വലിച്ചു കൊണ്ടിരുന്ന സിഗരറ്റ് കെനീഷയുമായി പങ്കുവെച്ച് രവി മോഹന്‍; ഇരുവരും വലിക്കുന്നത് കഞ്ചാവ് ആണെന്ന് സോഷ്യല്‍ മീഡിയയില്‍ ആരോപണം; വീഡിയോ പുറത്തുവന്നതോടെ നടനെ വിമര്‍ശിച്ചും പിന്തുണച്ചും ആരാധകരുടെ വാക്പോര് 

നടന്‍ രവി മോഹനും ഗായിക കെനീഷ ഫ്രാന്‍സിസും ഉള്‍പ്പെട്ട പുതിയ ദൃശ്യങ്ങള്‍ സമൂഹമാധ്യമങ്ങളില്‍ പ്രചരിച്ചതോടെ താരത്തിന്റെ സ്വകാര്യ ജീവിതവും വിവാഹമോചന തര്‍ക്കങ്ങളും വീണ്ടും കടുത്ത വിവാദങ്ങളിലേക്ക് വഴിമാറുകയാണ്. പുകവലിച്ചുകൊണ്ടിരുന്ന സിഗരറ്റ് ഇരുവരും പങ്കുവെക്കുന്ന ദൃശ്യങ്ങളാണ് എക്സ് (ട്വിറ്റര്‍) ഉള്‍പ്പെടെയുള്ള പ്ലാറ്റ്‌ഫോമുകളില്‍ വൈറലായത്. ഇരുവരും ഉപയോഗിക്കുന്നത് കഞ്ചാവാണെന്ന ഗുരുതര ആരോപണമാണ് സോഷ്യല്‍ മീഡിയയില്‍ ഒരു വിഭാഗം ഉയര്‍ത്തുന്നത്. 

എന്നാല്‍ ഈ വീഡിയോയുടെ ആധികാരികത സ്ഥിരീകരിക്കപ്പെട്ടിട്ടില്ലെന്നും ഇത് എ.ഐ സാങ്കേതികവിദ്യ ഉപയോഗിച്ച് നിര്‍മ്മിച്ചതാണോ എന്നതില്‍ വ്യക്തതയില്ലെന്നും റിപ്പോര്‍ട്ടുകള്‍ ചൂണ്ടിക്കാട്ടുന്നു. വിഷയം കത്തിപ്പടരുമ്പോഴും ജയം രവിയുടെ ഭാഗത്തുനിന്ന് ഔദ്യോഗിക പ്രതികരണങ്ങളൊന്നും പുറത്തുവന്നിട്ടില്ല. ദൃശ്യങ്ങള്‍ പ്രചരിച്ചതോടെ സോഷ്യല്‍ മീഡിയയില്‍ ആരാധകര്‍ ഇരുചേരിയായി തിരിഞ്ഞ് വലിയ വാദപ്രതിവാദങ്ങളിലാണ് ഏര്‍പ്പെട്ടിരിക്കുന്നത്. ഭാര്യ ആരതി രവിയുമായുള്ള വേര്‍പിരിയല്‍ ഘട്ടത്തില്‍ ജയം രവിയെ പിന്തുണച്ചിരുന്ന പല ആരാധകരും നിലപാട് മാറ്റിയതായി വ്യക്തമാക്കുന്നു. 

നടനോടുണ്ടായിരുന്ന ബഹുമാനം നഷ്ടപ്പെട്ടെന്നും, വിഷാദരോഗത്തെക്കുറിച്ചും സാമ്പത്തിക ചൂഷണത്തെക്കുറിച്ചും മുന്‍പ് നല്‍കിയ പ്രസ്താവനകള്‍ ജനങ്ങളുടെ സഹതാപം നേടാനുള്ള തന്ത്രമായിരുന്നോ എന്ന് സംശയിക്കുന്നതായും പലരും കുറ്റപ്പെടുത്തുന്നു. എന്നാല്‍ മറുഭാഗത്ത്, ഒരു വ്യക്തിയുടെ സ്വകാര്യ ശീലങ്ങളോ സിഗരറ്റ് പങ്കുവെക്കുന്നതോ വച്ച് അവരുടെ വ്യക്തിത്വത്തെയും നിലപാടിനെയും അളക്കാനാകില്ലെന്ന വാദവുമായി മറ്റ് ചിലരും രംഗത്തുണ്ട്. 

