ഷാജി പാപ്പനും പിള്ളാരും വീണ്ടുമെത്തുന്നു.! ആട് ഒരു ഭീകരജീവി തിയേറ്ററിലെത്തി നാല് വര്‍ഷം പിന്നിട്ട ദീവസം ആട് 3 വരുമെന്ന് അറിയിച്ച് വിജയ് ബാബു 

ജയസൂര്യയുടെ കരിയറില്‍ തന്നെ വഴിത്തിരിവായി മാറിയ കഥാപാത്രമായിരുന്നു ഷാജി പാപ്പന്‍ എന്ന കഥാപാത്രം. ഷാജി പപ്പനും പിള്ളാര്‍ക്കും ആരാധകരും ഏറെയാണ്. സിനിമയുടെ ആദ്യ രണ്ടു ഭാഗങ്ങളും പ്രേക്ഷകര്‍ ഹൃദയത്തിലേറ്റിയിരുന്നു. ആദ്യ ഭാഗം തിയ്യേറ്ററുകളില്‍ പരാജയമായിരുന്നെങ്കിലും ഡിവിഡി ഇറങ്ങിയ ശേഷം മികച്ച സ്വീകാര്യതയായിരുന്നു ലഭിച്ചത്. ഇപ്പോളിതാ ആട് 3യും ഉറപ്പായിരിക്കുകയാണ്.

ആട് 3 ഉണ്ടാകുമെന്ന് വിജയ് ബാബു തന്റെ ഫേസ്ബുക്ക് പേജിലൂടെ അറിയിച്ചു. ആട് റിലീസ് ചെയ്ത തിയതിയില്‍ തന്നെയാണ് വിജയ് ബാബുവിന്റെ പ്രഖ്യാപനം എത്തിയിരിക്കുന്നത്. 'ഫെബ്രുവരി 6, ഇതേ തിയതിയിലാണ് ആട് തിയേറ്ററുകളിലെത്തിയത്. ഇതേ തിയതിയില്‍ തന്നെയാണ് ആട് 2 ചെയ്യാന്‍ തീരുമാനിച്ചത്. എന്നാല്‍ ഇന്നു തന്നെ പറഞ്ഞേക്കാം, ആട് 3 വരും' വിജയ് ബാബു ഫേസ്ബുക്കില്‍ കുറിച്ചു.

2015 ഫെബ്രുവരി ആറിനാണ് ആട് തിയേറ്ററുകളിലെത്തിയത്. എന്നാല്‍ ചിത്രം തിയേറ്ററില്‍ എറിച്ചില്ല. രണ്ട് വര്‍ഷങ്ങള്‍ക്കിപ്പുറം തിയേറ്ററില്‍ പരാജയം രുചിച്ച ആ സിനിമയുടെ രണ്ടാം ഭാഗവുമായി 2017 ഡിസംബറില്‍ അതേ ടീം വീണ്ടുമെത്തി. കൂടെയിറങ്ങിയ മറ്റ് ചിത്രങ്ങളെ ബഹുദൂരം പിന്നിലാക്കി ചിത്രം കത്തിക്കയറി. അതിനാല്‍ തന്നെ ആടിന്റെ മൂന്നാം വരവിലും ആരാധകര്‍ ഏറെ പ്രതീക്ഷയിലാണ്.