പ്രഭാസ് നായകനായ സലാര്‍ ലാറ്റിനമേരിക്കയില്‍  റീലിസിന്; മാര്‍ച്ച് നാല് മുതല്‍ ചിത്രം വിവിധ തിയേറ്ററുകളില്‍

പാന്‍ ഇന്ത്യ സൂപ്പര്‍സ്റ്റാര്‍ പ്രഭാസ് നായകനായ സലാര്‍ ലാറ്റിനമേരിക്കയില്‍ റിലീസ് ചെയ്യുന്നു. മാര്‍ച്ച് 7 മുതല്‍ ലാറ്റിനമേരിക്കന്‍ രാജ്യങ്ങളിലെ വിവിധ തീയേറ്ററുകളില്‍ സലാര്‍ എത്തും. സ്പാനിഷ് ഭാഷയിലാകും ചിത്രം എത്തുന്നത്. ഡിസംബര്‍ 22 ന് തീയേറ്ററുകളില്‍ എത്തിയ ചിത്രം ഇപ്പോഴും നിറഞ്ഞ സദസ്സില്‍ പ്രദര്‍ശനം തുടരുകയാണ്. ഇതുവരെ ആഗോള ബോക്‌സോഫീസില്‍ നിന്ന് 700 കോടിയോളം രൂപയാണ് സലാര്‍ നേടിയിരിക്കുന്നത്.

ഓരോ ദിവസം കഴിയുംതോറും ചിത്രത്തിന്റെ കളക്ഷന്‍ ഉയര്‍ന്നു കൊണ്ടിരിക്കുകയാണ്. രണ്ടു ഭാഗങ്ങളായി എത്തുന്ന സലാറില് പൃഥ്വിരാജ് മികച്ച പ്രകടനമാണ് കാഴ്ചവച്ചിരിക്കുന്നത്. പ്രഭാസിന്റെ കഥാപാത്രമായ ദേവയുടെ അടുത്ത സുഹൃത്ത് വരദരാജ  മാന്നാറായിട്ടാണ് പൃഥ്വി എത്തുന്നത്. 

ഇരുവരേയും കൂടാതെ ബോബി സിംഹ, ശ്രിയ റെഡ്ഡി, ഈശ്വരി റാവൂ തുടങ്ങിയവരും ചിത്രത്തിന്റെ ഭാഗമാണ്. ശ്രുതി ഹാസനാണ് നായിക. ഹോംബാലെ ഫിലിംസിന്റെ ബാനറില്‍ വിജയ് കിരഗന്ദൂര്‍ ആണ് ചിത്രം നിര്‍മിച്ചിരിക്കുന്നത്.കെ.ജി.എഫ് രണ്ടാം ഭാഗത്തിന് ശേഷം പ്രശാന്ത് നീല്‍ സംവിധാനം ചെയ്യുന്ന ചിത്രമാണിത്.