അനുമോളുടെ യാത്രാ വീഡിയോ കോര്‍ത്തിണക്കിയുള്ള യൂട്യൂബ് ചാനലിന് വമ്പന്‍ സ്വീകരണം; അനുയാത്ര യുട്യൂബ് ചാനല്‍ ടൈറ്റില്‍ ലോഗോ പ്രകാശനം ചെയ്ത് നടന്‍ ദുല്‍ഖര്‍

നടിമാര്‍ തങ്ങളുടെ വ്യത്യസ്ഥമായ വീഡിയോകള്‍  യൂട്യൂബ് അടക്കമുള്ള സമൂഹ മാധ്യമം വഴി പ്രചരിപ്പിക്കുമ്പോള്‍ അവരില്‍ വ്യത്യസ്തയാവുകയാണ് നടി അനുമോള്‍. അനുമോള്‍ ആരംഭിച്ച് യൂട്യൂബ് ചാനല്‍ ഉദ്ഘാടനം ചെയ്ത ശേഷം നടന്‍ ദുല്‍ഖര്‍ സല്‍മാന്‍ പറഞ്ഞ വാക്കുകളാണ് ചാനലിനെ പ്രേക്ഷകര്‍ക്കിടയില്‍ ഹിറ്റാക്കുന്നത്. അനുമോളുടെ യാത്രാ വീഡിയോകള്‍ കണ്ട് അസൂയ തോന്നുന്നുവെന്നാണ് നടന്‍ ദുല്‍ഖര്‍ സല്‍മാന്‍ പറഞ്ഞത്. അനുവിന്റെ ട്രാവല്‍ വീഡിയോ ചാനല്‍ 'അനുയാത്ര' പ്രകാശനം ചെയ്യുന്ന വേളയിലാണ് ദുല്‍ഖര്‍ ഇക്കാര്യം പറഞ്ഞത്. ഇന്നലെ വൈകിട്ട് അഞ്ചുമണിക്കാണ് യൂട്യൂബ് ചാനല്‍ വഴി അനുമോളും ദുല്‍ഖറും പുതിയ ടൈറ്റില്‍ പ്രേക്ഷകര്‍ക്ക് പരിചയപ്പെടുത്തിയത്.

'അനുമോളുടെ യൂട്യുബ് ചാനലായ അനുയാത്രയുടെ ടൈറ്റില്‍ ലോഗോ ലോഗിന്‍ ചെയ്യുകയാണ്. എന്റെ വലിയൊരു ആഗ്രഹമാണ് ഇത്തരമൊരു ചാനല്‍ ചെയ്യാനൊക്കെ. കൂടുതല്‍ യാത്ര ചെയ്യാന്‍ അതും ഒരു കാരണമാകുമല്ലോ. അനുവിന്റെ വീഡിയോകള്‍ കണ്ട് ഞാന്‍ വളരെ അസൂയപ്പെട്ടിരിക്കുകയാണ്. വളരെ നന്നായി വീഡിയോസ് അവതരിപ്പിച്ചിരിക്കുന്നു. അനുമോള്‍ സംസാരിക്കുമ്പോഴും തന്റെ നാടിനെ കുറിച്ചും യാത്രകളെ കുറിച്ചും പറയാറുണ്ട്. ഈ വീഡിയോസ് എല്ലാം അതുപോലെ തന്നെയുണ്ട്' അനുമോള്‍ക്ക് ആശംസകള്‍ നേര്‍ന്ന് ദുല്‍ഖര്‍ പറഞ്ഞു.

അനുമോളുടെ ഇഷ്ടങ്ങളെല്ലാം കോര്‍ത്തിണക്കിയാണ് ടൈറ്റില്‍ രൂപവല്‍കരിച്ചിരിക്കുന്നത്. നൃത്തം മുതല്‍ ഡ്രൈവിങ് വരെ ഇഷ്ടപ്പെടുന്ന എല്ലാ കാര്യങ്ങളും ടൈറ്റിലിലുണ്ട്. യാത്രകളുമായി അനുമോള്‍ക്കുള്ള ചങ്ങാത്തം ഏറെ പ്രശസ്തമാണ്. ഈ സാഹചര്യത്തിലാണ് അനുയാത്ര എന്ന യൂട്യൂബ് ചാനലുമായി അനുമോള്‍ രംഗ പ്രവേശം നടത്തിയിരിക്കുന്നത്.