'വിവാഹമോചന വാര്‍ത്ത പുറത്തുവന്നപ്പോള്‍ ജയം രവിയെ അനുകൂലിച്ചു സംസാരിച്ചയാളാണ് ഞാന്‍. കാരണം അന്ന് അദ്ദേഹത്തിന്റെ ഭാഗത്താണ് ന്യായമെന്ന് ഞാന്‍ ആത്മാര്‍ഥമായി വിശ്വസിച്ചിരുന്നു. എന്നാല്‍ ഇപ്പോള്‍ അദ്ദേഹത്തിന്റെ വിഡിയോകള്‍ കാണുമ്പോള്‍ കാര്യങ്ങള്‍ എത്രത്തോളം മാറിമറിഞ്ഞു എന്ന് തിരിച്ചറിയുന്നു. എല്ലാം ഈ രീതിയിലാണ് കലാശിക്കുന്നതെന്ന് കാണുമ്പോള്‍ വലിയ നിരാശ തോന്നുന്നുണ്ട്; അദ്ദേഹത്തോടുണ്ടായിരുന്ന ബഹുമാനം പൂര്‍ണമായും നഷ്ടപ്പെടുകയും ചെയ്തു. ഓരോ ദിവസം കഴിയുന്തോറും രവിയോടുള്ള എന്റെ കാഴ്ചപ്പാട് തന്നെ മാറുകയാണ്.'' -പുറത്തായ വിഡിയോ പങ്കുവച്ച് ഒരു പ്രേക്ഷകന്‍ കുറിച്ചത്. 

''ജയം രവിയുടെ വിവാഹമോചന വാര്‍ത്ത വന്നപ്പോള്‍ ഞാന്‍ അദ്ദേഹത്തെ പിന്തുണച്ചിരുന്നു, കാരണം അദ്ദേഹത്തിന്റെ ഭാഗത്തായിരുന്നു ശരിയെന്ന് ഞാന്‍ ആത്മാര്‍ഥമായി വിശ്വസിച്ചു. എന്നാല്‍ അദ്ദേഹത്തിന്റെ ഈ വിഡിയോകള്‍ കണ്ടപ്പോള്‍ യാഥാര്‍ഥ്യം ബോധ്യപ്പെട്ടു. കാര്യങ്ങള്‍ ഇങ്ങനെയായതില്‍ നിരാശയുണ്ട്, അദ്ദേഹത്തോടുള്ള ബഹുമാനം തീര്‍ച്ചയായും നഷ്ടപ്പെട്ടു.''-മറ്റൊരു പ്രേക്ഷകന്റെ വാക്കുകള്‍. 

താന്‍ കടുത്ത വിഷാദരോഗത്തിലൂടെയാണ് കടന്നുപോകുന്നതെന്നും ഭാര്യയും കുടുംബവും തന്നെ സാമ്പത്തികമായി ചൂഷണം ചെയ്യുകയായിരുന്നുവെന്നും ജയം രവി നേരത്തെ മാധ്യമങ്ങള്‍ക്ക് മുന്നില്‍ വിങ്ങിപ്പൊട്ടിയിരുന്നു. എന്നാല്‍, ഈ കരച്ചിലും പ്രസ്താവനകളും ജനങ്ങളുടെ സഹതാപം നേടാനുള്ള തന്ത്രമായിരുന്നുവോ എന്ന ചോദ്യമാണ് പുതിയ ദൃശ്യങ്ങള്‍ പുറത്തുവന്നതോടെ ഉയരുന്നത്. സുന്ദര്‍ വിജയുടെ പ്രതികരണം കേവലം ഒരു വ്യക്തിയുടെ അഭിപ്രായമല്ലെന്നും, നടനെ വിശ്വസിച്ചിരുന്ന വലിയൊരു വിഭാഗം ആരാധകരുടെ പൊതുവികാരമാണെന്നും സോഷ്യല്‍ മീഡിയ ചൂണ്ടിക്കാണിക്കുന്നു. അതിനിടെ, ചെന്നൈ കുടുംബ കോടതിയില്‍ ആരതി രവി ആവശ്യപ്പെട്ട 40 ലക്ഷം രൂപയുടെ ഇടക്കാല ജീവനാംശ ഹര്‍ജിയില്‍ കോടതി പ്രതിമാസം 3 ലക്ഷം രൂപ നല്‍കാന്‍ ജയം രവിക്ക് നിര്‍ദേശം നല്‍കിയിട്ടുണ്ട്. 

എന്നാല്‍, രവിയുടെ പരസ്യപ്രസ്താവനകള്‍ തനിക്കെതിരെ കടുത്ത സൈബര്‍ ആക്രമണങ്ങള്‍ക്ക് കാരണമായെന്ന് ആരതി വ്യക്തമാക്കുന്നു. സോഷ്യല്‍ മീഡിയയില്‍ ഉയര്‍ത്തുന്ന ശക്തമായ വിമര്‍ശനങ്ങളും, ജനങ്ങള്‍ക്കിടയില്‍ നടന്റെ വിശ്വസനീയതയ്ക്ക് ഏറ്റ തിരിച്ചടിയും വരും ദിവസങ്ങളില്‍ കോടതിയിലെ ജീവനാംശ തര്‍ക്കങ്ങളിലും കുട്ടികളുടെ സംരക്ഷണാവകാശ കേസുകളിലും ആരതിക്ക് അനുകൂലമായ തെളിവുകളായി മാറിയേക്കാമെന്നാണ് നിയമവിദഗ്ധരുടെ വിലയിരുത്തല്‍.