ചാക്കോച്ചനോടുള്ള ഇഷ്ടം അച്ഛനെക്കൊണ്ട് സിനിമ നിര്‍മ്മിച്ചു; പിന്നെ കാണാമറയത്ത്; പക്ഷേ സത്യം അതല്ല; തുറന്ന് പറഞ്ഞ് പ്രിയം നായിക

മലയാള സിനിമയിലെ ഒരു അപൂര്‍വ്വ കഥയാണ് നടി ദീപ നായറിന്റെ ജീവിതം. 2000-ല്‍ പുറത്തിറങ്ങിയ പ്രിയം എന്ന ചിത്രത്തിലൂടെയാണ് ദീപ മലയാള സിനിമയില്‍ അരങ്ങേറ്റം കുറിച്ചത്. കുഞ്ചാക്കോ ബോബനും മൂന്ന് ബാലതാരങ്ങളായ അരുണ്‍, അശ്വിന്‍, മഞ്ജിമ മോഹന്‍ എന്നിവരുമായി ചേര്‍ന്ന് അവതരിപ്പിച്ച ചിത്രത്തിലെ നായികയായി ദീപ മലയാളികളുടെ മനസില്‍ ഇടം നേടി. എന്നാല്‍ പ്രിയം കഴിഞ്ഞ് ദീപ വീണ്ടും ഒരു സിനിമയിലും അഭിനയിച്ചില്ല.

കാലങ്ങളോളം സിനിമാ ലോകത്ത് നിന്ന് വിട്ടുനിന്ന ദീപയെ കുറിച്ചുള്ള കഥകള്‍ പിന്നീട് പ്രേക്ഷകരുടെ കൗതുകമായി. കുഞ്ചാക്കോ ബോബന്റെ കടുത്ത ആരാധികയായിരുന്ന ദീപ അച്ഛന്റെ നിര്‍മാണത്തില്‍ മാത്രം സിനിമ ചെയ്തുവെന്നാണ് ഏറെ പ്രചരിച്ചിരുന്ന കഥ. എന്നാല്‍ പുതിയതായി ആരംഭിച്ച മ്യൂസിങ്‌സ് ബൈ ദീപ നായര്‍ എന്ന സോഷ്യല്‍ മീഡിയ പേജിലൂടെയാണ് നടി ഇത്തരം ആരോപണങ്ങള്‍ക്ക് മറുപടി നല്‍കിയത്.

'എന്റെ അച്ഛന്‍ സിനിമ നിര്‍മിച്ചിട്ടില്ല. നിര്‍മാതാവിന്റെ പേര് നായര്‍ ആയിരുന്നു എന്നതാണ് തെറ്റിദ്ധാരണയ്ക്ക് കാരണം. ദയവായി ഇത്തരം നുണക്കഥകള്‍ പ്രചരിപ്പിക്കരുത്,' എന്നാണ് ദീപ വ്യക്തമാക്കിയത്. ഇന്ന് മെല്‍ബണില്‍ കുടുംബജീവിതം നയിക്കുന്ന ദീപ, തന്റെ ബിസിനസ് ആവശ്യങ്ങള്‍ക്കായാണ് സോഷ്യല്‍ മീഡിയയില്‍ സജീവമായത്. പ്രിയംയിലെ ഗാനങ്ങളും, ദീപയുടെ മുഖവും, മലയാളികളുടെ മനസില്‍ ഇന്നും പുതുമയോടെ നിലനില്‍ക്കുന്നു.