സ്ത്രീകളുടെ ശരീരത്തില ഹോര്മോണ് വ്യതിയാനങ്ങളെക്കുറിച്ചും അത് ജീവിതത്തില് ഉണ്ടാക്കുന്ന മാറ്റങ്ങളെക്കുറിച്ചും പുസ്തകത്തിലൂടെയും ക്ലാസുകളിലൂടെയും അഭിമുഖങ്ങളിലൂടെയും പലപ്പോഴായി തുറന്ന് പറയുന്ന ആളാണ് നടി ലെന. ജീവിതത്തിലെ ഏറ്റവും നിര്ണ്ണായകവും എന്നാല് ആരും ചര്ച്ച ചെയ്യാത്തതുമായ 'പെരിമെനോപോസ്' എന്ന ശാരീരികഘട്ടത്തെക്കുറിച്ച് തന്റെ അനുഭവങ്ങളിലൂടെ നടി ലെന പങ്ക് വച്ച വാക്കുകളാണ് ഇപ്പോള് വീണ്ടും ശ്രദ്ധേയമാകുന്നത്. അമൃത വിശ്വവിദ്യാപീഠത്തില് നടന്ന ടെഡെക്സ് ടോക്കിലായിരുന്നു തന്റെ പുതിയ പുസ്തകമായ 'വിമന്-ഒ-പോസി'ലെ (WomeO-Pause) പ്രസക്തഭാഗങ്ങള് പങ്കുവെച്ചുകൊണ്ട് താരം മനസ്സ് തുറന്നത്.
'1999-ലായിരുന്നു അത്. എനിക്കന്ന് 18 വയസ്സായിരുന്നു പ്രായം. 12-ാം ക്ലാസിലെ ഒരു സ്കൂള് ദിനത്തിന് ശേഷം ഞാന് വീട്ടിലേക്ക് നടന്നു വരുമ്പോള് എന്റെ അമ്മ ഡൈനിങ് ടേബിളില് വളരെ തളര്ന്ന്, അസ്വസ്ഥയായി, ആശയക്കുഴപ്പത്തിലായി ഇരിക്കുന്നത് ഞാന് കണ്ടു. എന്താണ് കുഴപ്പമെന്ന് എനിക്ക് മനസ്സിലാക്കാന് കഴിഞ്ഞില്ല. പക്ഷേ ആ മുറിയിലെ അന്തരീക്ഷം വളരെ ഭാരമുള്ളതായിരുന്നു, എനിക്ക് വലിയ അസ്വസ്ഥത തോന്നി. എന്താണ് സംഭവിച്ചതെന്ന് അമ്മയോട് ചോദിക്കണമെന്ന് എനിക്കുണ്ടായിരുന്നു, ഞാന് ചോദിക്കുകയും ചെയ്തു എന്ന് തോന്നുന്നു. പക്ഷേ ഞാന് പറയുന്നത് കേള്ക്കാത്തതുപോലെയാണ് അമ്മ പെരുമാറിയത്, അതെന്നെ വല്ലാതെ വിഷമിപ്പിച്ചു. ഞാന് എന്റെ മുറിയിലേക്ക് പോയി. പിന്നീട് ഓരോ ദിവസം കഴിയുന്തോറും അമ്മ മാറുന്നത് ഞാന് ശ്രദ്ധിച്ചു. എന്തിനും ഏതിനും ഉത്സാഹിച്ചിരുന്ന, പാര്ട്ടികള് നടത്താനും ബന്ധുക്കളെ വിളിക്കാനും പാചകം ചെയ്യാനും ഒക്കെ ഇഷ്ടപ്പെട്ടിരുന്ന ആ പഴയ സജീവമായ വ്യക്തിയല്ലായിരുന്നു അമ്മ. ഊര്ജ്ജസ്വലമായിരുന്ന അമ്മയുടെ വ്യക്തിത്വം പെട്ടെന്ന് അടഞ്ഞതായും ഒന്നിനോടും താല്പര്യമില്ലാത്തതായും, പെട്ടെന്ന് ദേഷ്യം വരുന്നതായും എപ്പോഴും കുറ്റപ്പെടുത്തുന്നതായും മാറി.
