ഏഴ് വര്‍ഷത്തെ ഇടവേളകള്‍ക്ക് ശേഷം മേഘ്‌ന വിന്‍സന്റ് വീണ്ടും സീരിയല്‍ ലോകത്തേക്ക്; ഏഷ്യനെറ്റില്‍ ആരംഭിക്കുന്ന സാന്ത്വനം 2 യില്‍ ഇനി നടിയുമെത്തും

ഏഷ്യാനെറ്റിലെ ചന്ദനമഴ എന്ന സീരിയല്‍ അവസാനിച്ചിട്ട് വര്‍ഷങ്ങളേറെ ആയെങ്കിലും മേഘ്‌നാ വിന്‍സന്റ് എന്ന നടി മലയാളികള്‍ക്ക് ഇപ്പോഴും അമൃതയാണ്. ദേശായി കുടുംബത്തിലെ മൂത്തമരുമകളുടെ പ്രകടന വീഡിയോകള്‍ ട്രോളായും അല്ലാതെയും ചെറു ക്ലിപ്പുകളായി ഇന്നും പ്രേക്ഷകര്‍ക്കിടയിലേക്ക് എത്തുകയും ചെയ്യുന്നുണ്ട്. ചന്ദനമഴ എന്ന മെഗാ പരമ്പരയ്ക്ക് ശേഷം തമിഴില്‍ തിരക്കിലായിരുന്നു മേഘ്‌ന. അതിനിടെ സ്വകാര്യ ജീവിതത്തിലെ തകര്‍ച്ചകളും സംഭവിച്ചെങ്കിലും അതെല്ലാം ചവിട്ടു പടികളാക്കി മാറ്റിയാണ് മേഘ്ന മുന്നോട്ടു പോയത്. തമിഴ് സീരിയല്‍ അവസാനിച്ചതോടെയാണ് മേഘ്ന എറണാകുളത്ത് വീട് വാങ്ങി കരിയര്‍ മലയാളത്തിലേക്ക് മാറ്റിയത്. പിന്നീട് സീ കേരളത്തിലും, സണ്‍ ടിവിയിലും എല്ലാം സജീവമായി. പക്ഷേ ഏഷ്യനെറ്റിലേക്ക് ഒരു തിരിച്ചുവരവുണ്ടായില്ല.

ഇപ്പോഴിതാ, ഏഴ് വര്‍ഷത്തെ ഇടവേളകള്‍ക്ക് ശേഷം മേഘ്‌ന ഏഷ്യനെറ്റ് ചാനലിലേക്ക് തിരിച്ചത്തുകയാണ്. ഏഷ്യനെറ്റില്‍ സംപ്രേക്ഷണം ചെയ്യുന്ന സാന്ത്വനം 2 യില്‍ ഇനി മേഘ്‌ന വിന്‍സന്റും ഉണ്ടാവും. കഥാപാത്രത്തിന് വേണ്ടി ധാവണി സെറ്റ് ചെയ്യുന്നതടക്കം കഥാപാത്രത്തിനു വേണ്ടിയുള്ള ഒരുക്കത്തിലാണ് നടിയിപ്പോള്‍. സാന്ത്വനം 2 യില്‍ മേഘ്‌നയുടെ കഥാപാത്രം എന്താണെന്നോ എങ്ങനെയാണെന്നോ പറഞ്ഞിട്ടില്ല. ദീപന്റെ പെയര്‍ ആയിട്ടാണ് മേഘ്‌ന എത്തുന്നത്. പാവാട ധാവണിയില്‍ അതി സുന്ദരിയായ മേഘ്‌നയെ ചിത്രങ്ങളില്‍ കാണാം. നിലവില്‍ സൂര്യ ടിവിയിലെ ഹൃദയം എന്ന സീരിയലാണ് മേഘ്‌ന ചെയ്തുകൊണ്ടിരിയ്ക്കുന്നത്. ആ സീരിയലിലെ അഭിനയം കൈയ്യടി നേടി മുന്നോട്ടു പോകുമ്പോഴാണ് സാന്ത്വനത്തിലേക്കും എത്തുന്നത്.

