സെന്‍സിറ്റീവായ വിഷയങ്ങളില്‍ പ്രതികരിക്കുമ്പോള്‍  പൂര്‍ണമായ പശ്ചാത്തലം മനസ്സിലാക്കാന്‍  ശ്രദ്ധിക്കേണ്ടതായിരുന്നു;പക്ഷെ ആ നിലപാടില്‍ ഇപ്പോഴും ഉറച്ചുനില്‍ക്കുന്നു; പരസ്യമായി മാപ്പ് പറഞ്ഞു ദിയ കൃഷ്ണ; സോഷ്യല്‍ മീഡിയയില്‍ നിന്ന് ഒളിച്ചോടില്ലെന്നും പ്രതികരണം

കേരളത്തിനെതിരെ വിദ്വേഷ പ്രചരണം നടത്തിയ ഉത്തരേന്ത്യന്‍ യൂട്യൂബറുടെ വീഡിയോയ്ക്ക് പിന്തുണയറിയിച്ച് കമന്റ് ചെയ്ത സംഭവത്തില്‍ കടുത്ത വിമര്‍ശനം നേരിട്ടതിന് പിന്നാലെ പരസ്യമായി ക്ഷമാപണം നടത്തി നടന്‍ കൃഷ്ണകുമാറിന്റെ മകള്‍ ദിയ കൃഷ്ണ. വീഡിയോയുടെ ആദ്യ പകുതി മാത്രം കണ്ട ശേഷമാണ് താന്‍ അത്തരമൊരു കമന്റ് രേഖപ്പെടുത്തിയതെന്നും, വീഡിയോയിലുടനീളം കൊച്ചിയിലെ കഫേയില്‍ പ്രശസ്ത വ്യക്തിത്വമായ മുഹമ്മദ് അലി ജിന്നയുടെ ചിത്രം പ്രദര്‍ശിപ്പിച്ചതിനെക്കുറിച്ച് മാത്രമായിരിക്കും പരാമര്‍ശിക്കുന്നതെന്ന് താന്‍ തെറ്റിദ്ധരിക്കുകയായിരുന്നുവെന്നും ദിയ ഇന്‍സ്റ്റാഗ്രാമിലൂടെ വ്യക്തമാക്കി. 

കേരളത്തെ അപകീര്‍ത്തിപ്പെടുത്തുന്ന രീതിയിലുള്ള വിദ്വേഷ പരാമര്‍ശങ്ങള്‍ നിറഞ്ഞ വീഡിയോയ്ക്കാണ് ദിയ പിന്തുണ പ്രഖ്യാപിച്ചുകൊണ്ട് കമന്റ് ചെയ്തത്. ഇതോടെ സോഷ്യല്‍ മീഡിയയില്‍ ദിയയ്ക്കെതിരെ വന്‍ പ്രതിഷേധവും വിമര്‍ശനങ്ങളും ഉയരുകയായിരുന്നു. കൊച്ചിയിലെ ഒരു കഫേയില്‍ മുഹമ്മദ് അലി ജിന്നയുടെ ചിത്രം പ്രദര്‍ശിപ്പിച്ച സംഭവത്തില്‍ തനിക്ക് വ്യക്തമായ സ്വന്തം അഭിപ്രായമുണ്ടെന്ന് ദിയ പറഞ്ഞു. ആ ചിത്രം അവിടെ പ്രദര്‍ശിപ്പിച്ചത് ചോദ്യം ചെയ്യപ്പെടേണ്ട കാര്യം തന്നെയാണെന്ന തന്റെ മുന്‍ നിലപാടില്‍ ഇപ്പോഴും ഉറച്ചുനില്‍ക്കുന്നുവെന്നും, എന്നാല്‍ വീഡിയോയുടെ ബാക്കി ഭാഗങ്ങളില്‍ അടങ്ങിയിരുന്ന വിദ്വേഷ ഉള്ളടക്കം ശ്രദ്ധിക്കാതെ പോയതാണ് തനിക്ക് സംഭവിച്ച പിഴവെന്നും അവര്‍ കുറിച്ചു. 

