സൂര്യയെ നായകനാക്കി കാര്‍ത്തിക് സുബ്ബരാജ് ഒരുക്കുന്ന ചിത്രത്തില്‍ ജയറാമും; സൂര്യ 44 ഷൂട്ടിങിനായി പോര്‍ട്ട് ബ്ലെയര്‍ വിമാനത്താവളത്തിലെത്തിയ താരങ്ങളുടെ വീഡിയോ വൈറല്‍

മലയാളത്തിനും കോളിവുഡിലും ആരാധകരുടെ പ്രിയതാരമാണ് നടന്‍ ജയറാം. മലയാളത്തില്‍ ഓസ്ലറും തമിഴില്‍ പൊന്നിയിന്‍ സെല്‍വന്‍ 2വുമാണ് ജയറാമിന്റേതായി തിയ്യേറ്ററിലെത്തിയ ചിത്രങ്ങള്‍. അതേസമയം താരത്തിന്റെ പുതിയ ചിത്രത്തിന്റെ അപ്ഡേറ്റ് എത്തിയിരിക്കുകയാണ്. സൂര്യയെ നായകനാക്കി കാര്‍ത്തിക് സുബ്ബരാജ് സംവിധാനം ചെയ്യുന്ന ചിത്രത്തില്‍ ജയറാം ശ്രദ്ധേയമായ വേഷത്തിലെത്തുന്നുണ്ട്. ചിത്രത്തിന് ഇതുവരെ പേരിട്ടിട്ടില്ല. ഇത് സംബന്ധിച്ച് അണിയറപ്രവര്‍ത്തകര്‍ ഇന്ന് വിവരങ്ങള്‍ പുറത്തുവിട്ടിട്ടുണ്ട്. 'സൂര്യ44' എന്നാണ് ചിത്രത്തിന് താല്‍ക്കാലികമായി നല്‍കിയിരിക്കുന്ന പേര്. ചിത്രത്തിലെ ജയറാമിന്റെ കഥാപാത്രത്തിന്റെ പോസ്റ്ററും പങ്കുവച്ചിട്ടുണ്ട്.

സൂര്യ തന്നെയാണ് 2ഡി എന്റര്‍ടെയ്ന്‍മെന്റിന്റെ ബാനറില്‍ ചിത്രം നിര്‍മ്മിക്കുന്നത്.സൂര്യയുടെ കരിയറിലെ 44-ാം ചിത്രമാണിത്. ലവ് ലാഫ്റ്റര്‍ വാര്‍ എന്ന ടാഗോടെയാണ് ചിത്രം എത്തുന്നത്. ജയറാമിനെ കൂടാതെ മലയാളത്തില്‍ നിന്ന് ജോജു ജോര്‍ജും ചിത്രത്തിലെത്തുന്നുണ്ട്. പൂജ ഹെഗ്ഡെയും കരുണാകരനും ചിത്രത്തിലെ പ്രധാന കഥാപാത്രങ്ങളെ അവതരിപ്പിക്കുന്നുണ്ട്. താരങ്ങളുടെ ചിത്രത്തിലെ ലുക്കും പുറത്തുവിട്ടിട്ടുണ്ട്. പോസ്റ്ററില്‍ വേറിട്ട ഗെറ്റപ്പിലാണ് ജയറാം എത്തിയിട്ടുള്ളത്.

ചിത്രത്തിന്റെ ഷൂട്ടിങിനായി പോര്‍ട്ട് ബ്ലെയര്‍ വിമാനത്താവളത്തില്‍ നിന്ന് പുറത്തിറങ്ങുന്ന സൂര്യയുടെയും ജയറാമിന്റെയും വീഡിയോ സോഷ്യല്‍ മീഡിയയില്‍ വൈറലാകുന്നുണ്ട്. മാസ്‌ക് ധരിച്ച് കറുത്ത വസ്ത്രം ധരിച്ച് ജയറാം സൂര്യക്കൊപ്പം ആരാധകരുടെ ഇടയിലേക്ക് നടന്നുവരുന്നത് വീഡിയോയില്‍ കാണാം.