ഇത് എന്ത് ഇങ്ങനെ? പാവം ആ കുഞ്ഞ്; ഒരിക്കല്‍ കൂടി മീശപിരിച്ച് പഴയ ലൂക്കിലെത്തിയ നമ്മുടെ സ്വന്തം ലാലേട്ടന്‍; ഫാന്‍സിനൊപ്പം ഫോട്ടോഷൂട്ട് കഴിഞ്ഞതും പണിപാളി; മറുപടിയുമായി ഫോട്ടോഗ്രാഫര്‍ 

മലയാളത്തിന്റെ മഹാനടന്‍ മോഹന്‍ലാല്‍ തന്റെ ആരാധകര്‍ക്കായി സമയം മാറ്റിവെക്കുന്നതിലും അവരോടൊപ്പം ഫോട്ടോഷൂട്ടുകളില്‍ പങ്കെടുക്കുന്നതിലും എപ്പോഴും മാതൃകയാകാറുണ്ട്. തരുണ്‍ മൂര്‍ത്തി സംവിധാനം ചെയ്യുന്ന തന്റെ പുതിയ ചിത്രത്തിന്റെ ലൊക്കേഷനില്‍ വെച്ച് നൂറുകണക്കിന് ആരാധകര്‍ക്കൊപ്പം അദ്ദേഹം നടത്തിയ ഫോട്ടോഷൂട്ട് കഴിഞ്ഞദിവസങ്ങളില്‍ സോഷ്യല്‍ മീഡിയയില്‍ വലിയ ചര്‍ച്ചയായിരുന്നു. ഓരോരുത്തര്‍ക്കും പ്രത്യേകം സമയം നല്‍കി പുഞ്ചിരിയോടെ ചിത്രങ്ങള്‍ക്ക് പോസ് ചെയ്യുന്ന ലാലേട്ടന്റെ രീതിക്ക് വലിയ കൈയടിയാണ് സാധാരണ ലഭിക്കാറുള്ളത്. 

എന്നാല്‍, ഈ ഫോട്ടോഷൂട്ടിനിടയിലെ ഒരു ചെറിയ വീഡിയോ ശകലത്തെ ചൊല്ലി സോഷ്യല്‍ മീഡിയയില്‍ ചില വിമര്‍ശനങ്ങള്‍ ഉയരുകയുണ്ടായി. ഒരു അച്ഛന്റെ തോളിലിരുന്ന് വന്ന ചെറിയ പെണ്‍കുട്ടി മോഹന്‍ലാലിന്റെ തോളില്‍ തൊടുകയും ആവേശത്തോടെ നോക്കുകയും ചെയ്യുന്നതായിരുന്നു വീഡിയോയുടെ ഉള്ളടക്കം. ആ സമയം ക്യാമറയിലേക്ക് നോക്കാന്‍ കുട്ടിയോട് ആംഗ്യം കാണിച്ച താരം, അവര്‍ പടമെടുത്തു മടങ്ങുമ്പോള്‍ കുട്ടിയുടെ മുഖത്തേക്ക് നോക്കാതെ കൈവീശി കാണിച്ചു എന്നതാണ് വിമര്‍ശകരെ ചൊടിപ്പിച്ചത്. കുട്ടിക്ക് അര്‍ഹമായ പരിഗണന നല്‍കിയില്ലെന്നും കുട്ടിയോട് സ്‌നേഹത്തോടെ സംസാരിച്ചില്ലെന്നുമാണ് കമന്റ് ബോക്‌സുകളില്‍ ഉയര്‍ന്ന പ്രധാന ആക്ഷേപം. 