വര്ഷങ്ങള് കടന്നുപോയപ്പോള്, എനിക്ക് അമ്മയോട് ഒരല്പം വെറുപ്പ് തോന്നിത്തുടങ്ങി. എങ്കിലും, ഒരാളുടെ വ്യക്തിത്വം ഇത്ര പെട്ടെന്ന് എങ്ങനെ ഇത്രയധികം മാറുമെന്നത് എന്നെ കുഴപ്പിച്ചു. എന്തുകൊണ്ടാണ് അമ്മ ഇത്രയധികം ശുണ്ഠി കാണിക്കുന്നത്? ഈ ആശയക്കുഴപ്പമാണ് പന്ത്രണ്ടാം ക്ലാസിന് ശേഷം സൈക്കോളജി ബിരുദ പഠനത്തിന് തിരഞ്ഞെടുക്കാന് എന്നെ പ്രേരിപ്പിച്ചത്. സൈക്കോളജിയില് ലോകത്തിലെ എല്ലാ ഉത്തരങ്ങളും ഉണ്ടാവുമെന്ന് ഞാന് കരുതി. പക്ഷേ ഉത്തരങ്ങള് കിട്ടുന്നതിന് പകരം, ഞാന് എന്റെ മുഴുവന് ഊര്ജ്ജവും പഠനത്തിനായി ചിലവഴിച്ചു, പതുക്കെ എന്റെ പ്രശ്നങ്ങളെക്കുറിച്ച് മറന്നു. പരീക്ഷകളും സിനിമയിലെ അഭിനയവുമൊക്കെയായി പുതിയ തിരക്കുകളിലേക്ക് ഞാന് മാറി. എവിടെയോ എന്തോ തകരാറുണ്ടെന്ന് എനിക്കറിയാമായിരുന്നു, പക്ഷേ അത് കൃത്യമായി ചൂണ്ടിക്കാണിക്കാന് എനിക്ക് കഴിഞ്ഞില്ല.
ഇനി നമുക്ക് 2024-ലേക്ക് വരാം. എനിക്ക് 43 വയസ്സായി. ആത്മീയമായി വളരെ ഉണര്വുള്ള ഒരു നല്ല മനുഷ്യനുമായി എന്റെ വിവാഹം കഴിഞ്ഞു. എന്റെ സിനിമാ ജീവിതം ഉപേക്ഷിച്ച് ഞാന് ഒരു വര്ഷത്തേക്ക് അമേരിക്കയിലേക്ക് താമസം മാറി. എല്ലാം ഗംഭീരമാകുമെന്ന് ഞാന് കരുതി, മറ്റുള്ളവരും വിചാരിച്ചു 'നീ ഭാഗ്യവതിയാണല്ലോ' എന്ന്. പക്ഷേ ഉള്ളില് ഞാന് അനുഭവിച്ചിരുന്നത് ആശയക്കുഴപ്പവും, ഓര്മ്മക്കുറവും, തലച്ചോറിലെ മരവിപ്പും, ഉറക്കമില്ലായ്മയും, പ്രതീക്ഷിക്കാത്ത ശരീരഭാരം കൂടലുമാണ്. എനിക്ക് ഉത്കണ്ഠയും വിഷാദവും ആശയക്കുഴപ്പവും തോന്നിയിരുന്നു. ഞാന് വളരെയധികം പ്രകോപിതയായിരുന്നു. 18 വയസ്സ് മുതല് അമ്മയുടെ പ്രശ്നങ്ങള്ക്ക് പിന്നിലെ രഹസ്യം കണ്ടെത്താന് ഞാന് ഗവേഷണം നടത്തുകയായിരുന്നുവെങ്കിലും എന്റെ ജീവിതകാലം മുഴുവന് ഞാന് അഴിച്ചെടുക്കാന് ശ്രമിച്ച അതേ അവസ്ഥയിലൂടെയാണ് ഞാനും കടന്നുപോകുന്നതെന്ന് എനിക്ക് അന്ന് തോന്നിയില്ല.
