36 വര്‍ഷം മുമ്പ് യഥാര്‍ത്ഥ വിക്രമിന്റെ നായികമാരില്‍ ഒരാളിയിരുന്നു ഞാന്‍; ഇപ്പോള്‍ വിക്രമിന്റെ ശബ്ദ റെക്കോര്‍ഡിങ് തന്റെ സ്റ്റുഡിയോയില്‍; കമല്‍ഹസന്‍ ചിത്രം അണിയറയില്‍ ഒരുങ്ങുമ്പോള്‍ പഴയ ഓര്‍മ്മകള്‍ പങ്ക് വയ്ക്കുന്ന കുറിപ്പുമായി ലിസി

എണ്‍പതുകളില്‍ മലയാള സിനിമയുടെ മുഖശ്രീയിരുന്നു ലിസി സിനിമയില്‍ ലിസി ഇപ്പോള്‍ അത്ര സജീവമല്ലെങ്കിലും സമൂഹമാധ്യമങ്ങളില്‍ തന്റെ പുതിയ വിശേഷങ്ങളെല്ലാം അവര്‍ തന്റെ ആരാധകരുമായി പങ്കുവെക്കാറുണ്ട്.
ഇപ്പോഴിതാ പുതിയ തമിഴ് ചിത്രം 'വിക്ര'ത്തെ(Vikram) കുറിച്ച് ലിസി കുറിച്ച വാക്കുകളാണ് ശ്രദ്ധനേടുന്നത്. വര്‍ഷങ്ങള്‍ക്ക് മുമ്പ് കമല്‍ഹാസനും താനും ഒന്നിച്ചഭിനയിച്ച വിക്രം എന്ന സിനിമയെ കുറിച്ചായിരുന്നു നടിയുടെ കുറിപ്പ്. 
ഇപ്പോള്‍ വിക്രമിന്റെ ശബ്ദ റെക്കോര്‍ഡിംഗ് തന്റെ സ്റ്റുഡിയോയില്‍ നടക്കുന്നതിന്റെ സന്തോഷവും പുതിയ സിനിമയില്‍ അഭിനയിക്കാന്‍ കഴിയാത്തതിന്റെ നിരാശയും പഴയ ഓര്‍മ്മകളും പങ്കുവച്ചിരിക്കുകയാണ് ലിസ്സി.

'അന്നും ഇന്നും. വര്‍ഷങ്ങള്‍ക്ക് ശേഷം കമല്‍ സാര്‍ വീണ്ടും വിക്രം എന്ന സിനിമ ചെയ്യുന്നു. ആദ്യ വിക്രമില്‍ നിന്ന് തീര്‍ത്തും വ്യത്യസ്തമാണ് പുതിയ സിനിമയുടെ വിഷയം. യഥാര്‍ത്ഥ വിക്രമിന്റെ നായികമാരില്‍ ഒരാളായിരുന്നു ഞാന്‍. സിനിമയില്‍ ഒരു വേഷം ലഭിക്കാത്തതില്‍ നിരാശയുണ്ടെങ്കിലും, ലിസി ലക്ഷ്മി സ്റ്റുഡിയോയില്‍ വിക്രമിന്റെ ഓഡിയോ റെക്കോര്‍ഡിംഗ് നടന്നതില്‍ അഭിമാനമുണ്ട്. കമല്‍ സാറും പുതിയ വിക്രം ടീമും എന്റെ സ്റ്റുഡിയോയില്‍ ഉണ്ടായിരുന്നു എന്നത് എന്റെ അഭിമാന നിമിഷങ്ങളില്‍ ഒന്നായിരുന്നു. 

വിക്രം, എന്തൊരു അനുഭവമായിരുന്നു! ലൊക്കേഷനില്‍ മുഴുവന്‍ ടീമിനൊപ്പം ഞാന്‍ എന്റെ പതിനേഴാം പിറന്നാള്‍ കേക്ക് മുറിച്ചു. ഇന്ത്യയിലെ ആദ്യത്തെ ബോണ്ട് സിനിമ, രാജസ്ഥാനില്‍ ഷൂട്ടിംഗ്, ഇന്ത്യയിലെ ഏറ്റവും മികച്ച സൂപ്പര്‍സ്റ്റാറുകളില്‍ ഒരാളുമായി (സിനിമയുടെ നിര്‍മ്മാതാവ് കൂടിയായിരുന്നു) അഭിനയിക്കുന്നു. ഞാന്‍ പങ്കെടുത്ത ഏറ്റവും വലിയ ക്രൂ. 17 വയസ്സുള്ള ഒരു സ്‌കൂള്‍ പെണ്‍കുട്ടിക്ക്, ഇത് ആദ്യം ഭയപ്പെടുത്തുന്നതായിരുന്നു. പക്ഷേ ആവേശവും ഉല്ലാസവും വലുതായിരുന്നു. എന്റെ ഏറ്റവും നല്ല ഓര്‍മ്മകളില്‍ ഒന്ന്. കമല്‍ സാറിനും ലോകേഷ് കനകരാജിനും മറ്റ് അണിയറപ്രവര്‍ത്തകര്‍ക്കും ആശംസകള്‍', എന്നാണ് ലിസി കുറിച്ചത്.