അമ്മയാണ് വീട്ടിലെ എല്ലാ കുഞ്ഞുങ്ങള്‍ക്കും മനോഹരമായ സംസ്‌കൃതം പേരിട്ടത്; അതുകൊണ്ട് കുഞ്ഞിന് പേരിടേണ്ട ജോലി അമ്മയ്ക്ക് ഏല്‍പ്പിച്ചു; സംസ്‌കൃതം പേര് തന്നെ കുഞ്ഞിനിടും; ഗര്‍ഭകാലത്തെ ആദ്യ മൂന്നുമാസം പിന്നിട്ടതോടെ ആരാധകരുടെ ചോദ്യങ്ങള്‍ക്ക് മറുപടിയുമായി ദിയ കൃഷ്ണ 

സോഷ്യല്‍ മീഡിയയില്‍ ഏറെ സജീവമായ താരമാണ് നടന്‍ കൃഷ്ണ കുമാറിന്റെ മകളും ഇന്‍ഫ്‌ളുവന്‍സറും സംരംഭകയുമായ ദിയ കൃഷ്ണ. കഴിഞ്ഞ വര്‍ഷം സെപ്റ്റംബറില്‍ ആയിരുന്നു ദിയ കൃഷ്ണയുടെ വിവാഹം നടന്നത്. സുഹൃത്തായിരുന്ന അശ്വിന്‍ ഗണേശിനെയാണ് ദിയ വിവാഹം ചെയ്തത്. സോഫ്റ്റ്വയര്‍ എന്‍ജിനീയര്‍ ആണ് അശ്വിന്‍. വളരെ ആഘോഷമായിട്ടാണ് വിവാഹ ചടങ്ങുകള്‍ നടത്തിയത്.

താന്‍ ഗര്‍ഭിണിയാണെന്ന സന്തോഷം അടുത്തിടെയാണ് ദിയ ആരാധകരോട് പങ്കുവെച്ചത്. ഇപ്പോഴിതാ ആദ്യ മൂന്നുമാസത്തെ ഗര്‍ഭകാലത്തെക്കുറിച്ച് പ്രേക്ഷകര്‍ ചോദിച്ച ചോദ്യങ്ങള്‍ക്ക് ഉത്തരവുമായി എത്തിയിരിക്കുകയാണ് ദിയയും ഭര്‍ത്താവ് അശ്വിനും. സ്വന്തം യൂട്യൂബ് ചാനലിലൂടെയാണ് ദിയ വിശേഷങ്ങള്‍ അറിയിച്ച് എത്തിയത്.

ദിയയുടെ വാക്കുകള്‍..,
ജനിക്കാന്‍ പോകുന്ന കുഞ്ഞിന് പേരിടുന്നത് തന്റെ അമ്മയായ സിന്ധു കൃഷ്ണ ആയിരിക്കുമെന്നും ദിയ വീഡിയോയില്‍ പറയുന്നു. ''പേരിടേണ്ട ജോലി എന്റെ അമ്മയ്ക്ക് കൊടുത്തിട്ടുണ്ട്. എന്റെ അമ്മയാണ് ഞങ്ങളുടെ വീട്ടിലെ എല്ലാ കുട്ടികള്‍ക്കും മനോഹരമായ സംസ്‌കൃതം പേരുകള്‍ ഇട്ടത്. അമ്മ ആണ്‍കുഞ്ഞിനും പെണ്‍കുഞ്ഞിനുമുള്ള പേരുകള്‍ കണ്ടുപിടിക്കും. ആരാണോ സര്‍പ്രൈസ് ആയി പുറത്തേക്ക് വരുന്നത്, ആ കുഞ്ഞിന് അമ്മ പറയുന്ന പേരിടും. അമ്മ നിര്‍ദ്ദേശിക്കുന്ന പേര് എന്തായാലും അടിപൊളിയായിരിക്കും. അക്കാര്യത്തില്‍ അമ്മ നല്ല മിടുക്കിയാണ്'', ദിയ പറഞ്ഞു.

ഗര്‍ഭിണിയായി ആദ്യത്തെ മൂന്ന് മാസം താന്‍ വളരെ ബുദ്ധിമുട്ടിയ സമയം ആയിരുന്നുവെന്നും ദിയ വ്‌ളോഗില്‍ പറഞ്ഞു. ഇപ്പോള്‍ അതെല്ലാം മാറിയെന്നും താന്‍ ആരോഗ്യവതിയും സന്തോഷവതിയുമാണെന്ന് താരം കൂട്ടിച്ചേര്‍ത്തു. ''പെണ്‍കുഞ്ഞിനെ വേണമെന്നാണ് എനിക്ക്. പക്ഷെ അങ്ങനെ പറയാന്‍ പാടില്ല. ആരോഗ്യമുള്ള കുഞ്ഞിനെയാണ് എനിക്ക് വേണ്ടത്. മാതാപിതാക്കളാകുകയാണെന്ന കാര്യം ഞങ്ങള്‍ക്കിപ്പോഴും വിശ്വസിക്കാന്‍ പറ്റുന്നില്ല. കല്യാണം കഴിച്ചെന്ന് പോലും ഫോട്ടോസ് കാണുമ്പോഴാണ് ഓര്‍ക്കുന്നത്. ഞങ്ങളിപ്പോഴും സുഹൃത്തുക്കളെ പോലെയാണ്'', ദിയ പറഞ്ഞു.

ഈ സമയത്ത് 'കംഫര്‍ട്ട് ഫുഡ് എന്തെങ്കിലും ഉണ്ടായിരുന്നോ' എന്നായിരുന്നു ഒരാളുടെ ചോദ്യം. 'കരുവാട്(ഉണക്കമീന്‍) കറി'യായിരുന്നു കംഫര്‍ട്ടായ ഭക്ഷണവിഭവമെന്നാണ് അശ്വിനും ദിയയും ഇതിന് മറുപടി നല്‍കിയത്. ഉപ്പിലിട്ട മാങ്ങ, നെല്ലിക്ക തുടങ്ങിയവയും കഴിച്ചു. കുറച്ചുനാള്‍ പഴഞ്ചോറായിരുന്നു കംഫര്‍ട്ടായ ഭക്ഷണമെന്നും ഒരുദിവസം ഛര്‍ദിച്ചപ്പോള്‍ അത് വേണ്ടാതായെന്നും അശ്വിനും ദിയയും വീഡിയോയില്‍ പറയുന്നു. ഇതിനൊപ്പം രണ്ട് കുപ്പി ഗ്ലൂക്കോസും കംഫര്‍ട്ടായിരുന്നുവെന്നും ഇരുവരും പറഞ്ഞു.