പ്രതികരിക്കുന്നതിന് മുമ്പ്, പ്രത്യേകിച്ച് ഇത്തരം അതീവ സംവേദകക്ഷമമായ സെന്‍സിറ്റീവ് വിഷയങ്ങളില്‍ അഭിപ്രായം രേഖപ്പെടുത്തുമ്പോള്‍ അതിനുപിന്നിലെ പൂര്‍ണ്ണമായ പശ്ചാത്തലം മനസ്സിലാക്കാന്‍ താന്‍ പ്രത്യേക ശ്രദ്ധ പുലര്‍ത്തേണ്ടതായിരുന്നുവെന്ന് ദിയ സമ്മതിച്ചു. അതാണ് തന്റെ ഭാഗത്തുനിന്നുണ്ടായ ഗുരുതരമായ വീഴ്ച. സെന്‍സിറ്റീവ് വിഷയങ്ങളില്‍ മേലില്‍ കൂടുതല്‍ ജാഗ്രത പുലര്‍ത്തുമെന്നും, ഈ സംഭവത്തിന്റെ പൂര്‍ണ്ണമായ ഉത്തരവാദിത്തം താന്‍ ഏറ്റെടുക്കുന്നുവെന്നും അറിയിച്ച ദിയ, ഈ പരാമര്‍ശം മൂലം വേദന അനുഭവിക്കേണ്ടി വന്ന എല്ലാവരോടും ആത്മാര്‍ത്ഥമായി ക്ഷമ ചോദിക്കുന്നതായും വ്യക്തമാക്കി.

വിമര്‍ശനങ്ങള്‍ രൂക്ഷമായതോടെ ഇന്‍സ്റ്റാഗ്രാമില്‍ നിന്നും താല്‍ക്കാലിക ഇടവേള എടുക്കുകയാണെന്ന് മുന്‍പ് പ്രഖ്യാപിച്ചിരുന്ന കാര്യവും ദിയ ഇതില്‍ പരാമര്‍ശിച്ചു. എന്നാല്‍ ഈ വിഷയത്തെക്കുറിച്ച് പിന്നീട് ആഴത്തില്‍ ചിന്തിച്ചപ്പോള്‍, പ്രശ്‌നങ്ങളില്‍ നിന്ന് മാറിനില്‍ക്കുന്നതല്ല ശരിയായ രീതിയെന്ന് ബോധ്യപ്പെടുകയായിരുന്നു. തന്റെ ഭാഗത്തുനിന്ന് തെറ്റ് സംഭവിച്ചിട്ടുണ്ടെന്നും അതില്‍ നിന്ന് ഒളിച്ചോടുന്നതിന് പകരം തെറ്റ് തുറന്നുസമ്മതിക്കാനും അതില്‍ നിന്ന് കാര്യങ്ങള്‍ പഠിച്ച് മുന്നോട്ടുപോകാനുമാണ് താന്‍ ആഗ്രഹിക്കുന്നതെന്നും അവര്‍ ഇന്‍സ്റ്റാഗ്രാം കുറിപ്പിലൂടെ വ്യക്തമാക്കി. 

ഇത്രയധികം സ്‌നേഹവും പിന്തുണയും നല്‍കിയ ഒരു സോഷ്യല്‍ മീഡിയ പ്ലാറ്റ്ഫോമില്‍ നിന്ന് പെട്ടെന്ന് പിന്മാറുന്നതിനേക്കാള്‍ തെറ്റ് തിരുത്തി മുന്നോട്ടുപോകുന്നതാണ് ശരിയായ വഴിയെന്ന് കരുതുന്നു. കാലക്രമേണ തന്റെ യഥാര്‍ത്ഥ ഉദ്ദേശം എല്ലാവര്‍ക്കും മനസ്സിലാകുമെന്ന് പ്രതീക്ഷിക്കുന്നുണ്ടെന്നും, ഉണ്ടായ വിഷമങ്ങളില്‍ ഖേദിക്കുന്നതോടൊപ്പം ഇനി വരുംകാലങ്ങളില്‍ കൂടുതല്‍ ഉത്തരവാദിത്തത്തോടെയും ശ്രദ്ധയോടെയും പെരുമാറുമെന്ന് എല്ലാവര്‍ക്കും ഉറപ്പുനല്‍കുന്നുവെന്നും പറഞ്ഞാണ് ദിയ കൃഷ്ണ തന്റെ കുറിപ്പ് അവസാനിപ്പിച്ചത്.