മോഹന്‍ലാല്‍-പ്രിയന്‍ കൂട്ടുകെട്ട് വീണ്ടും; ഹരം എന്ന് പേര് നല്കിയിരിക്കുന്ന ചിത്രത്തിന്റെ സൂചനയുമായി എംജി ശ്രീകുമാര്‍

മോഹന്‍ലാല്‍-പ്രിയദര്‍ശന്‍ കൂട്ടുകെട്ട് വീണ്ടും ഒന്നിക്കുന്നു. ഗായകന്‍ എംജി ശ്രീകുമാര്‍ ആണ് ഇക്കാര്യം സമൂഹ മാധ്യമങ്ങളിലൂടെ അറിയിച്ചത്. അടുത്ത വര്‍ഷം ആരംഭിക്കുന്ന സിനിമയിലൂടെയായിരിക്കും ഈ കൂട്ടുകെട്ട് ഒന്നിക്കുക എന്നാണ് എംജി ശ്രീകുമാര്‍ പറയുന്നത്. 'ഹരം' എന്നായിരിക്കും സിനിമയുടെ പേരെന്നാണ് അദ്ദേഹം നല്‍കുന്ന സൂചന.

പൂച്ചക്കൊരു മൂക്കുത്തി എന്ന സിനിമയിലൂടെയാണ് പ്രിയദര്‍ശന്‍ സ്വതന്ത്ര സംവിധായകനാകുന്നത്. ആ ചിത്രത്തില്‍ മോഹന്‍ലാലായിരുന്നു പ്രധാന കഥാപാത്രങ്ങളിലൊന്ന് അവതരിപ്പിച്ചത്. പിന്നീട് താളവട്ടം, ചിത്രം, വെള്ളാനകളുടെ നാട്, കിലുക്കം, മിഥുനം, ചന്ദ്രലേഖ തുടങ്ങി ഒട്ടനവധി ചിത്രങ്ങളാണ് ഈ കൂട്ടുകെട്ടില്‍ പുറത്തിറങ്ങിയത്. അതില്‍ ഭൂരിഭാഗവും വമ്പന്‍ വിജയങ്ങളും മലയാളികള്‍ എക്കാലവും ഓര്‍ത്തിരിക്കുന്ന ചിത്രങ്ങളുമായി.

മോഹന്‍ലാല്‍-പ്രിയന്‍ കൂട്ടുകെട്ടിന്റെ സിനിമകളിലെ ഹിറ്റ് ഗാനങ്ങളില്‍ പലതും ആലപിച്ചത് എം ജി ശ്രീകുമാറാണ്. ഒപ്പം പ്രിയദര്‍ശന്‍-മോഹന്‍ലാല്‍ ടീമിന്റെ ഒരു മരുഭൂമി കഥ എന്ന സിനിമയ്ക്ക് സംഗീതം ഒരുക്കിയതും എംജി ശ്രീകുമാറായിരുന്നു. മൂവരും വീണ്ടും ഒന്നിക്കുന്നു എന്നത് സിനിമാപ്രേമികള്‍ ഏറെ ആവേശത്തോടെയാണ് സ്വീകരിച്ചിരിക്കുന്നത്‌