പൃഥ്വിരാജിന്റെ ബോളിവുഡ് ചിത്രം കരണ്‍ ജോഹറിനൊപ്പം; നായിക കജോള്‍; ബോളിവുഡ് സംവിധായകന്റെ പോസ്റ്റ് ചര്‍ച്ചയാക്കി ആരാധകര്‍ 

കഴിഞ്ഞ വര്‍ഷത്തിന്റെ തുടക്കത്തില്‍ മലയാളത്തിന്റെ പ്രിയ നായകന്‍ പൃഥ്വിരാജ് സുകുമാരന്‍ കരണ്‍ ജോഹറിന്റെ ബോളിവുഡ് ചിത്രത്തില്‍ അഭിനയിക്കാന്‍ പോകുന്നു എന്ന് വാര്‍ത്തകള്‍ വന്നിരുന്നു.ആ ചിത്രത്തില്‍ നടി കജോളും സെയ്ഫ് അലി ഖാന്റെ മകന്‍ ഇബ്രാഹിം അലി ഖാനും ഉണ്ടാകുമെന്നും അന്ന് വാര്‍ത്തകള്‍ റിപ്പോര്‍ട്ട് ചെയ്തിരുന്നു. ബൊമന്‍ ഇറാനിയുടെ മകന്‍ കയോസെ ഇറാനിയാകും സംവിധായകന്‍ എന്നും വാര്‍ത്തകള്‍ വന്നതാണ്

ഇപ്പോള്‍ കരണ്‍ ജോഹര്‍ തന്റെ ഇന്‍സ്റ്റഗ്രാമില്‍ പുതിയ ഒരു പോസ്റ്റ് പങ്കുവെച്ചതോടെ അത് പൃഥ്വിയും കജോളും ഒന്നിക്കുന്ന ചിത്രമാകും എന്ന പ്രതീക്ഷയിലാണ് ആരാധകര്‍.  

ഇതൊരു സിനിമയുടെ പ്രഖ്യാപനമല്ല എന്ന് പറഞ്ഞു കൊണ്ടാണ് കരണ്‍ ജോഹറിന്റെ പോസ്റ്റ് തുടങ്ങുന്നത്. ഗസ്സ് ചെയ്തു തുടങ്ങാം എന്ന ക്യാപ്ഷനോടെയാണ് അദ്ദേഹത്തിന്റെ പോസ്റ്റ്. നവാഗത സംവിധായകന്റെ തീരുമാനമനുസരിച്ച് ഈ ടീം കഴിഞ്ഞ ഒരു വര്‍ഷമായി ചിത്രീകരണം നടത്തുന്നുണ്ടായിരുന്നെന്നും അതിലെ ചില കാര്യങ്ങള്‍ അണിയറ പ്രവര്‍ത്തകരില്‍ നിന്നുപോലും മറച്ചുവച്ചിട്ടുണ്ടെന്നും പോസ്റ്റില്‍ പറയുന്നു. ഒപ്പം സിനിമയിലെ കാസ്റ്റിങ്ങിനെക്കുറിച്ചുള്ള സൂചനകളും കരണ്‍ നല്‍കുന്നു.

ആദ്യ സൂചന നായകനെ പറ്റിയുള്ളതാണ്. ഇപ്പോള്‍ പാന്‍ ഇന്ത്യന്‍ ലെവലില്‍ വരുന്ന സൗത്തില്‍ നിന്നുള്ള സൂപ്പര്‍ താരം എന്നായിരുന്നു കരണ്‍ പറഞ്ഞത്. നായികയായി എത്തുന്നത് സെല്ലുലോയ്ഡിലെ വൈകാരികമായ പ്രകടനത്താല്‍ നമ്മെ വിസ്മയിപ്പിക്കുന്ന പ്രിയനടി ആണെന്നും മൂന്നാമത്തെ സൂചന പാരമ്പര്യമുള്ള നവാഗത നടന്‍ എന്നുമായിരുന്നു. നായകന്‍ സൗത്തില്‍ നിന്നായതു കൊണ്ട് ധനുഷ്,? പ്രഭാസ്,? മഹേഷ് ബാബു എന്നിവരുടെ പേരുകള്‍ ആരാധകര്‍ കമന്റ് ചെയ്തു. എന്നാല്‍ കൂടുതല്‍ പേരും പറഞ്ഞത് പൃഥ്വിരാജിന്റെ പേരാണ്. നായികയായി കൂടുതല്‍ പേരും പറഞ്ഞത് കജോളിനെയായിരുന്നു . നവാഗത നടനായി ഇബ്രാഹിം അലിഖാനെയും ആരാധകര്‍ തിരഞ്ഞെടുത്തു.

നേരത്തെ പുറത്തുവന്ന റിപ്പോര്‍ട്ടുകള്‍ അനുസരിച്ചാണ് ആരാധകരുടെ മറുപടി. ഇതോടെ പൃഥ്വിരാജ് - കജോള്‍ ചിത്രത്തിനായുള്ള കാത്തിരിപ്പിലാണ് ആരാധകര്‍. നടന്‍ ബൊമാന്‍ ഇറാനിയുടെ മകന്‍ കയോസെയാണ് ചിത്രം സംവിധാനം ചെയ്യുന്നത്. മൈ നെയിം ഈസ് ഖാന് ശേഷം ആദ്യമായാണ് കജോളും കരണും ഒരു ചിത്രത്തിനായി ഒന്നിക്കുന്നത്.

അക്ഷയ് കുമാറും ടൈഗര്‍ ഷ്റോഫും അഭിനയിക്കുന്ന 'ബഡേ മിയാന്‍ ഛോട്ടേ മിയാനിലും ' പൃഥ്വിരാജ് അഭിനയിക്കുന്നുണ്ട്. ചിത്രത്തിന്റെ ടീസര്‍ കഴിഞ്ഞ ദിവസം പുറത്തുവന്നിരുന്നു. പൃഥ്വി വില്ലനായിട്ടാണ് എത്തുന്നതെന്ന സൂചനയും ടീസര്‍ നല്‍കുന്നുണ്ട്.പൃഥ്വിയുടെ ഇന്‍ട്രോ തന്നെയാണ് ടീസറിന്റെ പ്രധാന ആകര്‍ഷണങ്ങളിലൊന്ന്. സിനിമയില്‍ പട്ടാളക്കാരായിട്ടാണ് അക്ഷയ് കുമാറും ടൈഗര്‍ ഷ്റോഫും എത്തുന്നത്. ആക്ഷന്‍ രംഗങ്ങള്‍ അടങ്ങിയിരിക്കുന്ന ടീസര്‍ യൂട്യൂബില്‍ പ്രത്യക്ഷപ്പെട്ട് മിനിട്ടുകള്‍ക്കുള്ളില്‍ തന്നെ വൈറലായിരുന്നു. . അയ്യ, ഔറംഗസേബ്, നാം ഷബന എന്നിവയാണ് പൃഥ്വിരാജ് അഭിനയിച്ച മറ്റ് ബോളിവുഡ് ചിത്രങ്ങള്‍. അക്ഷയ് കുമാറിനെ നായകനാക്കി ഒരുക്കിയ സെല്‍ഫി എന്ന ചിത്രത്തിന്റെ സഹനിര്‍മാതാവുമായിരുന്നു പൃഥ്വിരാജ്.