എന്നാല്‍ ഈ വിമര്‍ശനങ്ങള്‍ ഒരു വശത്ത് നടക്കുമ്പോള്‍ തന്നെ, മോഹന്‍ലാലിനെ പിന്തുണച്ചുകൊണ്ട് വലിയൊരു വിഭാഗം ആരാധകരും രംഗത്തെത്തിയിട്ടുണ്ട്. ഒരേ നില്‍പില്‍ 200 മുതല്‍ 250 വരെ ആളുകള്‍ക്കൊപ്പം ഫോട്ടോ എടുക്കുക എന്നത് ചെറിയ കാര്യമല്ലെന്നും, അത്രയും പേരോടും വൈകാരികമായി ഓരോ നിമിഷവും ഇടപെടാന്‍ ആര്‍ക്കും സാധിക്കില്ലെന്നുമാണ് ഇവര്‍ വാദിക്കുന്നത്. ലൊക്കേഷനിലെ തിരക്കിനിടയിലും തന്നെ കാണാന്‍ എത്തിയ ഒരാളെ പോലും നിരാശനാക്കാതെ എല്ലാവര്‍ക്കും ഫോട്ടോ നല്‍കാന്‍ അദ്ദേഹം കാണിച്ച മനസ്സിനെയാണ് കാണേണ്ടതെന്നും ആരാധകര്‍ പറയുന്നു. വിമര്‍ശനങ്ങള്‍ കടുത്തതോടെ ഈ ദൃശ്യങ്ങള്‍ പകര്‍ത്തിയ ഫോട്ടോഗ്രാഫര്‍ നിഖില്‍ ബാലന്‍ തന്നെ നേരിട്ട് വിശദീകരണവുമായി രംഗത്തെത്തി. താരം ഓരോ ആരാധകനോടും എത്രത്തോളം ക്ഷമയോടെയും വിനയത്തോടെയുമാണ് പെരുമാറുന്നതെന്ന് വ്യക്തമാക്കുന്ന മറ്റൊരു വീഡിയോ അദ്ദേഹം പങ്കുവെച്ചു. 

ഒറ്റ സ്‌ട്രെച്ചില്‍ ഇത്രയധികം പേര്‍ക്കൊപ്പം നിന്ന് ഫോട്ടോ എടുക്കുമ്പോഴും അവിടെ വന്ന ഒരാള്‍ പോലും നിരാശയോടെ മടങ്ങിയിട്ടില്ലെന്ന് നിഖില്‍ സാക്ഷ്യപ്പെടുത്തുന്നു. ആ ഒരു ഉറപ്പാണ് മോഹന്‍ലാല്‍ എന്ന നടനെ ജനപ്രിയനാക്കുന്നതെന്നും അദ്ദേഹം കുറിച്ചു. താരത്തിനൊപ്പം ചിത്രമെടുക്കാന്‍ കിലോമീറ്ററുകളോളം ക്യൂ നില്‍ക്കുന്ന ആരാധകരുടെ വന്‍നിരയും പുതിയ വീഡിയോയില്‍ ദൃശ്യമാണ്. 

ഒരു ചെറിയ നിമിഷത്തെ മാത്രം അടര്‍ത്തിയെടുത്ത് ഒരു വ്യക്തിയുടെ സ്വഭാവത്തെ അളക്കുന്നത് ശരിയല്ലെന്നും, ലൊക്കേഷനിലെ സമ്മര്‍ദ്ദങ്ങള്‍ക്കിടയിലും ആരാധകരോട് അദ്ദേഹം കാണിക്കുന്ന സ്‌നേഹം വാക്കുകള്‍ക്ക് അപ്പുറമാണെന്നും സോഷ്യല്‍ മീഡിയയിലെ വലിയൊരു വിഭാഗം അഭിപ്രായപ്പെടുന്നു. വിവാദങ്ങള്‍ക്കും വിമര്‍ശനങ്ങള്‍ക്കും അപ്പുറം തന്റെ ആരാധകരോടുള്ള ലാലേട്ടന്റെ ആത്മബന്ധം ഇന്നും ദൃഢമായി തുടരുന്നു എന്നതാണ് യാഥാര്‍ത്ഥ്യം.