ഒടുവില് ഒരു ദിവസം ഇന്റര്നെറ്റിലെ ഒരു പോഡ്കാസ്റ്റ് കണ്ടപ്പോള്, ഒരു ഡോക്ടര് ഒരു വാക്കിനെക്കുറിച്ച് സംസാരിക്കുന്നത് ഞാന് കേട്ടു. അത് ദൃശ്യങ്ങള്ക്കും അപ്പുറമാണ്, നിങ്ങള്ക്ക് അത് നേരിട്ട് കാണാന് കഴിയില്ലെങ്കിലും അനുഭവിക്കാന് സാധിക്കും. 35-നും 55-നും ഇടയില് പ്രായമുള്ള സ്ത്രീകള്ക്കിടയില് സംഭവിക്കുന്ന ആ വാക്കാണ് 'പെരിമെനോപോസ്'. ആ വാക്ക് കേട്ട നിമിഷം ഞാന് പറഞ്ഞു, 'ഓ, ഇതാണ് എന്റെ ജീവിതകാലം മുഴുവന് എന്നെ പിടികൊടുക്കാതെ ഓടിയ ആ ഉത്തരം!' ഇത് നേരിട്ട് അനുഭവിക്കുമ്പോള് മാത്രമാണ് ഇതൊരു വലിയ മാറ്റമാണെന്ന് എനിക്ക് മനസ്സിലായത്. യുവതലമുറയിലെ വിദ്യാര്ഥികള് ഉള്ള ഈ ക്യാംപസില് ഞാന് ഇത് പറയാന് കാരണമെന്താണ്? 'കൗമാരം' എന്ന് പറഞ്ഞാല് നിങ്ങള്ക്ക് പെട്ടെന്ന് മനസ്സിലാകും. നിങ്ങളെല്ലാവരും ആ ഘട്ടം കഴിഞ്ഞവരോ അല്ലെങ്കില് അതിലൂടെ കടന്നുപോകുന്നവരോ ആണ്. കുട്ടിക്കാലത്ത് നിന്ന് മുതിര്ന്നവരിലേക്കുള്ള മാറ്റമാണത്. ഹോര്മോണ് വ്യതിയാനങ്ങളിലൂടെയാണ് ആ മാറ്റം സംഭവിക്കുന്നത്.
പക്ഷേ ഈ വാക്കിനെക്കുറിച്ച് ആരും നമ്മളോട് പറയുന്നില്ല. എന്റെ പുതിയ പുസ്തകമായ 'വുമണോപോസ്' ല് ഞാന് ഇതിന് 'വുമണസെന്സ്' എന്നൊരു പേര് നല്കിയിട്ടുണ്ട്. ഇതൊരു രണ്ടാം കൗമാരമാണ്. വിശ്വസിക്കാന് കഴിയുന്നുണ്ടോ? ഒരു കൗമാരക്കാരന് 13-നും 19-നും ഇടയില് അനുഭവിക്കുന്ന അതേ തീവ്രതയോടെ എല്ലാ സ്ത്രീകളും ഈ ഘട്ടത്തിലൂടെ കടന്നുപോകുന്നു. ആരും ഇതിനെക്കുറിച്ച് സംസാരിക്കാത്തതുകൊണ്ടും ആരും നമുക്ക് അറിവ് നല്കാത്തതുകൊണ്ടും ഇതിന് പ്രത്യേകിച്ച് ഒരു പേരില്ലായിരുന്നു. ഒരു സ്ത്രീയുടെ ജീവിതത്തിലെ ഏറ്റവും ആശയക്കുഴപ്പമുണ്ടാക്കുന്ന കാലഘട്ടമാണിത്', ലെനയുടെ വാക്കുകള്.
ഒരു ടെഡെക്സ് പ്ലാറ്റ്ഫോമില് പങ്കുവയ്ക്കാന് അനുയോജ്യമായ ആശയമാണിതെന്ന് എനിക്ക് തോന്നി. കാരണം നിങ്ങളുടെ അമ്മയിലൂടെ നിങ്ങളെല്ലാവരും ഇത് അനുഭവിക്കുന്നുണ്ടാകാം. അമൃതാനന്ദമയി അമ്മയുടെ സാന്നിധ്യത്തില് ഇരിക്കാന് ഭാഗ്യം ലഭിച്ചവരാണ് നിങ്ങള്, അമ്മ ശുദ്ധമായ ആനന്ദമാണ്. എന്നാല് വീട്ടിലിരിക്കുന്ന നമ്മുടെ സാധാരണ അമ്മമാര്ക്ക് നമ്മുടെ പിന്തുണയില്ലാതെ എപ്പോഴും ആ ആനന്ദാവസ്ഥയില് ഇരിക്കാന് കഴിഞ്ഞെന്നു വരില്ല. കുട്ടികള്, പുരുഷന്മാര്, സ്ത്രീകള് തുടങ്ങി എല്ലാവരെയും ഈ ഘട്ടത്തെക്കുറിച്ച് ബോധവാന്മാരാക്കാന് ഞാന് ആഗ്രഹിക്കുന്നു. ഇതിനെക്കുറിച്ച് നമ്മള് പഠിക്കേണ്ടതുണ്ട്.