ചന്ദനമഴയിലൂടെ പ്രേക്ഷകഹൃദയം കീഴടക്കിയ മേഘ്‌ന അതിനുശേഷം സീരിയലില്‍ നിന്ന് ഇടവേളയെടുത്തിരുന്നു. വിവാഹവും ദാമ്പത്യ പ്രശ്‌നങ്ങളും എല്ലാം കഴിഞ്ഞ് ആ ബന്ധം വേര്‍പെടുത്തിയതിനു ശേഷമാണ് മേഘ്‌ന വീണ്ടും മലയാളത്തിലേക്ക് തിരിച്ചെത്തിയത്. മിസിസ് ഹിറ്റ്ലര്‍ എന്ന പരമ്പരയിലൂടെയുള്ള നടിയുടെ തിരിച്ചു വരവിന് ഗംഭീര സ്വീകരണമാണ് ആരാധകര്‍ ഒരുക്കിയത്. അതിനിടെ ചെന്നൈയില്‍ വാടകയ്ക്ക് താമസിച്ചിരുന്ന നടി അമ്മയ്ക്കും അമ്മമ്മയ്ക്കും ഒപ്പം എറണാകുളത്ത് സ്വന്തമായി ഒരു വീട് വാങ്ങി സ്ഥിരതാമസത്തിന് എത്തിയ വിശേഷവും എല്ലാം ആരാധകര്‍ അറിഞ്ഞിരുന്നു. പിന്നാലെ അവിടെ കുറച്ച് സ്ഥലം വാങ്ങുകയും പച്ചക്കറികളടക്കമുള്ള കൃഷികളൊക്കെ ചെയ്ത് ആ തരത്തിലും നടി ഇപ്പോള്‍ വരുമാനമുണ്ടാക്കിയാണ് മുന്നോട്ടു പോകുന്നത്.

കുട്ടിക്കാലം മുതലേ മേഘ്നയ്ക്ക് ഇഷ്ടമുള്ളതായിരുന്നു കൃഷി. മീന്‍കൃഷിയും പച്ചക്കറി കൃഷിയുമെല്ലാം ഉള്‍പ്പെടുന്ന ഒരു ഫാം ആണ് മേഘ്ന ഇപ്പോള്‍ നടത്തുന്നത്.
ഫാമിന്റെ ഉടമ മാത്രമല്ല, പ്രധാന ജോലിക്കാരിയും മേഘ്ന തന്നെയാണ്. ഒരു ട്രാക്ക് സ്യൂട്ടും ടീഷര്‍ട്ടുമിട്ട് കിളയ്ക്കാനും ഫാമിലെ പണികള്‍ക്കുമൊക്കെ ഇറങ്ങുന്ന മേഘ്നയെ പലപ്പോഴും കാണാനെത്തുന്ന ആരാധകര്‍ക്കുപോലും മനസ്സിലാവാറില്ല. ഫാമില്‍ പോയാല്‍ ചെടികളോടൊക്കെ സംസാരിച്ചും പരിഭവം പറഞ്ഞും പിണങ്ങിയുമൊക്കെയാണ് മേഘ്ന കൃഷിയിടത്തില്‍ സമയം ചെലവഴിക്കുന്നത്. ചെറിയ പ്രായത്തിലെ വിവാഹവും ഡിവോഴ്‌സും, പിന്നീട് നേരിട്ട ഡിപ്രഷനെയും ഒക്കെ അതിജീവിച്ചുകൊണ്ട് ഒരു പുതിയ ജീവിതം ആസ്വദിക്കുകയാണ് മേഘ്ന. സ്വന്തം അധ്വാനത്തിലൂട നഷ്ടപെട്ടത് ഒക്കെയും മേഘ്ന തിരികെ പിടിക്കുകയാണ്.