ഗ്ലാസ് തിന്നുന്ന കുടുംബം; കുടുംബ സമേതം കുപ്പി ചില്ലുകള്‍ കഴിക്കുന്ന വീഡിയോ പങ്കുവെച്ച്‌ ലെന

മലയാളി പ്രേക്ഷകരെ പലതരം മേക്കോവറിലൂടെ അത്ഭുതപെടുത്താറുള്ള നടിയാണ് ലെന. നിരവധി ശ്രദ്ധേയമായ  കഥാപാത്രങ്ങളിലൂടെ മലയാള സിനിമയിൽ തന്റേതായ ഒരിടം നേടിയെടുക്കാൻ ലെനയ്ക്ക് കഴിഞ്ഞിട്ടുണ്ട്. സോഷ്യല്‍ മീഡിയയില്‍ ഏറെ  സജീവമായ താരം തന്റെ വിശേഷങ്ങൾ എല്ലാം തന്നെ ആരാധകരുമായി പങ്കുവച്ച് എത്താറുമുണ്ട്. എന്നാൽ ഇപ്പോൾ താരം പങ്കുവച്ച വീഡിയോ ആണ് സോഷ്യൽ മീഡിയയിലൂടെ ശ്രദ്ധ നേടുന്നത്. 

താരം സമൂഹമാധ്യമങ്ങളിലൂടെ ഒരു ചില്ലു ഗ്ലാസ് കടിച്ചു തിന്നുന്ന ലെനയുടെ അച്ഛന്റെയും അമ്മയുടേയും വീഡിയോയാണ്  പങ്കുവെച്ചിരിക്കുന്നത്. കുറച്ചു വര്‍ഷങ്ങള്‍ക്കു മുന്‍പ് ചില്ലു കഷ്ണം കടിച്ചു മുറിച്ചു തിന്നുന്ന വീഡിയോയും ലെന ഇതോടൊപ്പം  പങ്കുവെച്ചിരുന്നു.  2017-ല്‍ പോസ്റ്റ് ചെയ്ത വീഡിയോയിലൂടെ തന്റെ ഷൂട്ടിങ് സെറ്റിലെ ഫേക്ക് ഗ്ലാസ് തിന്നാണ് ആരാധകരെ അമ്ബരപ്പിച്ചതെങ്കില്‍ ഇത്തവണ അമ്മയുണ്ടാക്കിയ കഴിക്കാവുന്ന ഗ്ലാസു കൊണ്ടാണ് ലെന ഏവരേയും ഞെട്ടിപ്പിച്ചത്.

''ഗ്ലാസ് തിന്നുന്ന കുടുംബം. 2017 മെയ് 15ന് ആദം ജോണ്‍ എന്ന സിനിമയുടെ ഷൂട്ടിങ്ങിനിടയിലാണ് ചില്ല് കഴിക്കുന്ന പ്രാങ്ക് വീഡിയോ പങ്കുവെച്ചത്. സിനിമയിലെ ഫൈറ്റ് സീനുകള്‍ക്കായി ഉപയോഗിച്ചിരുന്ന വാക്സ് ഗ്ലാസായിരുന്നു ഇത്. ഈ വര്‍ഷം അച്ഛന്റെ പിറന്നാളിന് അമ്മ കഴിക്കാവുന്ന ഒരു കേക്ക് ടോപ്പര്‍ അമ്മയുണ്ടാക്കി. അത് കോക്ക്ടെയില്‍ ഗ്ലാസ് പോലെയായിരുന്നു. ഞങ്ങളുടെ ഗ്ലാസ് കഴിക്കുന്ന വീഡിയോകളെല്ലാം ചേര്‍ത്ത് ഈ വീഡിയോ പോസ്റ്റ് ചെയ്യാതിരിക്കാന്‍ എനിക്ക് കഴിഞ്ഞില്ല. ജസ്റ്റ് ഫോര്‍ ഹൊറര്‍. ദയവായി ഇത് വീട്ടില്‍ പരീക്ഷിക്കരുത്.'' - ലെന കുറിച്ചു.