന്നഡ നടനും സംവിധായകനുമായ ഋഷഭ് ഷെട്ടി പറഞ്ഞു, ഇതൊരു വ്യക്തിയുടെ തെറ്റല്ല, കൂട്ടായ പിഴവാണ് എന്നാണ്. എന്‍ഡിടിവിയ്ക്ക് നല്‍കിയ അഭിമുഖത്തിലാണ് ഋഷഭ് ഷെട്ടി പ്രതികരിച്ചത്. 'ഇത്തരത്തിലുള്ള സംഭവങ്ങള്‍ മനഃപൂര്‍വമല്ല. പലപ്പോഴും ഇതിന് പിന്നില്‍ പലരുടേയും ഭാഗത്ത് നിന്നുള്ള അശ്രദ്ധയോ നിയന്ത്രണക്കുറവോ ആയിരിക്കും കാരണമാകുന്നത്,' അദ്ദേഹം പറഞ്ഞു.

താരാരാധനയും ജനക്കൂട്ടങ്ങളുടെ ആവേശവും ചിലപ്പോള്‍ നിയന്ത്രണാതീതമാകാറുണ്ടെന്നും, അത്തരം സാഹചര്യങ്ങളില്‍ അപകടസാധ്യതകള്‍ കൂടുന്നതാണെന്നും ഋഷഭ് വ്യക്തമാക്കി. ''ഒരു നായകനെ നമുക്ക് ഇഷ്ടമായാല്‍ അവനെ ആരാധിക്കുന്നത് സ്വാഭാവികമാണ്. പക്ഷേ അത് സുരക്ഷയെ ബാധിക്കുന്നതാകരുത്. നമുക്ക് മുന്‍കരുതലുകള്‍ എടുക്കണം,'' അദ്ദേഹം കൂട്ടിച്ചേര്‍ത്തു.

പോലീസിനെയും ഭരണകൂടത്തെയും കുറ്റപ്പെടുത്തുന്നത് എളുപ്പമാണെങ്കിലും, വലിയ ജനക്കൂട്ടത്തെ നിയന്ത്രിക്കുക എത്ര പ്രയാസമുള്ള കാര്യമാണെന്ന് മനസിലാക്കണമെന്നും ഋഷഭ് പറഞ്ഞു. ''ഇത് ആരുടെയെങ്കിലും മനഃപൂര്‍വമായ തെറ്റല്ല, നിയന്ത്രണം നഷ്ടപ്പെട്ട ഒരു അപകടമാണ്,'' എന്ന് അദ്ദേഹം വ്യക്തമാക്കി.