പെരിമെനോപോസിനെക്കുറിച്ച് ചുരുക്കത്തില് ചില കാര്യങ്ങള് പറയാം. ഇത് കൗമാരം പോലെ ഒരു ഹോര്മോണ് മാറ്റമാണെന്ന് നിങ്ങള്ക്ക് ഇപ്പോള് മനസ്സിലായിരിക്കുമല്ലോ. ഇതിനെ ഞാന് 'വുമണസെന്സ്' എന്ന് വിളിക്കുന്നു. അതിനാല് ഈ പ്രസംഗത്തിന് ഹൗ ഈസ് അമ്മഎന്ന് പേരിടാന് ഞാന് ആഗ്രഹിക്കുന്നു. നിങ്ങള് ഓരോരുത്തരും ഇന്ന് നിങ്ങളുടെ അമ്മയോട് നേരിട്ടോ ഫോണിലൂടെയോ സംസാരിക്കണം. അമ്മേ, എങ്ങനെയുണ്ട്? അമ്മയ്ക്ക് എന്ത് തോന്നുന്നു? എന്ന് ആത്മാര്ത്ഥമായി ചോദിക്കണം. കാരണം ഈ മാറ്റം അദൃശ്യമാണ്. പുറമെ നോക്കിയാല് അമ്മയ്ക്ക് ഒരു കുഴപ്പവുമില്ലെന്ന് തോന്നും. പക്ഷേ നിങ്ങള് കൗമാരക്കാരായതുകൊണ്ട് നിങ്ങളുടെ അമ്മമാര് തീര്ച്ചയായും ഈ ഘട്ടത്തിലൂടെ കടന്നുപോകുന്നുണ്ടാകാം. ചിലപ്പോള് അമ്മയ്ക്ക് വല്ലാതെ ദേഷ്യം വരുന്നതോ, നിയന്ത്രിക്കാന് നോക്കുന്നതോ ഒക്കെയായി നിങ്ങള്ക്ക് തോന്നിയിട്ടുണ്ടാകാം. പക്ഷേ ഓര്ക്കുക, അവരും തിരിച്ചറിയാത്ത വലിയൊരു മാറ്റത്തിലൂടെയാണ് അവര് കടന്നുപോകുന്നത്.
കേരളത്തിലോ ഇന്ത്യയിലോ ലോകത്തോ ഉള്ള ഭൂരിഭാഗം സ്ത്രീകള്ക്കും ഈ മാറ്റത്തെക്കുറിച്ച് അറിയില്ല, കാരണം ആരും ഇതിനെക്കുറിച്ച് സംസാരിക്കുന്നില്ല. ഞാന് ഇത് അനുഭവിച്ചതുകൊണ്ട് ഇതിനെക്കുറിച്ച് സംസാരിക്കാന് ഞാന് തീരുമാനിച്ചു. ആദ്യത്തെ ഉത്തരം തിരിച്ചറിവാണ്. ശരീരത്തെക്കുറിച്ചുള്ള തിരിച്ചറിവ് ബോധപൂര്വ്വം ഉണ്ടാവണം. പിന്നീട് ജീവിതശൈലി മാറ്റങ്ങളിലൂടെ ഊര്ജ്ജത്തെ മാറ്റാന് കഴിയണം. മൂന്നാമതായി, ഈ വിഷയത്തെക്കുറിച്ചുള്ള മാനസികാവസ്ഥ മാറ്റണം. നാലാമതായി, ആഹാരം, വ്യായാമം, സപ്ലിമെന്റുകള് എന്നിവയിലൂടെ ശരീരത്തിലെ കെമിസ്ട്രി മാറ്റണം.
ഒരു സ്ത്രീയുടെ ആരോഗ്യം അവളുടെ കുടുംബത്തെ മൊത്തം ബാധിക്കുന്നു. അവളുടെ മക്കളുടെ ജീവിതാനുഭവങ്ങളെയും ഭര്ത്താവിനെയും സമൂഹത്തെയും വരെ അത് സ്വാധീനിക്കുന്നു. അതിനാല് ഓരോ സ്ത്രീയെയും അവളുടെ ആരോഗ്യത്തെക്കുറിച്ച് ബോധവതിയാക്കേണ്ടത് സമൂഹത്തിന്റെ ഉത്തരവാദിത്തമാണ്. ഈ ഘട്ടത്തിലൂടെ കടന്നുപോകുമ്പോള് സ്ത്രീകള്ക്ക് തോന്നുന്നത് ;എനിക്കെന്തോ കുഴപ്പമുണ്ട്; എന്നാണ്. ഈ നിരാശയും സ്വയം കുറ്റപ്പെടുത്തലും മാറണമെങ്കില് ഇതിനെക്കുറിച്ച് സാധാരണ രീതിയില് സംസാരിക്കണം. ഈ മാറ്റം സ്വാഭാവികമാണ്, പക്ഷേ അതുകാരണം അനുഭവിക്കുന്ന കഷ്ടപ്പാടുകള് ഒഴിവാക്കാവുന്നതാണ്.
