മമ്മൂക്ക അങ്ങനെ പറഞ്ഞപ്പോഴാണ് ഞാനത് ഗൗരവത്തോടെ കാണുന്നത്; മെഗാസ്റ്റാറിനൊപ്പമുളള അനുഭവം പങ്കുവച്ച് നടൻ അലന്‍സിയര്‍

മലയാള  സിനിമ പ്രേമികൾക്ക് ഏറെ സുപരിചിതനായ താരമാണ് നടൻ അലൻസിർ. നിരവധി സിനിമകളിലൂടെ ശ്രദ്ധേയമായ കഥാപാത്രങ്ങളെ അവതരിപ്പിക്കാൻ താരത്തിന് സാധിക്കുകയും ചെയ്തു. മഹേഷിന്‌റെ പ്രതികാരം പോലുളള സിനിമകളിലൂടെയാണ് അദ്ദേഹത്തെ പ്രേക്ഷകർ കൂടുതൽ അടുത്തറിഞ്ഞത്.  നടന്‍ ആദ്യമായി മെഗാസ്റ്റാര്‍ മമ്മൂട്ടിക്കൊപ്പം കസബ എന്ന ചിത്രത്തിലാണ് അഭിനയിച്ചത്. കസബ ചിത്രീകരണത്തിനിടെ നടന്ന അനുഭവം ഒരു യൂടൂബ് ചാനലിന് നല്‍കിയ അഭിമുഖത്തില്‍ ഇപ്പോൾ വെളിപ്പെടുത്തിയിരിക്കുകയാണ് താരം.

കസബയില്‍ വെടിവെയ്പ്പ് ഒകെയുളള സംഘടന രംഗമുണ്ടായിരുന്നു. ആ സീന്‍ എടുക്കുന്ന സമയത്ത് നമ്മളിങ്ങനെ ഒളിച്ചിരിക്കണം. അപ്പുറത്ത് ഷാര്‍പ്പ് ഷൂട്ട് നടക്കുന്നു, ഇപ്പുറത്ത് പടക്കം പൊട്ടും, ഇങ്ങനെ കുറെ ഇലക്ട്രിക്കല്‍ സാധനങ്ങളൊക്കെ ഫിറ്റ് ചെയ്തുവെച്ചിട്ടുണ്ട്. അപ്പോ ഒരു ഷോട്ട് കഴിഞ്ഞപ്പൊഴാണ് മമ്മൂക്ക എന്നെ നോക്കുമ്പോള്‍ ഞാന്‍ കാതിനകത്ത് ഒന്നും വെച്ചിട്ടില്ല. എനിക്കറിയില്ല വാസ്തവത്തില്‍. ഞാന്‍ ആദ്യമായിട്ടാണ് അങ്ങനെ ഒരു സീനില്‍ അഭിനയിക്കുന്നത്.

അപ്പോ ഇത്തരം ഇലക്ട്രിക്കല്‍ സ്പാര്‍ക്കിംഗുകള്‍ ഉണ്ടാകുമ്പോള്‍ നമ്മുടെ കാതിനൊക്ക പ്രശ്‌നമുണ്ടാവും. അപ്പോ എല്ലാവരും പഞ്ഞിവെക്കും. എനിക്ക് ഇതറിയില്ലായിരുന്നു. മമ്മൂക്ക അത് കണ്ടു. എന്നോട് ചോദിച്ചു എന്താ പഞ്ഞി വെക്കാത്തേന്ന്. ഞാന്‍ പറഞ്ഞു എനിക്ക് ആരും തന്നില്ല. ഉടനെ അദ്ദേഹം സ്റ്റണ്ട് മാസ്റ്ററെ വിളിച്ചിട്ട് താന്‍ എന്താടോ, അയാള്‍ക്ക് പഞ്ഞി കൊടുക്കേണ്ടെ എന്ന് പറഞ്ഞു. കാതടിച്ച് പോയാല്‍ അയാള്‍ക്കല്ലെ പോവൂ. തനിക്ക് എന്തേലും പ്രശ്‌നമുണ്ടോ. അപ്പോ മമ്മൂക്ക പറഞ്ഞപ്പോഴാണ് ഞാനത് ഗൗരവത്തോടെ കാണുന്നതും. ആ മനുഷ്യന്‍ കൂടെ നില്‍ക്കുന്ന നടനോട് കാണിക്കുന്ന കരുതല്‍ അപ്പോള്‍ എനിക്ക് ബോധ്യപ്പെട്ടു, അഭിമുഖത്തില്‍ അലന്‍സിയര്‍ പറഞ്ഞു.