മെര്‍ക്കാട എന്ന നിഗൂഢ താഴ്വരയിലെ രഹസ്യങ്ങളും, അതിന്റെ പിന്നിലെ സത്യം തേടിയുള്ള അന്വേഷണവുമായി ഹൂ എത്തുന്നു; കളക്ടര്‍ ബ്രോ പ്രശാന്ത് നായര്‍ പ്രധാന കഥാപാത്രത്തെ അവതരിപ്പിക്കുന്ന ചിത്രത്തിന്റെ ട്രെയിലര്‍ ശ്രദ്ധ നേടുന്നു

മലയാള സിനിമയുടെ പതിവ് വഴികളില്‍ നിന്നും മാറി, സ്ഥിരം ഫോര്‍മുലകളില്ലാതെ അന്താരാഷ്ട്ര സിനിമകളുടെ ഫോര്‍മാറ്റില്‍ ഇറങ്ങിയ 'ഹു' എന്ന ചിത്രത്തിന്റെ ട്രെയ്ലര്‍ ശ്രദ്ധ നേടുന്നു. ആസിഫ് അലി തന്റെ ഒഫീഷ്യല്‍ പേജിലൂടെ പുറത്തു വിട്ട ട്രെയ്‌ലറില്‍ കളക്ടര്‍ ബ്രോ പ്രശാന്ത് നായര്‍ ഒരു പ്രധാന കഥാപാത്രത്തെ അവതരിപ്പിക്കുമ്പോള്‍, ഷൈന്‍ ടോം ചാക്കോ, പേര്‍ളി മാണി, രാജീവ് പിള്ള, ശ്രുതി മേനോന്‍, ഗോപു പടവീടന്‍ ശ്രീകാന്ത് നായര്‍ തുടങ്ങി ഒരു മികച്ച താരനിര അണിനിരക്കുന്നുണ്ട്. ഈ ചിത്രം സംവിധാനം ചെയ്തിരിക്കുന്നത് നിരവധി വിദേശ ഭാഷാ ചിത്രങ്ങളുടെ അണിയറയില്‍ ഉണ്ടായിരുന്ന അജയ് ദേവലോകയാണ്.സംഗീതം കത്താര്‍സിസ്, മണികണ്ഠന്‍ അയ്യപ്പ ജോഡിയും ആണ് നിര്‍വ്വഹിച്ചിരിക്കുന്നത് . ഏറ്റവും മികച്ച നിലവാരത്തിലുള്ള ഡോള്‍ബി അറ്റ്‌മോസ് ശബ്ദ സംവിധാനത്തില്‍, ആണ് ചിത്രം വരുന്നത്.

ഒക്ടോബര്‍ 25 നു ഇന്ത്യ ഒട്ടാകെ തിയേറ്റുകളില്‍ റിലീസ് ആകുന്ന ഈ ചിത്രം യഥാര്‍ത്ഥ സിനിമാ പ്രേക്ഷകര്‍ക്ക് പൂര്‍ണമായ തൃപ്തി തരുന്ന ഒന്നാകുമെന്നു അണിയറക്കാര്‍ അറിയിച്ചു . മെര്‍ക്കാട എന്ന നിഗൂഢ താഴ്വരയിലെ രഹസ്യങ്ങളും, അതിന്റെ പിന്നിലെ സത്യം തേടിയുള്ള അന്വേഷണവുമാണ് ചിത്രത്തിന്റെ ഇതിവൃത്തം .മലയാള സിനിമയുടെ മാറ്റത്തിലേക്കുള്ള ചവിട്ടുപടിയായാണ് പ്രശസ്ത സിനിമാ നിരീക്ഷകര്‍ who നെ കണക്കാക്കുന്നത് .