സ്ത്രീകള്ക്ക് തങ്ങളുടെ പ്രിയപ്പെട്ടവരോട്, പ്രത്യേകിച്ച് പുരുഷന്മാരോട് ഇതിനെക്കുറിച്ച് സംസാരിക്കാം. പുരുഷന്മാര്ക്ക് ഇത് പെട്ടെന്ന് മനസ്സിലാക്കാന് കഴിയില്ല, കാരണം അവരുടെ സിസ്റ്റം ലളിതമാണ്. അതിനാല് സ്ത്രീകള് തങ്ങള് അനുഭവിക്കുന്നത് എന്താണെന്ന് കൃത്യമായി പറഞ്ഞു കൊടുക്കണം. അത് ഭര്ത്താവിനും മക്കള്ക്കും അവരെ പിന്തുണയ്ക്കാന് സഹായകമാകും. കൗമാരക്കാര് മിക്കവാറും അമ്മമാരുമായി വഴക്കിടാറുണ്ട്, അമ്മമാര് തങ്ങളെ നിയന്ത്രിക്കാന് ശ്രമിക്കുന്നു എന്ന് അവര് പരാതിപ്പെടാറുണ്ട്. ഹോര്മോണ് മാറ്റങ്ങളിലൂടെ കടന്നുപോകുന്ന രണ്ട് തലമുറകള് തമ്മിലുള്ള പോരാട്ടമാണത്.
അതുകൊണ്ട് നിങ്ങളുടെ അമ്മയുടെ ആരോഗ്യത്തെക്കുറിച്ച് ചോദിച്ചറിയുക. അവള് അനുഭവിക്കുന്ന സങ്കടങ്ങളും ആശയക്കുഴപ്പങ്ങളും പങ്കുവെക്കാന് പറയുക. ഇന്ന് നിങ്ങളുടെ കൈകളില് സ്മാര്ട്ട്ഫോണുകളുണ്ട്, നിങ്ങള്ക്ക് ഇന്റര്നെറ്റില് തിരഞ്ഞ് ഉത്തരങ്ങള് കണ്ടെത്താന് കഴിയും. ദയവായി നിങ്ങളുടെ അമ്മയ്ക്ക് ആവശ്യമായ ഉത്തരങ്ങള് കണ്ടെത്തി നല്കുക. നിങ്ങളുടെ ജീവിതത്തിലെ സ്ത്രീകള്ക്ക്, അത് അമ്മയോ സഹോദരിയോ ഭാര്യയോ ആകട്ടെ, ഈ പെരിമെനോപോസ് ഘട്ടത്തെക്കുറിച്ച് ധാരണ നല്കി അവരെ പിന്തുണയ്ക്കുക. ഈ അവബോധം വളര്ത്തുന്നതിലൂടെ ലോകം എല്ലാവര്ക്കും കുറച്ചുകൂടി നല്ലതാക്കി മാറ്റാന് നമുക്ക് സാധിക്കുമെന്ന് ഞാന് പ്രതീക്ഷിക്കുന്നു.''
Premium Lifestyle and Entertainment website
.jpg)
സംവിധായകന് രഞ്ജിത്തിന് വന് തിരിച്ചടി; ലൈംഗികാതിക്രമ കേസില് ജാമ്യാപേക്ഷ കോടതി തള്ളി; തിങ്കളാഴ്ച വരെ പോലീസ് കസ്റ്റഡിയില് 
കൊച്ചിന് ഗിന്നസിലൂടെയും തിരുവനന്തപുരം സരിഗയിലൂടെയും മിമിക്രി വേദികളില്; ഗുണ്ട ബിനു എന്ന പേരില് സോഷ്യല് മീഡിയയിലും താരം; മിമിക്രി കലാകാരന് ശരത് ഉണ്ണിത്താന്റെ വേര്പാട് പങ്ക് വച്ച് സ്നേഹ ശ്രീകുമാര്; മരണം അമേരിക്കയില്