കമലഹാസന്‍ ചിത്രം ഇന്ത്യന്‍ 2-ല്‍ പ്രധാന വേഷത്തില്‍ നടന്‍ ആര്യ; ചിത്രം നിര്‍മ്മിക്കുന്നത് 200 കോടിയോളം മുതല്‍ മുടക്കില്‍

ഇന്ത്യന്‍ 2 ന്റെ ഷൂട്ടിങ് ചെന്നൈയില്‍ പുരോഗമിക്കുമ്പോള്‍ ചിത്രത്തില്‍ പ്രധാന വേഷത്തില്‍ നടന്‍ ആര്യയും എത്തുന്നുവെന്നാണ് പുതിയ റിപ്പോര്‍ട്ടുകള്‍. ശങ്കര്‍ സംവിധാനം ചെയ്യുന്ന ചിത്രത്തില്‍ കമലഹാസനാണ് നായകന്‍. ചിത്രത്തിന് വേണ്ടി അടുത്തിടെ താരം കടുത്ത വര്‍ക്കൗട്ട് ചെയ്ത് ശരീരം കൂടുതല്‍ കരുത്തുറ്റതാക്കാന്‍ ശ്രമിക്കുന്നതായി വാര്‍ത്തയുണ്ടായിരുന്നു.കമലഹാസന്റെ അഭിനയജീവിതത്തിലെ ഏറെ ശ്രദ്ധിക്കപ്പെട്ടതും ഹിറ്റുമായ ഇന്ത്യന്റെ രണ്ടാം ഭാഗമായി എത്തുന്ന ചിത്രമാണ് ഇന്ത്യന്‍ 2.  രണ്ടാഴ്ച നീളുന്ന ചെന്നൈയിലെ ആദ്യ ഷെഡ്യൂളിന് ശേഷം സംഘം വിദേശത്തേക്ക് തിരിക്കും. ഫെബ്രുവരിയില്‍ തുടങ്ങുന്ന വിദേശ ഷെഡ്യൂള്‍ 2 മാസത്തിലധികം നീണ്ടു നില്‍ക്കും. എട്ടു വിദേശ രാജ്യങ്ങളിലാണ് ചിത്രത്തിന് ഷൂട്ടിംഗുള്ളത്. 200 കോടിയോളം മുതല്‍ മുടക്കില്‍ ലൈക പ്രൊഡക്ഷന്‍സാണ് ഇന്ത്യന്‍ 2 നിര്‍മിക്കുന്നത്.

കമലഹാസന്‍ കഥാപാത്രം സേനാപതിയുടെ ചെറുമകന്റെ വേഷത്തിനായി ദുല്‍ഖര്‍ സല്‍മാനെ സമീപിച്ചിരുന്നെങ്കിലും തിരക്കുകള്‍ മൂലം പിന്‍മാറേണ്ടി വന്നുവെന്നാണ് വിവരം. സിദ്ധാര്‍ത്ഥാണ് ഈ വേഷത്തില്‍ എത്തുന്നത്. കാജല്‍ അഗര്‍വാളാണ് ചിത്രത്തില്‍ നായിക. മക്കള്‍ നീതി മയ്യം എന്ന രാഷ്ട്രീയ പാര്‍ട്ടി രൂപീകരിച്ച് രാഷ്ട്രീയത്തിലേക്കിറങ്ങിയ കമല്‍ പ്രധാന വേഷത്തിലെത്തുന്ന അവസാന ചിത്രമായിരിക്കും ഇന്ത്യന്‍ 2 എന്ന തരത്തിലും റിപ്പോര്‍ട്ടുകളുണ്ട്. അഭിനയം മാറ്റിവെച്ച് രാഷ്ട്രീയത്തില്‍ ശ്രദ്ധ വെക്കാനാണ് കമല്‍ ഒരുങ്ങുന്നതെന്നാണ് സൂചന.