വീട്ടില്‍ കഞ്ഞിവെള്ളം ഉണ്ടോ? എങ്കില്‍ ഇങ്ങനെ പരീക്ഷിച്ച് നോക്കൂ; മുടി തഴച്ച് വളരാന്‍ നല്ലതാണ്

തലമുടി സംരക്ഷണത്തിന് പണ്ടുകാലം മുതല്‍ തന്നെ പ്രയോഗിച്ചിരുന്ന ഒരു ലളിതവും ഫലപ്രദവുമായ രീതിയാണ് കഞ്ഞിവെള്ളം ഉപയോഗിച്ച് തല കഴുകുന്നത്. കഞ്ഞിവെള്ളത്തില്‍ ധാരാളം പ്രോട്ടീനുകളും കാര്‍ബോഹൈഡ്രേറ്റുകളും അടങ്ങിയതിനാല്‍ മുടിയുടെ ആരോഗ്യം മെച്ചപ്പെടുത്താന്‍ ഇത് സഹായിക്കുന്നു. മുടി കൊഴിച്ചില്‍, താരന്‍ തുടങ്ങിയ പ്രശ്‌നങ്ങള്‍ കുറയ്ക്കുകയും മുടിവളര്‍ച്ചയ്ക്ക് ആവശ്യമായ പോഷകങ്ങള്‍ നല്‍കുകയും ചെയ്യുന്നു. കൂടാതെ, മുടിയുടെ അറ്റം പിളരുന്നത് തടയുന്നതിലും ഇത് ഗുണം ചെയ്യും.

ഇതിന്, തലേന്നെടുത്ത കഞ്ഞിവെള്ളം തലയില്‍ ഒഴിച്ച് ഏകദേശം 10 മിനിറ്റ് മൃദുവായി മസാജ് ചെയ്യാം. പിന്നെ 20 മിനിറ്റിന് ശേഷം വെള്ളം ഉപയോഗിച്ച് കഴുകുക. ആഴ്ചയില്‍ ഒരിക്കല്‍ ഇതു ചെയ്യുന്നത് നല്ല ഫലങ്ങള്‍ നല്‍കും. ഉലുവ ചേര്‍ത്ത കഞ്ഞിവെള്ളം ഉപയോഗിച്ചാല്‍ മുടി കൂടുതല്‍ ശക്തമായി വളരാന്‍ സഹായിക്കും.

കഞ്ഞിവെള്ളത്തില്‍ കറ്റാര്‍വാഴ ചേര്‍ത്താല്‍ ഗുണം ഇരട്ടിയാകും. കറ്റാര്‍വാഴയിലെ പ്രോട്ടിയോലൈറ്റിക് എന്‍സൈമുകള്‍ മുടിയുടെ ആരോഗ്യകരമായ വളര്‍ച്ചയെ പ്രോത്സാഹിപ്പിക്കുകയും, മുടി പൊട്ടുന്നത് കുറയ്ക്കുകയും, താരനും മുടി കൊഴിച്ചിലും നിയന്ത്രിക്കുകയും ചെയ്യും.

കഞ്ഞിവെള്ളം ചര്‍മ്മത്തിനും ഏറെ ഗുണകരമാണ്. ഇതില്‍ അടങ്ങിയ ആന്റി-ഇന്‍ഫ്‌ലമേറ്ററി ഗുണങ്ങളും വിറ്റാമിന്‍ ബി, ഇ പോലുള്ള പോഷകങ്ങളും ചര്‍മ്മത്തിലെ ചുളിവുകള്‍ കുറയ്ക്കാന്‍ സഹായിക്കും. മുഖം തിളക്കമുള്ളതും മൃദുവുമായിരിക്കാനും ഇത് സഹായിക്കുന്നു. അമിനോ ആസിഡുകള്‍ അടങ്ങിയതിനാല്‍ കൊളാജന്‍ ഉല്‍പാദനം വര്‍ദ്ധിപ്പിക്കുകയും ചര്‍മ്മം ചെറുപ്പമായിരിക്കാനും കഞ്ഞിവെള്ളം സഹായിക്കുന്നു.